1 Ko 5 - Kalate Zambe Nnomo a Mfefe Mfefé Nkôñelan

Mbia mboon éziñ e keké été

¹ Da jôban e be mia na, mbia mboon a ne e zañe jenan, avale mbia mboone te e nji boban, ja'ane e be meyoñe bikuu na: Wua ya be mia a bili nga ésaa.

² A mi ne njalan a mebun! A mi nji wô'ô mboon ôte *abé, nalé ate nyô a bo avale jame te a ye kôlô e zañe jenan.

³ Mfa'a wom, me kusa bo momo e minsôn, ve me ne a mia e *nsisim, me maneya tyi'i ajô môt ate, aval ane nge me mbe a mia:

⁴ a jôé Nti Yésus, a e ngule jé, éyoñe ya nsula'ane wônan nye ate ma ye tabe a *nsisim e zañe jenan,

⁵ môt avale te, a veba'ane be Satan, asu ndamane minsône mié, nde *nsisim wo ye nyiiban e môse Nti.

⁶ E jam mia nguane de e nji bo mvaé! Ye mi nji yeme na ôyôme mvusu, ô wô'ô vusu ngum ébañ'

⁷ Tunane miabebien mfa'a nnôme mvusu ôte, nde mia ye bo mfefé ébañ, amu mi nji bi mvusu. Amu Krist, *pak wongan, a nga wôéban.

⁸ Njemane ñhe abôk, saa a nnôme mvusu, nge mvusu mintañete a ézezam, ve a fembé é ne tee mvusu été, e *mfuban été, a e benya mejôô été.

⁹ E kalate wom été, me nga tili mia na: Mi bo te fulane mam a bebo ébamba.

¹⁰ Me nji sôñe bebo ébamba bese ya *si nyô, nge benye'e bidi, nge miñwuwup, nge bekañe bezambe befe, amu nalé a ye sili mia na mi kôlô *si nyô.

¹¹ Momo, me nga tili mia na: Mi bo te fulane mam a nyôa be'e jôé monyañ, ve a too ébamba, nye'e bidi, nkañe bezambe befe, ndamane bôte môé e zesé, nso'o bilam nge ñwuwup, a na te di di a avale môte te.

¹² Ye ma ma tyi'i ba be ne atan ajô? Sa ba ya *nda été mbe mi bili na mi tyi'i ajô'

¹³ Zambe a ye tyi'i ba ya atan ajô. Va'ane mbia môt e zañe jenan.