1 Bb. 9 - Kalate Zambe Nnomo a Mfefe Mfefé Nkôñelan

¹ Eyoñe Solômon a nga mane lôñe Nti *nda, nalé fe ndaa njô bôt a jôm ése a nga kômbô bo aval'ane nyiane wé ô né,

² éyoñe te Nti a nga yené be Solômon éyoñe baa, aval a nga yené be nye e Gabaoñ.

³ Nti a nga jô nye na: Me wô'ôya meye'elan a minja'an wo te liti ma, ma telé *nda wo te lôñe nyô étyi asu ya futi jôé dam été nnôm éto, mise mam a nleme wom bia ye ke été éyoñ ése.

⁴ A wo, nge wo wulu vôm me too aval'ésoo David a nga wulu, a nleme wôé ôse, a *zôsôô ase, a bo avale me maneya bendé wo, nge wo ba'ale memvinda a minjôane miam,

⁵ ma ye telé éto njôane jôé Israél nnôm éto, avale me nga kat ésoo wôé David na: Wo ye bo te jembane môt a tyendé wo éto njôane ya Israél.

⁶ Ve nge mia vañe lume ma mvus, miabebien a bone benan, nge mi nji ba'ale mebendé mam a memvinda mam me maneya telé mia ôsu, a nge mia ke kañe bezambe befe a kute be meboñe si.

⁷ Ma ye vaa Israél éfuse si me nga ve nye, ma ye wua e *nda me nga telé jôé dam é ke ma ôyap, a Israél a ye bo jôme *nkana a ôson e *meyoñ mese été.

⁸ Nda nyô é kôsa bo ôyabe yôp ane é né, môt ase a ye lôte je bebé a ye semé a kut ôdak. Ba ye sili na: Amu jé Nti a nga bo si a *nda nyô avale di'

⁹ Eyalan ja ye bo na: Amu be nga li'i Nti, e Zambe wop, nyô a nga vaa b'ésaa si y'Ejipte, amu be nga kabetan a bezambe befe, be kute be meboñe si a kañe be; ajô te Nti a nga zuu bidim bise bi be be.

Beta be mam Solômon a nga bo

¹⁰ Mvuse mimbu mewôm mebaé, Solômon a nga lôñe *nda éte ébaé: ndaa Nti a ndaa njô bôt.

¹¹ Amu Iram, njô bôte ya Tir, a nga ve Solômon bilé bi Sédre, bilé bi Sipré a or, abim ese émien a nga kômbô, nde njô bôte Solômon a nga ve Iram bitison mewôm mebaé e si ya Galilé.

¹² Ane Iram a nga kôlô Tir a ke yene bitison Solômon a mbe na a ve nye. Ve a nji yene bie mvaé.

¹³ Nye Solômon na: Za avale bitison wo te ve ma di a mojañ? Nde a nga loone bie na si kabul, bi be'e jôé te a kui môse wu.

¹⁴ Iram a nga lôme njô bôte Solômon betalañ be or ntet.

¹⁵ Njô bôte Solômon a nga nyoñe bôt be bo bisaé bi étibela'a asu ya lôñe ndaa Nti a *nda jé ébien, Milô, a mfine ya Yérusalém, Asor, Megidô a Gézér.

¹⁶ Ane Faraoñ, njô bôte y'Ejipte, a nga bete na a ke nyoñe Gézér, a mane di'i nye nduan, a wôé Bekanéeñ be nga too tison. Eyoñe te a nga ve je ngo jé, nga Solômon, ane nsuba.

¹⁷ Nde Solômon a nga lôñe Gézér, Bétôroñ ya nké,

¹⁸ Balat a Tadmor e *nkôte si.

¹⁹ Bitison bise bi mbe asu nnaan akum bi too bi bi Solômon, bitison bi mbe asu bevagoñ bita, bitison bi mbe asu bikabela a bôt ba wulu bie yôp, a jôm ése Solômon a nga lôñ aval'ane nkômbane wé ô né e Yérusalém, e Libañ a e si ése a nga jôô je.

²⁰ Bôte bese ya Beamorééñ be nga li'i, Behétieñ, Beférézieñ, Behévieñ a Beyébuzieñ be nji bo ngap a bone b'Israél,

²¹ e bone bap be nga li'i be mvus a mbe bone b'Israél be nga bo te jian, Solômon a nga nyoñe be ane alo da bo bisaé bi ntindan, a kui môse wu.

²² Ve Solômon a nji tindi môt éziñ ya bone b'Israél a bo ôlo; amu be mbe bôte mewosan, bebo bisaé bé, bivete bié, bôt be be'e bibene bié ya bita, bivete bevagoñe bita bé a bi bikabela bié.

²³ Bivete bisaé bi Solômon bi mbe mintete mitan a mewôm metan, mbie bi nga jôô bôt be nga bo bisaé.

²⁴ Ngone Faraoñ é nga kôlô tisone David a ke e *nda jé, nyô Solômon a nga lôñe nye. Eyoñe te nje a nga lôñe Milô.

²⁵ Solômon a nga ve *bityi'a bi ne ngumba biyoñ bilale mbu, nalé fe *bityi'a bi nlatane ngbwa, e ata'a metuna'a a nga lôñe Nti, a a nga di'i mimbon mi ne mbamba menyum ata'a metuna'a e mbe ôsu Nti. Ane a nga mane *nda.

²⁶ Njô bôte Solômon a nga kôme besitima e Esiôn-Géber, bebé Elat, e minsa'a mi évele mañ, e sii Edom.

²⁷ Iram a nga lôme bebo bisaé bé, beyeme mañ, be ke fulan a bebo bisaé be Solômon, be saé e besitima bete.

²⁸ Be nga ke Ôfir a nyoñe or wé, tañe betalañ mintete minyin a mewôm mebaé a zu ve be Solômon.