1 Ko 8 - Kalate Zambe Nnomo a Mfefe Mfefé Nkôñelan

Betite ba veban e be bengunemelan

¹ Mfa'a betite ba veban e be bengunemelan, e ne fo'o na bi bili ñyemane y'été. Nyeman wo soo mebun, ve nye'an wo lôñ.

² Nge môt éziñ a ve'e fe'e na a yeme jôm éziñ, a ngenane te yem aval a yiane yem.

³ Ve nge môt éziñ *a nye'e Zambe, Zambe a yeme nye.

⁴ Nde, ye be ne di betite be nga veban e be bengunemelan? Bia yeme na, teke *ngunemelan é ne *si nyô, a *zambe mfe a nji bo, ve nyô étam a ne Zambe.

⁵ Amu akôsa bo ba ba loone bezambe be ne e yôp, nge e si, a na, bezambe be ne abui, a beti abui,

⁶ ve mfa'a wongan, Zambe a ne ve wua, nye a ne Esaa, a mam mese ma so be nye a bia ke be nye, nalé fe Nti wua, Yésus Krist, biôme bise bi ne a nye, bia fe bia nyiñ amu nye.

⁷ Ve bese be nji bi ñyeman. Bevok, amu mbuane ya buane bengunemelan ô ngenane te kôlô be be ba di tite *bityi'a avale ane nge é nga vebane fo'o e be bengunemelan, a e mone môte wobe ya *nlem, a ne atek, a bo mvin.

⁸ Saake adi éziñ e nde da ye kui bia bebé e be Zambe: nge bia bo te di de, bi nji bo mvus a jam éziñ. A nge bia di de, bi nji ke ôsu a *zen éziñ.

⁹ Ve taba'ane ntyele na, éto fili jenane te é bo ékolé ôbak e be mintetek.

¹⁰ Amu nge ba yene wo, e wo ô bili ñyeman, ô too tawôlô aba bengunemelan, ye jam da ye bo te tindi nyô a ne ate'e nleme na a di betit be nga tyi'i bengunemelan'

¹¹ Amu ñyemane wôé, ntete'e wo jañ, e monyoñe Krist a nga wu amu ajô dé!

¹² Eyoñe mia bo bobenyoñ *abé avale te, mia balé mone môte ya nleme wop a ne atek, Krist nye le mia bo *abé.

¹³ Amu ajô te, nge adi éziñ da bo na mojañ a ku, ma ye jô'é ndiane tite nnôm éto, a lôte na me bo mojañe na a ku.