1 Ko 4 - Kalate Zambe Nnomo a Mfefe Mfefé Nkôñelan

Nti étam asu ntyi'i mejô

¹ Be yene ñhe bia ane bebo bisaé be Krist, a beba'ale minsolane mi mame Zambe.

² Amu e jam ba sili mfa'a beba'ale, e ne ve na, be yené ane benya beba'ale.

³ Mfa'a wom, me nji ko ntyi'an ajô wônane woñ, nge wu meba mejô me bôt. Nalé fe, me nji tyi'i mamien ajô.

⁴ Avale te fe mone môte ya nleme wom a nji ve ma bijô. Ve me nji kabe amu nalé; e nyô a tyi'i ma ajô a ne Nti.

⁵ Amu ajô te, bo'one te tyi'i ajô éyoñ éyoñ é ngenane te kpwaan, te naa Nti a so. Nye a ye liti e mame me ne nsolane dibi été éfufup, a kulane mefe'e mese me nee minlem. Wôna, môt ase a ye nyoñ ékaña'a ja yiane nye be Zambe.

E mame minlôman mi ayiane jibi

⁶ Amu mia, a bobejañ, nde me nga liti mame mete avale si avale ka, me nyoñe éve'ela Apôlôs a mamien, nde mia ye yé'é a éfunane jangane na mi bo te bo mebun, wua mfa'a nyô mbok.

⁷ Za a bo na ô selan a môt mbok? Jé ô bili nje ô nji nyoñ? A nge ô nga nyoñe je, amu jé wo bo mebun a je, aval ane nge ô nji ke je nyoñ'

⁸ Mi jaéya! Mi ntoo minkukum! Mi ntoo bejô bôt, bia momo! Ngo'é nge mi ne ke fo'o bejô bôt, nalé bia fe bia ye fulane jôô a mia!

⁹ Amu ma simesane na, bia, minlôman, bia Zambe a nga su'ulane yané e nseñ ane ba be bili mekua ma yian awu. Amu bi mbe mfa'a émo ji, mfa'a beéngele a bôt étua jame ya yen a mis.

¹⁰ Bi ne mekut amu Krist, ve mia mi ne fek e be Krist, bi ne atek, ve mia mi ne ngu: mi bili duma, ve bia e jôme bôt ba biasé.

¹¹ Awolo di, bia wô'ô zaé a évé, bi ne soé, bia tôban ékpwe'ele, bi ne b'éwuluwulu,

¹² a wu nju'u ya bo ésaé a mo mangan. Ba ta bia, ve bia botan; ba tibili bia, ve bia jibi;

¹³ ba ndamane bia môé e zesé, ve bia te volô bôte minlem. A zu kui awolo di, bi ne jô na bi ne mbuane ya *si nyô, jôme ya wua fé.

Paul ésaa * bebuni ya Korént

¹⁴ Me nji tili mia mame mete, mfa'a ya ve mia ôsone nyô, ve mfa'a ya lebe mia ane bone ma dañe nye'e.

¹⁵ Ja'ane mi nga ye bi beye'ele toyini awôm e be Krist, ve mi nji bi be ésaa abui. Ma me nga biaé mia be Yésus Krist a zene ya Mbamba Foé. Ma lebe mia na: Bo'one ba ba vu ma.

¹⁶ Amu nalé nye me nga lôme mia Timôté, e mone wom ma dañe nye'e, nyô a ne te tyendé mfa'a Nti; a ye bo mia mi simesane metiñ y'ényiñe jam e be Krist avale ma ye'ele me bekeké bese, vôm ase.

¹⁷ Amu ajô te ebien, me nga lôme mia Timôté, édiñe mone jam, nyô a ne étabe ndi e Nti. A ye bo mia mi simesan miñye'elane miam, ajô ya ényiñe mbuni, aval ane ma ye'ele e be bekeké bese vôm ase.

¹⁸ Amu mbunane ya na, maa ye ke beta zu e be mia, nde bevo'o be nga bo mebun.

¹⁹ Ve ma ye zu be mia ana'ana, nge Nti a kañese, a ma ye yem, saa ve *minkobô mebune mi bôt bete, ve nalé fe mimboone miap.

²⁰ Amu éjôé Zambe é nji bo nkobô, ve mboon.

²¹ Jé mia yene mvaé? Ye zu e be mia a minkasa nge a nye'an, a e nsisime ya évôvoé été'