1 Ko 7 - Kalate Zambe Nnomo a Mfefe Mfefé Nkôñelan

Biyalane ya minsili ajô aluk

¹ Mfa'a ya mam mi nga tili ma, é ne mvaé na fam é bo te fulane minga.

² Ve mfa'a ya sa'ale ébamba mevale mese, fam ése é bi minga wé, a minga ase e nnôme wé.

³ Nnôm a jalé'é mam a yiane bo minga wé, a minga a bo'o fe nalé mfa'a nnôme wé.

⁴ Saa minga nye a bili ngule njôane ya nyôle jé, ve nnôm. Avale da na saa nnôm nye a bili ngule njôane ya nyôle jé, ve e ngal.

⁵ Te tyiane mia mia, vengevenge ve mia kui *tyiñ, a nté éziñ, asu ya ve miabebien e meye'elan. Wôna, beta'a nyiñane fufulu, ane ate'e ya kate jibi denan, da ye bo te ve Satan afôla ya ve'ele mia.

⁶ Eyoñ ma kobô nalé, me nji ve abendé, ve e boba'an a nkañesane wônan.

⁷ Ma dañe kômbô na bôte bese be tabe ane ma. Ve môt ase a nyoñe mvean ô ne éñwé e be Zambe; nyôna avale di, nyô mbok aval avok.

⁸ Nde ma jô minkoé a minkuse na, e ne mvaé ya tabe nalé ane ma.

⁹ Ve nge be se ngule ya jôô bebien be lu'uk. Amu a ne mvaé ya luk a lôte na môt a dik.

¹⁰ Mfa'a ba be ne nlu'an, ma bendé, saa ma, ve Nti na: Minga a bo te kandane nnôm,

¹¹ nge a kandaneya nnôm, a bo'o te beta luk, nge na a beta late nnôme ngbwa, a nnôm a bo'o te suu minga wé.

¹² Mfa'a ba bevok, ma ma kobô, ve saa Nti na: Nge monyañ a bili minga a ne te buni, a kañese'e tabe e be nye, a bo'o te suu nye.

¹³ A nge minga a bili nnôm a ne te buni, ve a kañese tabe baa nye, a bo'o te suu nye.

¹⁴ Amu nnôm a ne te buni a ne ntelan étyi amu minga wé. A minga a ne te buni a ne ntelan étyi amu nnôme wé. Nge aval afe e nga ye boban, bone benane be nga ye bo mvin, ve e too na be ne étyi:

¹⁵ nge nyô a ne te buni a kômbô kôlô, a kôlô'ô! Monyañ nge kal, be nji bo nlatan éyoñe te. Zambe a nga loone mia na mi nyiñ e *mvo'é été.

¹⁶ Yaa a minga, ye wo yem, nge wo ye nyii nyô nnôm? Ye wo yem a nnôm nge wo ye nyii nyô ngal'

Te tyendé aval ô mbe

¹⁷ Jam afe na, môt ase a nyiñik aval ényiñe Nti a nga ve nye ane ngap, nje éte a nga too éyoñe Zambe a nga loone nye. Jame te nde ma tili bekeké bese.

¹⁸ Ye môt éziñ a nga too ntyi'an atyel éyoñ a nga loban? A bo'o te solé ntyi'an atyele wé. Ye mfe a nga too te ntyi'an atyel? A bo'o te tyi'iban atyel.

¹⁹ Ntyi'an atyel ô seke jôm, te ntyi'iban atyele fe teke jôm. Susu'a jam a ne ve na, môt a ba'ale metiñe me Zambe.

²⁰ Môt ase a tabe'e aval a nga too éyoñ a nga loban.

²¹ Ye ô mbe *ôlo éyoñ ô nga loban? Te tyelé nleme yôp; ve viane yeme belan éto *ôlo jôé to'o na ô mbe ngule ya bi éto fili.

²² Amu *ôlo ô nga lobane e be Nti, ô ntoo fili e be Nye. Avale da e môt a nga lobane a too fili, a ne *ôlo Krist.

²³ Môt éziñ a nga ve tañe ya nkôtane wônan. Te boon alo be bôt.

²⁴ Môt ase, a bobejañ, a tabe'e asu Zambe aval éto a nga too éyoñ a nga loban.

Enyiñe minkoé a minkus

²⁵ Mfa'a minkoé, me nji bi abendé Nti: Ve ôsimesane ma ve, ane môt a nga nyoñe mvame Nti, e nye ba yiane tabe nye ndi.

²⁶ Ma buni na, éto te é ne mvaé, amu mam ma tyelé bôte minleme yôp melu ma. Yaa, ma buni na, éto nkoé é ne mfi.

²⁷ Ye ô ne nlatan a minga éziñ? Te jeñe na ô kandane nye. Ye ô nji bo nlatan a minga éziñ? Te jeñe minga.

²⁸ Ve nge wo luk ô nji bo *abé. A nge nkoé minga wo luk, ô nji bo *abé. Ve minlu'an mia ye tôban abui *meve'ele ya jibi, mme mete ma kômbô na mi sa'ale.

²⁹ E jam ma jô a bobejañ, e nde di: éyoñ é ntoo étun. Ataté e ba be bili binga, be tabe'e avale ane nge be nji be bi,

³⁰ e ba ba yi du, aval ane nge be nji yi du, e ba ba vak, aval ane nge be nji vak, e ba ba kuse biôm, aval ane nge be nji bi jôm,

³¹ e ba ba yene mvaé ya *si nyô, aval ane nge be nji bi jôm. Amu éyeka'a ya *si nyô ja lôt.

³² Ma kômbô na, me tabe tee mam ma tyelé mia minleme yôp. E môt a nji bo nlu'an, a tyelé nleme yôp mfa'a mame me Nti, a jeñ aval a ne bo na Nti a yene nye mvaé.

³³ Ve nyô a ne nlu'an, a tyelé nleme yôp ajô mame ya *si nyô: a jeñ ane a ne bo na ngal a yene nye mvaé,

³⁴ e *nlem ô ne nye nkaban. Avale te fe minga a ne tee nnôm, a ngone minga, ba tyelé minleme yôp e mame me Nti, nde ba ye bo étyi e nyôl a e *nsisim bibaane. Ve minga a ne nlu'an a tyelé nleme yôp ajô mame ya *si nyô: a jeñ ane a ne bo na nnôm a yene nye mvaé.

³⁵ Ma jô mia de, asu mvaé jenan, saa mfa'a ya lame mia ôlam, v'amu na mi bo jam da dañe mvaé a na, mi bo nlatan a Nti teke minleme nkaban.

³⁶ Nge môt éziñ amu nkômban ô dañeya bi nye, a simesane na a se nguleya beta semé *atiñ aluk, a na mam m'aluk ma ke ôsu *mvo'é, a bo'ok aval ôsimesane wé ô né. A nji bo abé; be ntoo ve lu'an.

³⁷ Ve nyô a tu'aya tyi'i nleme wé été, teke ntindan éziñ, a nya nkômbane ya nleme wé, a tyi'iya édo'o ya nleme wé na, a semé minga baa nye be ne *atiñ aluk, nyôlé, a bo mvaé.

³⁸ Ajô te, nyô a lu'u minga ba nye be bili *atiñ aluk a bo mvaé, a nyô a bo te lu'u nye, a dañe dañe bo mvaé.

³⁹ Minga a ne nlatan a nnôme wé nté ôse a vee. Ve nge nnôm a wôé, a ne fili ya lu'u môt ase a kômbô, ve da, fo'o ve mbuni.

⁴⁰ Ve da ye dañe bo mvaé, avale ma simesan, nge a tabe aval a né. A ma buni na, ma fe me bili Nsisime Zambe.