1 Minkte 16 - Kalate Zambe Nnomo a Mfefe Mfefé Nkôñelan

¹ Eyoñe be soya éwolo Zambe, be nga bôé je ézezañe *nda éndelé nje David a nga lam asu dé, a be nga ve mimvean ba di'i ngumba a metuna'a ya nlatane ngbwa e mise me Zambe.

² Eyoñe David a maneya ve mimvean ba di'i ngumba a metuna'a ya nlatane ngbwa, nde a nga botane bôt a jôé Nti.

³ Eyoñe te fe a nga ve befam a binga bese y'Israél, môt ase éfuse belet, ôfuse tit ô ne nyañan a éwolo bibuma bi ndi'i woon.

⁴ Nde a nga telé ôsu éwolo Nti, bevo'o ya Belévit, mbe be mbe be bili ésaé ya ye'elan, ya kañ a se'e Nti, Zambe Israél.

⁵ Asaf nye a mbe évet, Zakari a tya'a nye mvus; wôna bana be nga tôñe valé: Yeiél, Semiramôt, Yehiel, Matitya, Eliah, Benayahu, Obéd-Edom a Yeiel. Be nga bili bibômebômé: memvet a biwoé; Asaf a mbe a bete'e mindiñ *tyiñ yôp.

⁶ Betuni be mbe na Benayahu a Yahaziél be mbe be loñe metoñ te jô'é ôsu éwolo élate Zambe.

⁷ Môs ôte ñwô a nga taté ve Asaf a bobenyañ éyoñ ôsu na be kañe Nti.

⁸ Kañane Nti, lo'one jôé dé! Bo'one na be yem e beta mimboone mié e *meyoñ me bôt été!

⁹ Yi'ane nye bia, yi'ane besam Asu duma dé! Fasane bitua bi mame bié bise!

¹⁰ Wumela'ane miabebien amu jôé dé e ne étyi! E nleme ya ba ba jeñe Nti Ô tame ñhe vak!

¹¹ Jeñane Nti Jeñane fe ngule jé, Jeñan asu dé éyoñ ése!

¹² Mi simesa'an bitua bi mam a nga bo, bitua bi mame bié a mintyi'ane mejô ya anyu dé,

¹³ a mvoñe bôt Israél, mbo ésaé wé, a bone be Yakob, mintobane mié!

¹⁴ Nye a ne Nti, e Zambe wongan; mintyi'ane mejô mié mia bo ésaé e si ése.

¹⁵ Mi simesa'an élate jé nnôm éto, mi simesa'ane nkobô wé asu miaé bôte toyini,

¹⁶ Mi Simesa'an élat a nga bo Abraham e ngana a nga kan Izak;

¹⁷ ngana éte a nga telé je ane mvinda asu Yakob, asu Israél, élate ya nnôm éto été.

¹⁸ A jô'ô na: Ma ye ve wo si ya Kanaan, é ntoo wo mvean.

¹⁹ Eyoñe te mi mbe bôte tyôtyoé, teke mimfañ mi bôt a mintabe si éte.

²⁰ Be nga ke ba kalan e *meyoñ meyoñ, be kôlô éjôé ji a ke ji évok;

²¹ Ve a nji kañese na môt éziñ a tibili be. A nga komekane bejô bôt amu ajô dap nye na:

²² Te nambane bôte bam be ne *ñwo'one mbon, a te boone bekulu mejô bam *abé!

²³ Si ése é yi'a Nti bia! Kañeta'an mbamba foé ya nyiane wé *môs ane *môs!

²⁴ Kañeta'ane duma dé e *meyoñ été, a kañete bitua bi mame bié e bôte bese été!

²⁵ Amu Nti a ne anen, a dañe fe yian ékaña'a, a ne Nyô ya ko woñ, a dañe bezambe bese;

²⁶ amu bezambe ya *meyoñ mese be ne bivôlevôla bezambe, ve Nti Nye a nga bo yôp.

²⁷ Abeñ a étôtok bi ne nye asu, ngul a mevak bi ne e *nda jé.

²⁸ A menda me bôte ya meyoñ va'ane Nti, va'ane Nti duma a ngu!

²⁹ Va'ane jôé Nti duma! Za'ane mimvean, za'ane be Nye, Kutane meboñe si ôsu Nti, mi bili mbamba be biôm be n'étyi!

³⁰ A si ése fô'ôba'an ôsu vié! Ya, émo ése é ne ne kpwé, émo é nji ke ndeñetan.

³¹ Yôp é va'ak a si é fônôk! A be jô'ôk e *meyoñ me bôt été na: Nti a jôô!

³² Mañ me duñuk a biôm bise bi n'été!

³³ Bilé ya mefane ki bi kute mefas e mise me Nti! Amu a zu tyi'i *si nyô mejô.

³⁴ Kañane Nti amu a ne mvaé Amu mvame jé é too nnôm éto!

³⁵ Jô'ane na: Nyi'i bia a Zambe ya nyiane wongan, Kô'ane bia a vaa bia ézezañe *meyoñ me bôt, nalé bia ye kañe jôé dôé e n'étyi, a nalé bia ye belane duma dangane na bi se'e wo!

³⁶ Ebotan a Nti, Zambe Israél akekui nnôm éto! Eyoñe te bôte bese be nga jô na: Amen! A se'e Nti!

³⁷ Ane David a nga li'i Asaf ba be bobenyañ valé ôsu éwolo élate Nti na be bo ésaé éyoñ ése ôsu éwolo élat, aval'ane abendé ya *môs ôse é né.

³⁸ Obéd-Edom e mone Yedutun a Hôsa, nalé fe bobenyañ bôte mewôm mesaman be nga li'i ane beba'ale mimbé;

³⁹ Ntuni Sadok a bobenyañe bevok be ne betuni be nga tele ôsu *tabernakel Nti, éto ya ékôndô'ô yôp é ne Gabaoñ,

⁴⁰ na be ve Nti mimvean ba di'i ngumba éyoñ ése, mametyé a mamengô'é ata'a metuna'a ba di'i ngumba yôp, a bo mam mese me ne ntilan e kalate metiñe Nti a nga bendé Israél.

⁴¹ Héman, Yedutun a bôte bevok be nga too be fefe, be nga toban a looban a biyôlé biabe na be kañe Nti. Amu mvame jé é too nnôm éto.

⁴² Héman a Yedutun be mbe fefele jap be bili metoñ a mindiñ asu ba ba bôme bie, be bili fe biôm ba bôme bie bia bi Zambe. Be nga lôme bone be Yedutun beba'ale mimbé.

⁴³ Ane bôt bese be nga bulan, môt ase e *nda jé, David fe a nga bulane na a botane *nda jé.