1 Ko 1 - Kalate Zambe Nnomo a Mfefe Mfefé Nkôñelan

Ntili kalate a mebatan

¹ Paul, nloone ya bo nlômane Krist Yésus, amu nkômbane Zambe, a mojañe Sostén,

² e be keké Zambe é nee Korént a e be ba be nga teléban étyi e be Krist Yésus, a nloone ya bo étyi, ba bese ba loone jôé Nti wongan Yésus Krist vôm ase, Nti wop a éñwongan.

³ Mvam a *mvo'é, bi tabe'e be mia, bi so'o e be Zambe Esaa wongan a e be Nti Yésus Krist.

Be amu ya mvean akéva

⁴ Ma ve Zambe wom akéva éyoñ ése ajô denan, amu mvame Zambe é nga vebane be mia e be Krist Yésus.

⁵ Amu na, e be nye, mi nga jaléban a akume mevale mese, e di ya nkobô a e di ya ñyeman.

⁶ Nalé a ne na, nkañetane ya kañete Krist ô nga yeme ngule be mia,

⁷ avale di na teke mvean *mvam éziñ wo jembane mia, e mia mia yange nlitibane Nti wongan Yésus Krist.

⁸ E nye ate fe a ye yemete mia akekui amané, nde mia ye bo tee bijô e môse Nti wongan Yésus Krist a ye yené.

⁹ A ne nyô ya buni, e Zambe a nga loone mia ényiñe fufulu a Mone wé Yésus Krist, Nti wongan.

Nkandane mengam e keké Korént

¹⁰ Ve ma lebe mia, a bobejañ, amu jôé Nti wongan Yésus Krist na: Bo'one tyiñe jia bese, ane mengam ma ye bo momo e zañe jenan. Tuka'a tabane nlatan, e nsisime wua a ôsimesane wua été.

¹¹ Bôte ya *nda Klôé be nga kate me na, metyama'an a ne e be mia.

¹² E ne na: Môt ase ya e be mia a jô na: Ma, me ne môta Paul, me ke me ne môta Apôlôs, me ki e nyô Séfas, a ma, e nyô Krist.

¹³ Ye Krist a ne nsalan e zañ? Ye Paul nye a nga tyeléban élé yôp ajô denan? Ye mi nga duban a jôé Paul'

¹⁴ Akéva a Zambe! Amu me nji du môt éziñe ya be mia, ô vaa ve Kripus a Gaius;

¹⁵ nde teke môt a ne jô na mi nga duban a jôé dam.

¹⁶ Yaa! Me nga du fe *nda bôte Stéfanas. E bôte bevo'o bese, nga ve ma vuan, me nji du môt.

¹⁷ Amu Krist a nji lôme ma na me du bôt, ve na me kañete Mbamba Foé, teke belan atyeñe nkobô, me za veñesane *krôa Krist na é bo momo.

Fe'e bôt a Fe'e Zambe

¹⁸ Ajô *krôa e ne akute jam e mise me ba ba jañ, ve e ne ngule Zambe mfa'a ba ba nyiiban, mfa'a wongan.

¹⁹ Amu e ne ntilane na: Ma ye tyame fe'e mimfefek, a bo atyeñe mintyetyeñ momo.

²⁰ Mfefek ô ne vé? Nye'ele metiñ a ne vé? Mfase mame ya melu ma a ne vé? Ye Zambe a nji bo fe'e ya *si nyô na é bo akut'

²¹ Amu *si nyô, a zene ya ñyemane mam, é nji yeme Zambe e fe'e Zambe été, ve Zambe a nga yene mvaé ya nyii ba ba buni, akute nkatane Mejô me Zambe été.

²² Beyude ba sili ndem, a Begrék ba jeñe fek.

²³ Ve bia, bia kañete Krist, ntyeléban e *krôa yôp, ékolé ôbak mfa'a Beyude, a akute jam e mfa'a Bikuu.

²⁴ Ve mfa'a ba be ne nloon, Beyude a Begrék bebaane, a ne Krist, e ngule Zambe, a e fe'e Zambe.

²⁵ Amu e jame Zambe e ne akut, e ne fek a dañe bôt, a e jame Zambe e ne atek, e ne ngul abui a dañe bôt.

²⁶ A bobejañ, fomba'ane mia bebien, mi ne beza, mia mi nga nyoñe nloone Zambe? Ezezañe jenan: teke abui mimfefek e mise me bôte ya *si nyô, nge abui biwôlô, nge ba ba so mbamba menda me bôt.

²⁷ Ve jôme ja yené akut e *si nyô, Zambe a nga tope je na é samele ji é ne ngu.

²⁸ E jôm é ne évomô a ba biasé, e jôm é nji bo, Zambe a nga tobe je na é samele jôm é né,

²⁹ nalé ététéa éziñ ja ye bo te bo mebun asu Zambe.

³⁰ Amu nye, mi ne e be Krist Yésus, nye ate a su'ulaneya bo fe'e ja so be Zambe Mfa'a wongan, *zôsôô, *mfuban, a nkôtan

³¹ nde, aval ane ntilan wo jô na: E nyô a bo mebun, a tame bo mebun e be Nti.