1 Minkte 13 - Kalate Zambe Nnomo a Mfefe Mfefé Nkôñelan

David a tyi'i na a kee éwolo élat e Yérusalém

¹ Ane David a nga bo ékôan ba be bivete betoyini a bi mintet, a beteb'ôsu bese;

² nde David a nga jô ékôane bôt ése y'israél na: Nge mia yene nalé mvaé, a nge jame te da so be Nti, e Zambe wongan, bi tame lôme bôt mimfa'a mise e be bobejañ be too e mesi mese ya Israél, a e be betuni a Belévit, e mefôla ya bitisone biap, be zu sulane fefele jangan.

³ Bia ye zuu éwolo Zambe wongan e fefele jangan, amu bi nji ke ke nyoñe je melu me Saül.

⁴ Ane ékôane bôt ése é nga tyi'i na nalé nye a boban, amu bôte bese be nga yene na jame te da yian.

⁵ Nde David a nga sulan Israél ase, ataté Kior y'Ejipte a kui anyiine Hamat, na be zuu éwolo Zambe é so'o Kiryat-Yearim.

⁶ Ane David a Israél ase be nga bet e Baala, e Kiryat-Yearim ya Yuda asu ya nyoñ éwolo Zambe, Nti a too éwolo Zambe, Nti a too Bekerubime Yôp, be lo'one jôé dé valé.

⁷ Be nga futi éwolo Zambe e mfefé vagoñ été, ataté e ndaa Abinadab; Uza ba Ayô be dutu'u vagoñ.

⁸ David a Israél ase be bôme memvet e mise me Nti, nalé fe bingombé, mengom, mindiñ a metoñ, be nga vôé bie a ngul ése be yia fe bia.

⁹ Eyoñ be nga kui nseñe Kidôn, nde Uza a nga same wo na a bi éwolo, amu benyak be nga sendé.

¹⁰ Nde ayaa Nti é nga kalan Uza nyô ane nkaba'a nduan, a Nti a nga bibi nye amu a nga same wo éwolo. Ane Uza a nga wu valé e mise me Nti.

¹¹ Nde David a nga wô'ôlun amu Nti a nga bibi Uza a avale melebe te, a nga loone vôm ate na Perés-Uza a kui môse wu.

¹² Ane David a nga ko Zambe woñ *môs ôte a jô na: Aval'avé ma ye nyiin éwolo Zambe e *nda jam'

¹³ David a nji fe nyoñ éwolo *nda jé e tisone David, nde a nga bo na be kee je e *nda Obéd-Edom ya Gat.

¹⁴ Ewolo Zambe é nga tabe *nda Obéd-Edom ngon éla, e *nda bôte jé, Nti a nga botane *nda Obéd-Edom a biôm bise bi mbe émbié.