1 Jn 4 - Kalate Zambe Nnomo a Mfefe Mfefé Nkôñelan

Ñyemelane minsisim zene ya mbunan

¹ Ve mi ve'elan minsisim, mi yem, nge mi ne mi mi Zambe. Amu abui bekulu mejô medu'an e maneya mialane *si nyô.

² A e zene nyô mia ye yemelane Nsisime Zambe. Nsisim ôse wo meme Yésus, nyô a nga bialé e minsôn, ô ne wu Zambe.

³ A *nsisim ôse wo bo te meme nye nalé, ô ne *nsiñe Krist, nye mi nga wô'ô be jô'ô na a ye zu. A a taté éyoñe ji, a ntoo *si nyô.

⁴ Ve mia, a ayôme bone dam mi ne be Zambe, mi ne bedañ bekulu mejô bete, amu nyô a ne zañe jenan, a dañ anen a lôte nyô ya *si nyô.

⁵ Be ne ba ya *si nyô a ba kobô nkobô ya *si nyô. A *si nyô ja vô'ôlô be *si nyô,

⁶ ve bia bi ne ba be Zambe. Nyô a yeme Zambe a vô'ôlô bia. Nyô a nji bo nyô Zambe, a ne te vô'ôlô bia. Vôm ate bia yemelane nsisime benya mejôô a wu minsos.

Nye'an wo so e be Zambe a lat a mbunan

⁷ A bôt ma nye'e e nye'esané zañe jangan, amu nye'an wo so e be Zambe, a nyô ase *a nye'e nye a nto mbialane be Zambe a akui vôme ya yeme Zambe.

⁸ Nyô a nji nye'e a nji yeme Zambe, amu Zambe a ne nye'an.

⁹ Avale di nde nye'ane Zambe ô nga yené zañe jangan: Zambe a nga lôm atyi'i Mone dé e *si nyô, nde bia ye nyiñ amu nye.

¹⁰ E jôme ba loone nye'an é ne na: Saa bia bi nga nye'e Zambe. Ve nye a nga nye'e bia, a lôm atyii Mone dé, étyi'a metuna'a ya mam *abé mangan.

¹¹ A émbame ma nye'e, nge Zambe a nga nye'e bia nalé, bia yiane fe nye'esane zañe jangan,

¹² Zambe a too e be bia. A nye'ane wé ô jalébaneya e be bia.

¹³ E jame di bia yeme na bi too e be nye, nye'e ki e be bia. A nga ve bia Nsisime wé.

¹⁴ A bia, bia kañete amu bi yemeya nye, a na, Esaa a nge lôme Mone wé *si nyô aval ane Nyii bôt ya *si nyô.

¹⁵ E môt ase a meme na, Yésus a ne Mone Zambe, Zambe a too e be nye e be Zambe.

¹⁶ A bia yem, amu bi nga buni nye'ane Zambe a nga liti zañe jangan. Zambe a ne nye'an. Nyô a too nye'an été a too e be Zambe, a Zambe a too e be nye.

¹⁷ E jame di nde nye'an wo jaléban e be bia; e ne na: Bi ne njalan a ndi minlem môse ntyi'ane mejô. Amu aval a né, avale te fe nde bi ne *si nyô,

¹⁸ Woñ ô nji bo nye'an été. Ve nya nye'ane a vaa woñ, amu woñ ô ne amu *melep. A môt *a ko woñ a nji bo njalan e nye'an été.

¹⁹ Bia nye'esan amu nye a nga taté nye'e bia.

²⁰ Nge môt éziñ a jô na: Ma nye'e Zambe! Ve a vini'i monyañ wé, a ne nlaa minsos. Amu, e môt a ne te nye'e monyañ a lôô a mis, a se ngule ya nye'e Zambe a nji yen.

²¹ Atiñe di nde a nga ve bia. E môt *a nye'e Zambe, a nyeke'e fe monyañe wé.