1 Minkte 18 - Kalate Zambe Nnomo a Mfefe Mfefé Nkôñelan

David a dañe Befilisteñ, Bemôabite, Besirieñ a Beédomite

¹ Eyoñe mam mete me maneya, David a nga bôé Befilisteñ a samele be. A nga wôlé Gat a minlame mié e mo Befilisteñ.

² A nga bôé Bemôabite, ane be nga ke éjôé jé si, be yaka'ane nye *toya.

³ David a nga bôé Hadadézer, njô bôte ya Sôba, mfa'a ya Hamat, éyoñ a nga ke telé njôane wé ôsôé Efrat.

⁴ Ane David a nga wôlé nye bevagoñe toyini, bewulu bikabela toyini zamgbwa, a bezimbi ba wosan be wulu'u a mebo toyini mewôm mebaé; a nga tyi'i fe mvuse mimbiaé ya bikabela bise bia dutu bevagoñ, ve a nga ba'ale bikabela ntet.

⁵ Besirieñ ya Damas be nga zu volô Hadadézer, njô bôte ya Sôba, nde David a nga wôé Besirieñ bete bôte toyini mewôm mebaé a ébaé.

⁶ David a nga tooé minkane bezimbi e Siri ya Damas; a Besirieñ be nga ke éjôé David si, be yaka'ane nye *toya. Nti a nga bo na David a dañ e vôm ase a nga ke.

⁷ Ane David a nga nyoñ e bibene bi or bebo bisaé be Hadadézer be nga bili a zuu bie e Yérusalém.

⁸ David a nga nyoñe fe étua abui mvot e Tibhat a e Kun, bitisone bi Hadadézer. Solômon a nga kôme mañ me mvot a mvot éte, nalé fe beta mekôn a biôm bi mvote bife.

⁹ Tôhu, nyô bôte ya Hamat, a nga nyoñe foé David na a maneya bôé nkane bita Hadadézer njô bôte ya Sôba.

¹⁰ Nde a nga lôme mone wé Hadôram e be njô bôte David asu ya batan a se'e nye amu a nga wosane Hadadézer a dañe nye. Amu Tôhu ba Hadadézer be nga wosan. A nga lôme fe biôm mevale mese bi too mboon a or, argent a mvot.

¹¹ Njô bôte David a nga telé bie étyi asu Nti, nalé fe or a argent a nga nyoñ e be *meyoñ mese: Edom, Môab, Amon, Befilisteñ a Amalék.

¹² Abisayi, e mone Séruya a nga wôé Beédomite toyini awôm a muam e mbi'ili nku.

¹³ A nga tooé bezimbi Edom, a Edom ase a nga ke éjôé Israél si. Nti a nga bo na David a dañ e vôm ase a nga ke.

¹⁴ David a nga jôô Israél ase. A tyi'i mejô *zôsôô e be bôte bé bese.

¹⁵ Yôab, e mone Seruya, a mbe njôô nsamba mewosan; Yôsafat, e mone Ahilud, a mbe mba'ale mintilan;

¹⁶ Sadok, e mone Ahitub, a Abimélék e mone Abiatar, be mbe betuni; Kavôha a mbe ntilimam;

¹⁷ Benayahu, e mone Yehôyada, a mbe évete Bekérétieñ a Bepelétieñ, a e bone be David be nga bili éto ya ôsu e fefele njô bôt.