1 Bb. 7 - Kalate Zambe Nnomo a Mfefe Mfefé Nkôñelan

Melôñe me * nda njô bôt

¹ Solômon a nga lôñe fe *nda jé émien; a nga mane je tañe mimbu awôm a mila.

² A nga taté lôñe *nda ba loone Afane Libañ: nté menyi'i me mo ntet, ndam menyi'i me mo mewôm metan, nkôñe yôp menyi'i me mo mewôm mela. E nga lôñeban e minnoñ mi beta mekôn benyin, mboon a minku'u bilé bi Sédre, minsalan minko'o mi Sédre, mi too e mekône mete.

³ E mfa'a ya yôp, nta'ane bilé bi Sédre, ô bete betyengan ane mimbôñ, mmie beta mekôn be nga be'e: betyenga'ane mimbôñ bete be mbe mewôm menyin a betan, nnoñ wua awôm a betan;

⁴ minnoñ bevundi mi mbe mila, vundi ase ya minnoñ mite mila a nga lôô vundi mbok.

⁵ Bevundi bete bese a biôme biabe bise, be mbe avale da mimfa'a mise, vundi ase a lôô nyô mbok, minnoñ bevundi ke mila.

⁶ A nga bo aba beta mekôn: nté, binyi'a bi mo mewôm metan, ndam menyi'i me mo mewôm mela; ôsu, *mbé si ô bili beta mekôn, ébes é too été mfa'a y'asu.

⁷ A nga bo aba mejô, vôm a nga bo a tyi'i mejô, aba ntyi'ane mejô, be nga bômane de a Sédre, ataté si a kui yôp.

⁸ Wôna, mfa'a ya *nda ébien a nga too, é mbe vôme mfe a sela'an a vôme ya éto njôan é né; v'é mbe éyeka'a avale da. A nga lôñe *nda fe asu ngone Faraoñ a nga luk; *nda éte é mbe ane ndaa éto njôan.

⁹ Menda mete mese me mbe nlôñan a *mekok me ne mbaan, mebim y'été me too ma ya meko'o me n'anen, nsi'an a so e mesu mese, été a atan. Me mbe ataté mimbôka'a a kui minkôngô ya yôp, ataté atan a kui e beta nseñ.

¹⁰ Asu mimbôka'a ya si. Meko'o me ne mbaan, e beta *mekok me ne menyi'i me mo awôm a menyi'i me mo muam.

¹¹ E mimbôka'a ya si be nga futi meko'o me ne mbaan, mebime y'été me too ma ya meko'o me n'anen a bilé bi Sédre.

¹² Minnoñ meko'o me ne mbaan a nnoñe beta bilé bi Sédre bi ne nsalan mi nga bômane beta nseñ, avale te fe mfa'a nseñ ô ne e *nda Nti été a e *mbé si wé.

Nluane biôm asu Nda Zambe

¹³ Ane njô bôte Solômon a nga lôm be ke nyoñe Iram e Tir.

¹⁴ A mbe mone nkuse minga y'ayoñe Néftali, ésaa a too mone Tirieñ, nlui mvot; a mbe njalan a atyeñe ya mo, a atyeñ ya nlô, ñyeman mfa'a ya lui mvot. Ane a nga zu be njô bôte Solômon, a bo bisaé bite bise.

¹⁵ A nga bo mekône me mvote mebaé, akôn ese nté ya yôp, menyi'i me mo awôm a muam, mbôma'ane menyi'i me mo awôm a mebaé.

¹⁶ A nga bo fe mendo'o me mvot é ne nyeman mebaé asu ya beté me e mekône yôp; ando'o da e too nté ya yôp menyi'i me mo metan, ando'o avok e too fe nté ya yôp menyi'i me mo metan.

¹⁷ Mendo'o me nga too e mekône yôp me nga bili mevot ntiñane mese ane songo, a minsinga ntiñan a bone bengôkop; ando'o da zamgbwa a ando'o avok zamgbwa.

¹⁸ Nalé nye a nga bo mekône mete; minnoñ mibaé mi mbe mbôma'an avote da yôp, asu ya buti mendo'o me nga too e mekône yôp; nalé ate fe a nga bo ando'o avok.

¹⁹ Mendo'o me nga too yôp mfa'a ya mbala'a si, me nga too mboon éfunan ane sam ayañ, nté menyi'i me mo menyin.

²⁰ Mendo'o me nga too fe mfa'a ya yôp e mekône mebaé mete yôp bebé a abum e mbe fefel avot; bibuma bi grenade bi nga too mintete mibaé bi too minnoñe minnoñ, mbôma'an a ando'o avok.

²¹ A nga telé beta mekône mete bebé e mbala'a si ya Nda Zambe; a nga telé beta akône ya mbo nnôm a yôlé de jôé na Yakin, a nga telé fe di ya mbo ngal a yôlé de jôé na Bôaz.

²² Sôso'o mekôn é mbe ane sam ayañ; ésaé mekôn é nga mane *mvo'é.

²³ A nga bo beta élaba'a, ndeme ya mañ a mvot é ne nyeman. Elaba'a te é mbe njiñelete, ndam menyi'i me mo awôm. Nté ya yôp ô mbe menyi'i me mo metan. Nkôle wo bômane njiñelete y'été ô mbe bo menyi'i me mo mewôm mela.

²⁴ E nka si, bive'ela bikpwas bi nga bômane me mimfa'a mise, nté ô too menyi'i me mo awôm, bikpwase bite bi bôma'ane mañ mete mimfa'a mise, bikpwase bite bi nga too minnoñe mibaé, be nga sôé baa be mañ asôé da.

²⁵ Mañ mete me nga bete e beyôm benya'a awôm a bebaé yôp; belaa be lôô mfa'a y'akôé, belaa mfa'a jôp da dim, belaa mfa'a ya nké a belaa mfa'a jôp da tôô. Mañ me nga bete be yôp a memvus me lumu be mfa'a ya été.

²⁶ Afibe dé e mbe ndam ane akule wo a nkôme ya nka ô mbe nkôman ane nkôm y'élaé, avale fe ane sam ayañ: mendim me mbe jaé été tañe lita toyini mewôme muam.

²⁷ Ane a nga bo biteba'a bi mvot awôm; éteba'a jia é too menyi'i me mo menyin, ndame ki menyi'i me mo menyin, nté ya yôp menyi'i me mo mela.

²⁸ Mboone biteba'a ô mbe avale di: bi nga bili mintyi'ane ya mefefe bitune bitun; bitune bite bi too e zañe biba'a;

²⁹ Bitun bi nga too e zañe biba'a bite bi nga bili bikañga bengbwengbwem, beyôm benyak a Bekerubim; atin e nga too biba'a yôp; a mintiñane minsinga ya biôm bi tyele mi nga too e bengbwengbwem a beyôm benya'a si.

³⁰ Eteba'a ése é nga bili minka mi mvote minyin, a mimbôñe minka mi mvot; mebo menyin y'été me nga bili fe bisuka'a; bisuka'a bi ne nyemane bite bi nga too ésôba'a si, mintiñan minsinga mi tyele e fefel ésuka'a ése.

³¹ Anyu y'été mfa'a ya ando'été a mfa'a ya yôp é mbe nté anyi'i wo da: anyu te e nga too njiñelete aval ane mboone y'atiñ, nté anyi'i wo da a étun; anyu te e nga bili fe minkpwelan, a mintyi'ane ya mefefe bitune bitun mi mbe meku'u menyin, sa njiñelete.

³² Minka minyin mi nga too mintyi'ane bitune ya mefefele si, a mebii mimbôñe ya minka me nga beme éteba'a: nka ôse ô nga too nté ya yôp, anyi'i wo da a étun.

³³ Mboone minka ô mbe ane wu ya nka vagoñ bita; mebii mimbôñe ya minka, a memvus, a bibaé, a meteme y'été, bise bi mbe nyeman.

³⁴ Bisuka'a binyin bi nga too mebu'u menyin y'éteba'a ése; bisuka'a bite ba be éteba'a ébien bi nga too jôme jia.

³⁵ E sôso'o éteba'a ése, njiñelete a nga too été a too nkôñe yôp étun anyi'i wo da, mebii me too mfa'a ya yôp; mintyi'ane bitune ya mefefele y'été, baa be je bi nga too fe jôme jia.

³⁶ Mfa'a mefefele biyemeta'a y'été bite, a mfa'a mintyi'ane bitune ya mefefele y'été mite, a nga kpwelé bikanga Bekerubim a bengbwengbwem, mebua melen, abim e nga yiane jôm ése, mintiñan minsinga mi tyele f'été mbôma'ane.

³⁷ Avale te nde a nga bo biteba'a bite awôm: bise bi nga sôéban asôé da, bi too abime da, a avale da.

³⁸ A nga bo bisôban bi mvot awôm; ésôban ése é too ngule ya nyoñe lita mendim toyini a mintete misaman; ésôba'a ése é mbe nté menyi'i me mo menyin; biteba'a bite awôm, éteba'a ése é nga bo é beke'e ésôba'a jia.

³⁹ Ane a nga telé biteba'a bite, bitan mfa'a *nda ya mbo nnôm, a bitan mfa'a *nda ya mbo ngal: a nga telé fe mañ mete mfa'a *nda ya mbo nnôm ô lôô mfa'a jôp da tôô, mfa'a ya nké.

⁴⁰ Iram a nga bo bisôban a biwôlô asup, a bisua. Nalé ate Iram a nga sondô ésaé jé ése a nga bo njô bôte Solômon e *nda Nti été.

⁴¹ Mekône mebaé a bido'o bisua bibaé ya mendo'o me nga too mekône yôp; a mevote mebaé me nga buti bido'o bisua bibaé ya mendo'o me nga too mekône yôp;

⁴² a bibuma bi grenade mintete minyin mfa'a ya mevote mebaé, avot ese minnoñe bibuma bi grenade mibaé, mi buti'i bido'o bisua bibaé ya mendo'o me nga too mekône yôp;

⁴³ a biteba'a awôm, a bisôban awôm, bi bete biteba'a yôp;

⁴⁴ beta fandé a too njiñelete wua, a beyôm benyak awôm a bebaé be be'e beta fandé ate;

⁴⁵ biwôlô asup, a bisobelé, a bisua ba futi mendim ba miam, biôm bite bise mbie Iram a nga bo asu *nda Zambe Nti, avale njô bôte Solômon a nga bendé: bi mbe mboon a mvot é ne nsilan.

⁴⁶ Njô bôt a nga kôme bie nje'ese Yordan, e zañe minlame ya Sukôt a Sartan.

⁴⁷ Ane Solômon a nga bo na be telé biôm bite e Nda Zambe Nti, bi mbe étua abui, môt teke nyoñe nju'u ya yemelan adite ya abime mvot be nga belane je.

⁴⁸ Ane Solômon a nga beta bo biôm bivo'o bise ya ndaa Nti; ata'a metuna'a or, tawôlô or ba beté belet é ne étyi awôm a ébaé.

⁴⁹ Bibii bifufup, mboon a or a dañe *mfuban, bitane mbo nnôm a bitane mbo ngal ôsu ya vôm a dañ étyi, mesam belambe a mebas me or bi too été.

⁵⁰ Befandé, atyeñ, beta bilaé, bone bilaé a bisua bi nduan, mboon a or a ne mfuban; mengôñ me or asu mimbé ya *nda été, anyiine ya vôm a dañ étyi, a asu mimbé ya *nda anyiine ya Nda Zambe.

⁵¹ Nalé ésaé njô bôte Solômon a nga bo asu Ndaa Nti é nga man. Ane Solômon a nga soo biôme David ésaa wé a nga telé étyi: argent or a biôm bivok. A nga telé bie e ngab akume ya Ndaa Nti.