1 Bb. 6 - Kalate Zambe Nnomo a Mfefe Mfefé Nkôñelan

Nlônane * nda Zambe

¹ Mbu mintete minyin a mewôme muam, valé bone b'Israél be kôlôya si y'Ejipte, mbu nyini ya njôane Solômon a nga jôô Israél, e ngone baa ba loone Ziv, nje a nga lôñe Nti Nda.

² Nda njô bôte Solômon a nga lôñe Nti é mbe nté, menyi'i me mo mewôm mesaman, ndam menyi'i me mo mewôm mebaé, nté ya yôp menyi'i me mo mewôm mela.

³ Mbé si ya zañ aba *nda a atan, ô too nté, menyi'i me mo mewôm mebaé, mve'an mfa'a ndame ya nda; ndame ki menyi'i me mo awôm mfa'a ñwôñelane *nda.

⁴ Bevundi ya *nda be nga bili mevote m'étyé.

⁵ Be nga lôñe *nda fe, é too bitage bilaa, é late a mimfine y'atane ya beta aba a di e ne susu'a.

⁶ Nda éte fe, mfa'a ya si, ô mbe ndam méta ébaé a étun, étage ya ézezañ, ndam, méta éla, étage ya yôp, ndam, méta éla a étun. E mfine *nda Zambe ya nseñ ô nji bo afib, avale da ane nté ya yôp ôse; ô mbe teke dañ afip nné ôse, ajô te nkpwase ya andil ô nji ke nyiin e mimfine ya *nda Zambe si.

⁷ Asu ya lôñe Nda Zambe, be nga belane *mekok avale me nga so e vôm be nga bôé me; ajô te nté be nga lôñe *nda, be nji wô'ô to'o éduñe vamak jia, nge ji ôfak nge ji évôl éfe é n'étyé.

⁸ Eyoñ wo kômbô ke étage baa, be nga lôt e *mbé ô mbe Nda Zambe mfa'a ya nké. Nge ô kôlô *mbé te éyoñ te wo nyoñe ôbet a ke kui étage baa, ô beta kôlô valé a kui étage lale.

⁹ Asu ya mane melôñ ya Nda Zambe be nga bo plafoñ a mimbôñ, nalé fe a mebam me Sédre.

¹⁰ E *nda fe be nga lôñ é late a Nda Zambe, é mbe ôyabe yôp, méta ébaé a étun étage ése, a mimbôñ mi Sédre mi nga bete mimfine ya Nda Zambe yôp.

¹¹ Ane Nti a nga kobô Solômon a jô na:

¹² Wo lôñe Nda nyô! Ve nge wo wulu aval'ane metiñe mam me né, nge wo bo ane mefulu mam me né, a nge wo ba'ale mebendé mam mese a wulu ane me né, éyoñe te ma ye tôé nkobô wom be wo, wu me nga kobô David ésoo.

¹³ A ma ye tabe ézezañe bone b'Israél a ma ye bo te vuan ayoñe dam Israél.

¹⁴ Ane Solômon a nga lôñe Nda a mane fe je.

¹⁵ Mimfine ya *nda été mi mbe nlôñan a mebame me Sédre ataté si a kui mimbôñe ya yôp. Nda ése, mfa'a y'été, é too mboon a bilé. Si ya *nda é mbe mebam me Sipré.

¹⁶ Mbôma'ane ya *nda été, ataté si a kui yôp, ndam, menyi'i me mo mewôm mebaé, a nga lôñe nye a mebam me Sédre. Mfa'a y'été, a nga bo étune *nda é n'étyi, e vôm a dañ étyi.

¹⁷ Aba *nda e n'anen e mbe menyi'i me mo mewôm menyin.

¹⁸ Bilé bi Sédre bi mbe *nda été bi mbe nkpwelan bive'ela bi sam é ne nkulan. Jôm ése é mbe mboon a Sédre, akok teke yené.

¹⁹ Ezezañe *nda, mfa'a y'été, a nga kôm étune *nda é n'étyi asu ya bôé éwolo élate Nti.

²⁰ Ôsu ya étune *nda é n'étyi é too nté menyi'i me mo mewôm mebaé, ndam menyi'i me mo mewôm mebaé, nté ya yôp menyi'i me mo mewôm mebaé a nje Solômon a nga mane yañe or, ata'a metuna'a e mbe valé, nde be nga mane dip a Sédre.

²¹ Nda, e mfa'a y'été, Solômon a nga mane dube je a or a ne *mfuban, a tyelé minsanga mi or ôsu ya étune *nda é n'étyi, be nga mane fe dube or.

²² A nga mane dube *nda ése or. Ata'a metuna'a e mbe étune *nda é n'étyi, a nga yañe de or.

²³ Etune *nda é n'étyi été, a nga kôme Bekerubim bebaé a élé ôlivié; be mbe nkôñe yôp tañe menyi'i me mo awôm.

²⁴ Afabe da ya kérubim ôsu e mbe menyi'i me mo metan; afab avok menyi'i me mo metan; menyi'i me mo awôm, ataté aku'u ya afabe di a kui aku'u ya afab avok.

²⁵ Menyi'i me mo awôm asu kérubim baa; mebim a biyeka'a, bi too avale da asu Bekerubim bebaane.

²⁶ Kérubim ôsu a mbe nkôñe yôp, tañe menyi'i me mo awôm; nyô baa a mbe fe nkôñe yôp avale da.

²⁷ A nga telé Bekerubim e zañe *nda été. Bekerubim be nga ndamé mefabe map: afabe kérubim ôsu e nga nnambe mfin, a afabe kérubim baa e nga nnambe mfin ôvok; mefabe map mebaé, ma me mbe mfa'a ya zañe *nda, me nga nnambane dina a di avok.

²⁸ A nga dube Bekerubim a or.

²⁹ Mbôma'ane mimfin, été a atan, be nga kpwelé Bekerubim, mebua melen a mesam me ne nkulan.

³⁰ A nga yañe si e *nda été a atan.

³¹ Anyiine ya étune *nda é n'étyi, a nga bo bivine mimbé a élé ôlivié; mimbô'ô ya *mbé yôp, a bilé bi be'e évin bi nga di ngabe jia ya ngab étane ya *mbé ôse.

³² A nga kpwele Bekerubim, mebua m'alen a mesam me ne nkulan e bivine bibaé ya *mbé, nde fe a nga dube be a or; a nga dube or e Bekerubim a e mebua melen.

³³ Avale te fe a nga bo anyiine beta aba nda; bilé bi ôlivié bi be'e bivin bi nga di ngabe nyini ya ngume *mbé ôse,

³⁴ a bivine bibaé, mboon a élé Sipré; bifase bilé bibaé bia fô'ôsan, asu évine *mbé jia a bifase bilé bibaé bia fô'ôsan asu évine *mbé évok.

³⁵ A nga kpwelé Bekerubim mebua melen a mesam me ne nkulan a dube me or, ve ba'é bie *mbé ôte.

³⁶ Mvuse ya valé, a nga lôñe minseñe *nda été: minnoñe meko'o me ne kpwelan mila a nnoñe mimbôñe mi Sédre.

³⁷ Mbu nyini, ngone Ziv, nde be nga bôé mimbôka'a ya Nda Nti.

³⁸ A mbu awôm a wua, ngone Bul é ne ngone muame, Nda é nga man ése mfa'a ya mone jam ase a nga siliban. Solômon a nga lôñe je tañe mimbu zamgbwa.