1 Bb. 5 - Kalate Zambe Nnomo a Mfefe Mfefé Nkôñelan

¹ Solômon a nga jôô *meyoñ mese ataté ôsôé Efrat, si Befilisteñ, a kui nnéa Israél a Ejipte. Be nga ya'ane *toya a saane Solômon nté ôse a nga vee.

² Bidi bi Solômon bi mbe *môs ôse: avut e nji dañe nte'an tôn ébu; avut é ne nte'an abui tôn awôm a muam,

³ beyôm benyak be n'avoñ awôm. Beyôm benya'a ya mbam: mewôm mebaé; mintômba ntet; te lañe minkok, bemvin, besô a bilolé bi n'avoñ abui.

⁴ Amu a nga jôô mesi mese me nga bôman ôsôé Efrat, ataté Tifsa a kui Gaza, bejô bôte bese ya mesi ma bôman Efrat. Baa be mesi mese me nga bômane nye be mbe *mvo'é.

⁵ Yuda a Israél be nji bi jam da tyelé be minleme yôp, môt ase e ndi'i woone wé a e figié wé si, ataté Dañ a kui Birséba, nté ôse Solômon a nga vee.

⁶ Solômon a nga bili bitaba'a toyini mewôm menyin e vôme ya bikabela bia dutu bevagoñ bé bi ne tabe, nalé fe bewulu bikabela toyini awôm a ébaé.

⁷ Bengovina be nga ve biôm asu mba'alane njô bôte Solômon a bôte bese ba subu tawôlô njô bôte Solômon bebé, ngovina ase tañe ngone jia; be nji ke jô'é jôm éziñ é jemban.

⁸ Be nga soo fe bidi asu bikabela e vôm ase njô bôt a nga too avale be nga sili môt ase.

Anen, duma a fe'e njô bôte Solômon

⁹ Ane Zambe a nga ve Solômon fek, atyeñ, a ñyemane mevale meva, ane nselek ô ne nsa'a mañ.

¹⁰ Fe'e Solômon é nga lôte fe'e bone bese ya jôp da tôô a fe'e ése y'Ejipte.

¹¹ A nga dañe bôte bese fek, fek a dañ Etan ya Ezrahite, a dañ Eman, Alkol a Darda, bone be Mahol; *meyoñ mese ma bômane Israél, me nga yeme jôé dé.

¹² A nga ku minkana toyini éla, a téé fe bia toyini jia a bia bitan.

¹³ Fe'e nkobô jé é nga nnambe bilé, ataté Sédre ya Libañ, a kui izôp a faa mimfin; a nga kobô ajô betit be be'e mebo menyin, ajô anon, betit ba woñ a kos.

¹⁴ Bôt be nga wô'ô nkañete ya ajô fe'e Solômon be nga so be *meyoñ mese a be bejô bôte bese ya si a zu wô'ô fe'e jé.

Solômon ba Iram, njô bôte ya Tir ba bo élat Ngômesane ya lôñe Zambe nda

¹⁵ Iram njô bôte ya Tir, a nga lôme bebo bisaé bé be Solômon, amu a nga wô'ô na be teléya nye njô bôt éjian ésaa; amu Iram a nga ju'u zu a bo mvôé David.

¹⁶ Nde Solômon a nga lôm be kate Iram na:

¹⁷ Wo yeme na David, ésaa wom, a nji kui na a lôñe *nda asu jôé Nti, e Zambe wé, amu éndeñela'a besiñe bé be nga bômane nye, a bita, a nté ôse Nti a nji futi be akul abo dé si.

¹⁸ V'éyoñe ji, Nti, e Zambe wom, a veya ma awo'on mimfa'a mise, teke fe nsiñ nge bidim bia tyelé ma nleme yôp,

¹⁹ me bili nkômbane ya lôñe *nda asu jôé Nti, e Zambe wom, avale Nti a nga jô David ésaa wom na: Mone wôé, nyô ma ye toé éjiane jôé, éto njôane jôé, nye a ye lôñe *nda éte asu jôé dam.

²⁰ Ajô te éyoñe ji, va'a ngule na be tyi'i ma besédre ya Libañ: bebo bisaé bam ba ye fulan a bebo bisaé bôé; ma ye ve wo ma'ane bebo bisaé bôé, aval ese wo ye jô, amu wo yeme na teke môte ya be bia a yeme tyi'i bilé ane Besidônieñ.

²¹ Nné ane Iram a nga wô'ô nkobô Solômon, a nga vak abui a jô na: Nti a te ve David monafam a ne fe'e naa a jôô ézu'u bôte ji a bo'o ébotane den!

²² Iram a nga lôm be kate Solômon na: Me nyoñeya kalate wôé. Yaa, ma ye ve wo bilé bi Sédre a Sipré wo kômbô;

²³ bebo bisaé bam ba ye soo bie Libañ a kui mañ; ma ye ka'a bie mimbom bi yeñ e mañe yôp a kui vôm wo ye liti na, nne ma ye kuli bie valé a wo, wo ye kee bie. Mfa'a wôé, ma yi na, ô ve *nda jame bidi.

²⁴ Ajô te Iram a nga ve Solômon bilé bi Sédre a bi bi Sipré abim ese a nga kômbô.

²⁵ A Solômon a nga ve Iram mbu ôse, tône blé ésaman a lita mbon ôliv wo dañe mvaé, toyini muam asu bidi ya *nda jé.

²⁶ Nti a nga ve Solômon fek avale a nga jô nye. Mvo'é é mbe e zañe Iram a Solômon, nde bese be nga bo élat.

²⁷ Njô bôte Solômon a nga telé bisaé bi étibela'a Israél ase été. Bôte toyini mewôm mela be nga ke été.

²⁸ A nga lôme be Libañ, ngon ése bôte toyini awôm be mbe be fola'an, ngone jia e Libañ, ngon ébaé e menda map. Adoniram nye a mbe évete bisaé bite.

²⁹ Solômon a nga bili bebe'e *mekok toyini mewôme muam a bebôé *mekok toyini mewôme muam;

³⁰ te lañe bivete bengovina be Solômon, be nga telé asu ésaé: befame toyini éla a mintete mila be nga jôô bôt ba bo ésaé.

³¹ Njô bôt a nga bendé na, be ke ba fa'a beta *mekok, meko'o me ne mbaan asu mimbôka'a ya *nda, meko'o me n'anen.

³² Bebo bisaé be Solômon, e ba be Iram a ba be Gébal be nga ba, a kôme bilé a *mekok asu nlôñane *nda.