1 Ko 13 - Kalate Zambe Nnomo a Mfefe Mfefé Nkôñelan

Jia Nye'an

¹ Ja'ane me nga ye kobô *minkobô mi bôt a mi beéngele, ve te bi nye'an, me ne ve ézan ja duñ, nge nkeñ wo kobô ne kañ kañ.

² Ja'ane me nga ye bi mveane ya kulu mejô, ñyemane minsolane mi mam mise, a ñyeman ôse; ja'ane me nga ye bi mbunan, e wu wo vaa minkô, nge nye'ane wo jembane ma, me seke jôm.

³ Ja'ane me nga ye kabe biôme biame bise, e be bewô'ô zaé ja'ane ve nyôle jame na é dik, nge me nji bi nye'an, me nji bi ma'an m'éziñ.

⁴ Nye'an vo jaé jibi, nye'an ô ne *mvam, ô ne tee mesengan, tee ngunguan. O ne te bo mebun, ô ne te bo jam éziñ e ne *abé. Ô ne te jeñe mfi wé ôbien,

⁵ Ô ne te yaa, ô ne te ba'ale ôviti'i ziñ,

⁶ ô ne te vak a ékotekot, ve wo vak e benya mejôô été.

⁷ Wo jamé mam mese, wo buni mam mese. Wo tabe mame mese ndi *nlem, wo jibi mame mese.

⁸ Nye'an ô nji man. Minkulane mejô mia ye bo momo. Minkobô mia ye man. Nyeman wo ye bo momo.

⁹ Amu ñyemane wongan ô bili nné, nalé fe nkulane mejô wongan.

¹⁰ Ve éyoñe jôm é ne ngum ja ye so, e jôm é bili nné ja ye bo momo.

¹¹ Eyoñe me mbe mongô, me nga kobô ane mongô, me nga simesan ane mongô. me nga fas ane mongô. Eyoñe me boya nya môtô, me jô'éya mam me mongô.

¹² Eyoñe ji, bia yen e ngobé été, te tu'a yemelan, ve éyoñe te ja ye bo bi lôane mesu. Eyoñe ji, ñyemane wom ô ne étun, éyoñe te ma ye yem ane me né.

¹³ Ajô te ñhe e mame mela mana me ne: mbunan, ndi *nlem a nye'an, ve nye'an ñwô wo dañ anen.