1 Jn 3 - Kalate Zambe Nnomo a Mfefe Mfefé Nkôñelan

Bone be Zambe

¹ Yenan abime nye'an Nti a nga nye'e bia ane bia lobane na bone be Zambe! A bi ne nalé. Amu ajô te si ndôn é se ngule ya yeme bia, é nji yeme Zambe.

² A bôt ma nye'e, a taté éyoñe ji, bi ne bone be Zambe. Ve avale bia ye bo nde e ngenane te tu'a yemeleban éyoñe ji. Ve bia yeme na éyoñ a ye yené, bia ye funane nye, amu bia ye yene nye aval a né.

³ A e môt ase a telé avale ndi nleme te e be nye a telé émien étyi, amu a ne étyi.

⁴ E môt ase a bo *abé a tyame memvinda. Amu *abé e ne ntyamane memvinda.

⁵ Ve mia yeme na, a nga zu amu na, a vaa *abé. Abé e nji bo be nye.

⁶ E môt a too e be nye a nji fe bo *abé. E nyô a bo *abé a nji yene nye nge yeme nye.

⁷ A ayôme bone dam, môt a bo'o te du'u mia. E môt a bo *zôsôô, a ne *zôsôô aval ane a ne *zôsôô.

⁸ E nyô a bo *abé a ne nyô Satan, amu Satan a ne mbo *abé a so atata'a. Amu ajô te Mone Zambe a nga yené amu a tyame bisaé bi Satan.

⁹ E nyô a nto mbialan e be Zambe a nji bo *abé, amu e mvoñe jé é béé be nye, a vo'o fe bo *abé amu a nto mbialane be Zambe.

¹⁰ A *zen éte, ba yemelane bone be Zambe a bone be Satan. Nyô ase a nji wulu *zôsôô a nji bo mone Zambe. Avale te fe nyô a ne te nye'e monyañe wé.

Mboone * mvam ane Mone Zambe

¹¹ Amu foé été nje mi nga wôk a so atata'a na, bi nye'esan, wua a nyô mbok.

¹² Saa aval ane Kaéñ, amu a mbe nyô mbia môt, a nga tyi'i monyañe wé *tyiñ. A nga tyi'i nye *tyiñ amu jé? Amu mimboone mié mi mbe *abé, e mi mi monyañ ke mvaé.

¹³ Te seman, a bobejañ nge *si nyô ja siñe mia.

¹⁴ Mfa'a wongan bia yeme na bi kôlô ya awu a kui ényiñ ve nné ane bia nye'e bobejañ. E nyô a ne te nye'e a too awu été.

¹⁵ Nyô a vini monyañ a ne ñwôé bôt. A mia yeme de na, teke ñwôé bôt a bili ngap ényiñe ya nnôm éto é too e be nye,

¹⁶ Amu jame di, a taté éyoñe ji, bia yen nye'an Yésus Krist a nga ve ényiñe jé amu ajô dangan. Bia fe bia yiane ve ényiñ jangan ajô bobejañ.

¹⁷ Nge môt éziñ a bili akume ya *si nyô a lôô monyañe wé e mebua été, a bo te mvamane nye, nye'ane Zambe ô too e be nye aya'

¹⁸ A ayôme bone dam e mbo'one te nye'e a nkobô ya biyaé, ve a mimboon a benya mejôô.

¹⁹ Amu jame te bia yeme na, bi ne ba benya mejôô, a bia ye volôbane minlem asu dé.

²⁰ Amu nge minleme miangan mia ve bia bijô, Zambe a dañe minleme miangan, a a yeme mame mese.

²¹ A ba ma dañe nye'e, nge minleme miangan mi nji ve bia bijô, bia kobô Zambe a ndi minlem ése.

²² A e jôm ése bia sili, bia ye nyoñe je e be nye, amu bia ba'ale metiñe mé a bo mam *a nye'e.

²³ A dina e ne atiñe dé. Bi buni mone wé Yésus Krist a nye'esan bia bia aval a nga ve bia *atiñ.

²⁴ Nyô a ba'ale metiñe me Zambe a too e be Zambe a Zambe a too e be nye. Jame te nde bia yeme na a too e be bia amu Nsisim a nga ve bia akap.