1 Ko 9 - Kalate Zambe Nnomo a Mfefe Mfefé Nkôñelan

Paul a jibi sube mam a yiane nyoñ

¹ Ye me nji bo fili? Ye me nji bo *nlôman? Ye me nji yene Yésus Nti wongan? Ye mi nji bo mboone ésaé wom e be Nti'

² Nge me nji bo *nlôman e be bôte bevok, ve mfa'a wônan, me ne wô. Amu mia mi ne sitame ya éto nlômane jam e be Nti.

³ Nkate wom mfa'a bebo'olô bam ñwô wu:

⁴ ye bi nji bi nguleya di a nyu'

⁵ Ye bi mbe te ngule ya zu minga a buni e nsamba wongan, aval ane minlômane mivok, bobenyañe be Nti a Séfas'

⁶ Ma étam a Barnabas, ye bi nji bi ngule ya tabe te bo ésaé'

⁷ Za a nga tame bo ésaé e nsamba bezimbi a nyiñik a mfe'e wé? Za a bé afube mindik, te di bibuma ya été? Nge na za a ba'ale mbam te di menyañe ya été'

⁸ E ne fo'o ve ésaé bôt, nge na, ye *atiñ e nji jô mame mete'

⁹ E ne ntilan e metiñ me Môze na: Wo ye bo te dibe nnôme nyak a wulu fese yôb anyu. Ye Zambe a tyelé nleme yôb ajô benyak'

¹⁰ Ye sa bia étam a jôô be? Yaa! Ajô te e nga tiliban amu bia. Amu môt a senane si a yiane bi ndi *nlem, a nyô a ko'otô fes, a yiane bi ndi nleme ya nyoñe ngabe jé.

¹¹ Nge bi nga bé akume Nsisim asu denan, ye e ne évielevie na, bi kôan akume minsône denan.

¹² Nge ba bevok be bili ngul éte e be mia, ngumane ke bia, amu jé momo? Ve bi nji belane ngul éte? Ve bia viane jibi mam mese, bi za kolé Mbamba Foé Krist ôba'a éziñ.

¹³ Ye mi nji yeme na e ba ba bo ésaé bisulan bi nkañan, Nda Zambe nje ja yiane ve be bidi? A ba ba saé ata'a metuna'a, be bili ngabe ya jôme ja veban ata'a metuna'a'

¹⁴ Avale te fe Nti a nga bendé ba ba kate Mbamba Foé na, be nyiñ a Mbamba Foé.

¹⁵ Ve ma, me nji belane jame da ya mam ma yiane nyoñ mete, a me nji tili kalate nyô na be bulane ve ma me. Ke me jibi wu! Teke môt aa ye wôlé e jame me ne de mengo'o dole te.

¹⁶ Amu mfa'a wom, nkañetane Mbamba Foé ô nji bo jame ya bo mebun. Ve ô ne jame me ne ntindane ya bo. Bidim a ma, nge ma bo te kañete Mbamba Foé!

¹⁷ Nge mamien me nga ye té bo jame te, ve me nga yiane nyoñe ma'an. Ve nge me ne ntindane ya bo de, e ntoo mbe'e ô nga vebane be ma.

¹⁸ Ma'ane mam me ne jé? Ve na, me kate Mbamba Foé e zesé, teke nyoñe mame Mbamba Foé ate a ve ma ngule ya nyoñ.

¹⁹ Yaa, me ne e be bôte bese, ve me nga bo mamien *ôlo e be bôte bese, nde ma ye dutu bôt abui.

²⁰ Me nga too e zañe Beyude aval ane mone Beyude, nde ma ye dutu Beyude. Me nga too e be ba be ne metiñe si, aval ane nge ma fe me mbe metiñe si, ve e too na, mamien me nji bo me si, nde ma ye dutu ba be ne e metiñe si.

²¹ E be ba be ne te metiñ, aval ane nge me mbe te metiñ, ve me nji bo te metiñe me Zambe, amu Krist a ne metiñe mam, nde ma ye dutu ba be ne tee metiñ.

²² Me nga kaban ate'e ba be ne atek, asu ya dutu mintetek. Me nga telé mamiene bise, asu bese, na me nyii fo'o ba bevok.

²³ Ma bo mam mete mese amu Mbamba Foé, ndembene ma ye nyoñe ngab été.

Ngômôtô bemate mbil

²⁴ Ye mi nji yeme na, bemate mbi ba mate nseñ, ve wua a wô'ô nyoñe ma'an? Ajô te, mata'ane ñhe, avale mia ye bo nguleya nyoñe me.

²⁵ Bebo bivôé bese, ba tyi mam abui. Mfa'a wob e ne asu ékate ja wu ntuk. Ve mfa'a wongan, asu ékat é ne te wu ntuk.

²⁶ Avale te nde ñhe ma mate: me nji ke ane ndindim; avale di nde ma lume bikuta: me nji bibi ñyem.

²⁷ Ve ma tibili nyôle jam mbia ntibelan a bo je *ôlo, me ko woñe na, nge me mane kate bôte befe Mbamba Foé, mamiene me viane beneban.