1 Minkte 14 - Kalate Zambe Nnomo a Mfefe Mfefé Nkôñelan

Zambe a yemete éjôé David

¹ Ane Hiram, njô bôte ya Tir, a nga lôme bôte be David be bili bilé bi sédre, bemaot a bebo mendile me *nda asu ya lôñe nye *nda njô bôt.

² David a nga yeme na Nti a yemete nye a bo njô bôte ya Israél, a na éjôé jé ja ke ke ôsu amu Israél ayoñe dé.

³ David a nga beta lu'u binga e Yérusalém a biaé bobefam a bobebinga.

⁴ Môé me *bon a nga biaé Yérusalém mme ma: Kamua, kôbab, Natan, Solômon,

⁵ Yibhar, Elikua, Elpélét,

⁶ Nôga, Néfeg, Yafia.

⁷ Elisama, Beélyada a Elifélét.

⁸ Eyoñe Befilisteñ be nga wô'ô na David be wo'oya nye mbone na a bo njô bôte ya Israél, nde be nga bete bese na be ke nyoñe nye. Ane David a nga wô'ô de a ke tôbane be.

⁹ Nde Befilisteñ be nga suan a mialan e mbi'ili Berefayim.

¹⁰ Ane David a nga sili nkômbane Zambe a jô'ô na: Ye ma ye bet a ke wosane Befilisteñ ye wo ye ve be e mo mam? Nti a nga yalane nye na: Betek a ma ye ve be e mo môé.

¹¹ Nde be nga bet e Baal-Perasim e vôme David a nga bôé be. Vôme mendim ma bu'u miek. Ajô te be nga yôlé vôm ate na: Baal-Perasim.

¹² Nde be nga li'i bezambe babe valé. David a nga bendé na be mane di'i be e nduan.

¹³ Befilisteñ be nga beta mialan ôban e mbi'ili.

¹⁴ Nde David a nga beta sili nkômbane Zambe, a Zambe a nga yalane nye na: Te bet a tôñe be mvus, ve bula'ane mvus a li'i nkandan e zañe mia be be, a yange ke kui be be atemetem *zôsôô a bilé bemurié.

¹⁵ Eyoñ wo ye wô'ô éduñ ane nge bôt ba wulu e bilé bemurié yôp, éyoñe te wo ye kui a ke wosan, amu Zambe nye a ke wo ôsu na a bôé minkane Befilisteñ.

¹⁶ Ane David a nga bo jame Nti a nga bendé nye a minsamba mié mi nga bôé minkane Befilisteñ ataté Gabaoñ a kui Gézér.

¹⁷ Ane duma David e nga mialane mesi mese a Nti a nga bo na *meyoñ mese me ko nye woñ.