1 Ko 11 - Kalate Zambe Nnomo a Mfefe Mfefé Nkôñelan

¹ Bo'one bevu bam, aval ane me né mfa'a Krist.

Minga e bikôane ya * nda Zambe

² Ma se'e mia, amu mia simesane ma, a ba'ale miñye'elan avale me nga kalane mia mie.

³ Ve ma yi mi yeme jame di: nlô fam ése ô ne Krist, nlô minga ô ne fam, nlô Krist ô ne Zambe.

⁴ E fam ése ja ye'elan nge kulu mejô nlô mbutan, ja ve Krist ôson.

⁵ Ve minga ase a ye'elan nge kulu mejô nlô nsoé a ve nnôme wé ôson. Amu e ne avale da ane nge a mbe nsôtane nlô.

⁶ Nge minga a nji buti e nlô wé, a tyi'i fe ési! Ve nge e ne ôson mfa'a minga na a tyembane nlô, nge sôtôbane ntui, a jaé e ntôm.

⁷ Fam é nji yiane buti nlô wé; é ne éve'ela a étôto'o Zambe; ve minga a ne étôto'o fam.

⁸ Amu saa fam nje é nga nyoñeban e be minga, ve minga nye a nga nyoñebane be nye.

⁹ A fam é nji téban asu minga, ve minga a nga téban asu fam.

¹⁰ Ajô te ñhe minga a yiane be'e ndem éjôé e nlô wé amu beéngele.

¹¹ Ataté éyoñe te e be Nti, minga a nji bo fame momo, nge fame bo minga momo.

¹² Avale minga a nga nyoñebane be fam nde fame ke ja bialé e be minga, a biôme bise bia so be Zambe.

¹³ Tyi'ane de miabebien, ye e ne mvaé na, minga a ye'elane Zambe nsoé nlô'

¹⁴ Ye abialé ebien e nji ye'ele mia na, e ne ôson mfa'a fame na é be'e ayab ési'

¹⁵ Ve nge minga a be'e ayab ésil, nalé a ne duma mfa'a wé. Amu ésil é nga vebane be nye ane ngômesan.

¹⁶ A nge môt éziñ *a nye'e a sôane mam mete, bi nji bi fulu éte, ja'ane bekeké be Zambe.

Avale tawôlô Nti a yiane boban

¹⁷ Mfa'a mam mevok ma tôñ, me nji se'e mia. Amu e bensula'ane benan, éyoñe ba yiane bo na mi yaé, ba viane bo mia *abé.

¹⁸ E jam ôsu, éyoñe mia sulan, ba kate me na, nkandane mengam ô ne zañe jenan. A ma buni na e ne nalé a *zen éziñ.

¹⁹ Da sili sili na minkandan mi yené be mia, nalé bi yen e ba ya be mia ba jibi *meve'ele mete.

²⁰ Eyoñe mia sulane fufulu, saa bidi bi Nti mbie mia di.

²¹ Amu na, éyoñe mi nga zu di, môt ase a vuñe na a di bidi bié émien a kui na, nyôna a wô'ô zaé, ve nyô mbo'o ke a so'o bilam.

²² Ye mi nji bi menda ya di a nyu été? Nge na, ye mia biasé keké Zambe a, ye mia kômbô samele e ba be nji bi jôm? Me jô mia jé? Ye ma yiane se'e mia? Momo, mfa'a ôte, me nji se'e mia.

²³ Dina e ne jam me nga nyoñe be Nti, a di me nga kalane mia na: Nti Yésus, alu be nga koñe nye, a nga nyoñe fembé,

²⁴ a éyoñ a nga mane ve akéva, a nga be'e je a jô na: E nyôle jame nyô nje é ne asu denan, bo'one jame te mfa'a ya simesane ma.

²⁵ A nga bo fe avale te mfa'a *élaé, e mvuse ndian, a jô na: *élaé ji é ne mfefé élat metyi mam. Bo'one jame te, biyoñe bise mia ye nyu je, mi simesa'ane ma.

²⁶ Amu, biyoñe bise mia di fembé nyô, a nyu *élaé ji, mia kate foé awu Nti, akekui a ye so.

²⁷ Ajô te, môt a ye di fembé, nge nyu *élaé Nti aval e ne te yian, a ye bo émiene nyoñe mekua mfa'a nyôl a metyi me Nti.

²⁸ Ajô te môt ase a fase émien éyoñ a ngenane te di fembé nyô, nge nyu *élaé ji;

²⁹ Amu nyô a di a nyu, teke yemelane nyôle Nti, a di a nyu mekua mé émien.

³⁰ Amu ajô te, abui minkôkon e ne zañe jenan, a miñyeyem, a tañe bôt éziñ é wuya.

³¹ Nge bi nga ye fase biabebien, ve bi nga ye bo te tyi'iban ajô.

³² Ve Nti a telé bia e nya zene, éyoñ a tyi'i bia ajô, nalé bia be *si nyô bia ye bo te nyoñe mekua.

³³ Ajô te a bobejañ, éyoñe mia sulane na mi di, yanga'ane, mia mia, bana a ba bevok.

³⁴ Nge môt a wô'ô zaé, a ja'a *nda jé, nde mia ye bo te sulan asu mekua menan. Mfa'a mam mevok ma li'i, ma ye kôme me éyoñe ma ye zu.