1 Minkte 11 - Kalate Zambe Nnomo a Mfefe Mfefé Nkôñelan

David, njô bôt, nyoñane Yérusalém

¹ Ane Israél ase a nga sulan e fefele David Ebroñ a jô na: Tame yene na bi ne bivese biôé a minsône miôé.

² Ayap é ngenane te lôt, to'o na éyoñe Saül a nga vee, wo ô mbe ô kele'e Israél a soo fe nye. Nti, e Zambe wôé, a nga jô wo na: Wo ye ve ayoñ Israél dam bidi, a wo wo ye liti ayoñ Israél dame *zen.

³ Nalé ate bemvendé bese y'Israél be nga zu be njô bôt Ebroñ, a David a nga bo élat a be Ebroñ, ôsu Nti. Nde be nga wo'o David mbone ya bo njô bôte ya Israél avale Nti a nga jô anyu Samuel.

⁴ Ane David a Israél ase be nga wulu dulu ya nyoñe Yérusalém, nye a ne Yebus. E nne Beyébuzieñ be mbe vôm ate, bôt be nga too si éte.

⁵ Nde bôte ya Yebus be nga jô David na: Woo ye ke nyiine va. Ve David a nga nyoñ Ôleme ya Sioñ: e tisone David.

⁶ David a nga jô na: Môt ase a ye taté bôé Beyébuzieñ, a ye bo évet a njô bôt. Nde Yôab e mone Seruya, a nga taté bet, ane a nga bo évet.

⁷ David a nga tabe Ôlem; ajô te be nga loone wô na: Tisone David.

⁸ A bo melôñ mbôma'an a tison, ataté Milô a mevôm me ne bebé valé; a Yôab a nga ve ayôñ e mevôm mevo'o ya tison.

⁹ Ane David a nga dañe dañe bo ngu, a Nti ya *minsamba mewosan a mbe be nye.

Biwôlô bi bôte David

¹⁰ Bivete ya biwôlô bi bôte David, bi bi nga volô nye abui éyoñ a nga nyoñ éjôé a Israél ase na a bo njô bôt avale Nti a nga kobô ajô Israél.

¹¹ Aval'ane tañe jap é né biwôlô bi bôte David bite mbie bi: Yakôbeam, e mone Hakmoni, évete nsamba bôt mewôm mela; nye a nga wosane besiñe mintete mila a akoñe dé a wôé bese éyoñ mewosane jia.

¹² Eléazar a nga tôñe nye mvus, a too mone Dodo mone Ahôhite, wua ya biwôlô bi bôte bilaa.

¹³ Nye ba David be nga too Pas-Damin, e vôme Befilisteñ be nga sulan asu mewosan. Efuse si éziñ é mbe été é too njalan a fôn, a bôt be nga tube Befilisteñ.

¹⁴ Nde be nga tebe tetele ézezañe ya éfuse si te, a beta nyoñe je, a bôé Befilisteñ. A Nti a nga kôté be beta *nkôtan.

¹⁵ Ane bilale ya bivete mewôm mela bi nga sis a ke be David akôm, e mbas ako'o y'Adulam été, éyoñe nkane Befilisteñ ô nga tele mbi'ili Berefayim.

¹⁶ David a mbe Ôlem éyoñe te, a Befilisteñ be mbe be too e Bétléhém.

¹⁷ Ane David a nga liti nkômban éziñ a jô na: Za a ye nyuu ma mendim me ne anjeñ é ne e *mbé ya Bétléhém'

¹⁸ Nde bôte bete belaa be nga tulan e minkane Befilisteñ a laé mendime ya anjeñ é ne e *mbé ya Bétléhém. Be nga soo me a ve me David; ve David a nji kômbô nyu me a sôé ôsu Nti,

¹⁹ a jô na: Nti a Kama'ane ma na me bo te bo avale jame te! Ye ma yiane nyu metyi ya bôte ba mbe be nga ke mfa'a ya jañele ényiñe jap: amu ba te soo mendim mete a ntañ ya ényiñe jap. Ajô te a nji kômbô nyu me. E jame biwôlô bi bôte bite bilaa bi nga bo nde le.

²⁰ Abisayi, monyañe Yôab a mbe nlô ya be belaa. Nye a nga samese akoñe dé e nyôle bôte mintete mila a wôé be, nde a nga wum e zañe be belaa.

²¹ E be belaa, nye a nga dañe nyoñe duma a bo évete jap, ve a nji kui ba belale ya ôsu.

²² Benaya, e mone Yehôyada, a mbe e mon éwôlô môt é nga bo abui mewosan, môte ya Kabseel. Nye a nga wôé b'Ariél bebaé ya Môab, Nye a nga sis a wôé ngbwengbwem anjeñe zañ. Meta'a me nga ku abui *môs ôte.

²³ Nye a nga wôé mon Ejiptieñ a too nté menyi'i me mo metan. Mon Ejiptieñ ate a nga bili akoñ, ntyen y'été ô too abima mbôbé ntiñe bindelé; nde a nga sis a ke wosane nye a ôlé, ve wôlé mon Ejiptieñ ate akoñe mo a wôé nye a akoñe dé.

²⁴ Jame Benayahu e mone Yehôyada a nga bo nde le, a a nga wum e biwôlô bi bôte bilal été.

²⁵ Nye a nga dañe duma e bôte mewôm melal été; ve a nji kui ba belale y'ôsu. David a nga nyoñe nye émo'o bebôndé mefe'e jé.

²⁶ Biwôlô bi bôte bivok mbie bi: Asaél, monyañe Yôab. Elhanañ, e mone Dodo ya Bétléhém.

²⁷ Kamôt ya Haror. Hélét ya Palôn.

²⁸ Ira e mone Ikék ya Tekôa. Abiézer y'Anatot.

²⁹ Sibekayi ya Husa. Ilayi y'Ahôa.

³⁰ Maharayi ya Nétôfa. Héléd e mone Baana ya Nétôfa.

³¹ Itayi e mone Ribayi ya Gibéa Bebenyaminite. Benaya ya Piratan.

³² Hurayi ya Nahalé-Gaas. Abiél ya Araba.

³³ Azmavét ya Baharum. Eliaba ya Kalbôn.

³⁴ Bené Hasém ya Gizônl Yônatan e mone Sagé ya Harar.

³⁵ Ahiam e mone Sakar ya Harar. Elifal e mone Ur.

³⁶ Héfer ya Mekéra. Ahiya ya Palôm.

³⁷ Hetsrô ya Karmel. Naarayi e mone Ezbayi.

³⁸ Yôél e mone Natan. Mibhar e mone Hagri.

³⁹ Télék mone Amonite. Narayi ya Bérôt nye a nga be'e mengale me Yôab, mone Seruya.

⁴⁰ Ira ya Yéter. Garét ya Yéter.

⁴¹ Urie mone Hitite. Zabad e mone Alayi

⁴² Adina e mone Kiza, môte ya mvô'ô Ruben, évete jap, ba be bôte mewôm mela.

⁴³ Hanan e mone Maaka. Yôsafat ya Mitni.

⁴⁴ Uzia ya Aktarôt. Sama a Yehiél, e mone Hôtam ya Aroér.

⁴⁵ Yediaél e mone Simri. Yôha monyañe wé mone Titsite.

⁴⁶ Eliél ya Mahavim, Yéribayi a Yôkavia e mone Elnaam. Yitma mone Môabite.

⁴⁷ Eliél, Obéd a Yaasiél-Metsôbaya.