1 Ko 16 - Kalate Zambe Nnomo a Mfefe Mfefé Nkôñelan

Mimvean asu keké ya Yérusalém

¹ Mfa'a mimvean asu mimfufup, mia fe mia ye tôñ e miñye'elan me nga ve bekeké ya Galati.

² E môse ôsu ya Sabat ase, môt ase a ye naan e *nda jé, e jôm a ye bi ngule ya ba'ale nde mia ye bo te yange nsoone wome na, mi nyoñe mimvean.

³ Eyoñe ma ye tabe wé, ma ye lôme ba mia ye top a ve be bekalate mo na be ke liti mimveane mienan e Yérusalém.

⁴ Nge da yiane na mamiene me ke, bia be be bia ye ke.

⁵ Ma ye zu be mia a tyii Masédôan; ma ye fo'o lôt été,

⁶ é ne kui na, me tabe nté éziñ nge lôte ke lôt ôyône be mia na mi ve ma mezene ya kee dulu dam ôsu.

⁷ Eyoñe ji, me nji kômbô yene mia ve mesu me lôtôk, ve ma buni na ma ye tabe bia be mia abe melu, nge Nti a kañese.

⁸ Ve ma ye tabe Eféze, a kui e Pañtekôt,

⁹ amu beta *mbé a yombôya ma été mfa'a ésaé jam, a besiñ be ne abui.

¹⁰ Nge Timôté a zu, jeñane *zen ése na a tabe e be mia teke woñ éziñ, amu a bo ésaé Nti, aval ane ma.

¹¹ Nde môt éziñ a bo'o ñhe te biasé nye. Va'ane nye mam ma yiane na a bulane *mvo'é e vôme me né, amu bia be bobejañ bia yange nye.

¹² Ve mfa'a mojañ Apôlôs, me nga ve ngul ése na a zu be mia baa be bobejañ; ve a nji fo'o kômbô zu éyoñe ji; a ye zu éyoñ a ye bi éyoñ.

Mebendé ma su'ulan

¹³ Momba'an, yemane ngul e mbunan été bo'one benya bôtô, bo'one ngu,

¹⁴ bo'one mam mese a nye'an.

¹⁵ Abendé afe di a bobejañ: mia yeme na Stéfanas a *nda bôte jé be ne *bembômô bibuma Akayi; be nga ve bebien asu ya saane mimfufup.

¹⁶ Va'ane ñhe avale bôte te mewôk, a môt ase a nyoñe ngabe ya bisaé biap a nju'u wop.

¹⁷ Ma vak a nsoone Stéfanas, Fortunatus a Akaikus; be nga volô éyoñe mi mbe momo.

¹⁸ Amu be nga bôôé me nleme si a éñwônane fe. Yenan avale bôte te mvaé.

¹⁹ Bekeké ya Azi ba batane mia. Akilas a Priska ba batane mia mbamba mebatan e be Nti a e keké é wô'ô sulan e *nda jap.

²⁰ Bobejañe bese ba batane mia. Mi bata'an wua a nyô mbok a nlatane menyu ô ne *mfuban.

²¹ Mebatan me ne ma me wo wom, ma Paul.

²² Nge môt éziñ a nji nye'e Nti, a kôlô'ô nsamba. Nti wongan a za'ak.

²³ Mvame Nti Yésus é tabe'e be mia.

²⁴ Ma nye'e mia bese e be Yésus Krist