1 Bb. 21 - Kalate Zambe Nnomo a Mfefe Mfefé Nkôñelan

Afube mindi'i Nabot. Akab a minga wé, bewôé bôt

¹ Eyoñe mam mete me maneya, avale di nde e nga kui. Nabote ya Yizrél a nga bili afube mindi'i Yizrél e fefele ndaa Akab, njô bôte ya Samari.

² Akab a nga kobô Nabot na: Va'a ma afube mindi'i dôé, me bo de afube bijebejeba, amu e ne bebé a *nda jam. Ma ye ve wo afube mindi'i afe, e too abeñ a dañe dili; nge na, nge wo yene nalé mvaé, ma ye ya'ane tañe moné y'été.

³ Ve Nabot a nga yalan Akab na: Zambe a ba'ale'e me na me bo te ve wo éli'i b'ésaa bam!

⁴ Ane Akab a nga bulane *nda jé éyôé a ayo'o *nlem amu mejô Nabot ya Yizrél a nga jô nye na: Ma ye bo te ve wo ngab éli'i b'ésaa bam! A nga bômbô énoñe jé, a kôñelan asu, a tabe teke di jôm.

⁵ Minga wé Yézabél a nga zu fefele jé a jô nye na: Amu jé ô n'éyôé a teke di jôm'

⁶ A nga yalane nye na: Ma te kobô Nabot ya Yizrél a jô nye na: Va'a ma afube mindi'i dôé a tañe moné; nge na, nge wo kômbô, ma ye ve wo afube mindik afe éjiane ya dili. Ve a te jô na: Ma ye bo te ve wo afube mindi'i dam!

⁷ Nde minga wé, Yézabél a nga jô nye na: Ye wo fo'o ô bili éjôé Israél éyoñe ji? Kôlô'ô si, ja'ak e *nlem ô bôô si; ma ma ye ve wo afube mindi'i Nabot ya Yizrél.

⁸ Ane a nga tili bekalate jôé Akab, e bekalate, a nga futi *sitam Akab. A nga lôme be e be bemvendé, a e be betyi'i mejô be nga too tisone jia baa be Nabot.

⁹ A nga tili bekalate été mejô mana na: Yôta'ane ntyiane bidi; mi tooé Nabot ôsu ya bôt,

¹⁰ mia ye tooé zesé bôt ébaé be lôô nye asu; ba ye bo'olô nye na: Ô nga yo'é Zambe a njô bôt! Wôna kelane nye atan, lumane nye *mekok a a wo'ok!

¹¹ Ane bôte ya tisone Nabot, bemvendé a betyi'i mejô be nga too tison, be nga bo ane Yézabél a nga lôm be kate be, avale jam e mbe ntilane bekalate a nga lôme be e mbe.

¹² Be nga yôtane *ntyiane bidi, be ke tooé Nabot ôsu ya bôt.

¹³ Zesé bôt ébaé é nga zu tabe nye ôsu, a zesé bôt éte é nga bo'olô Nabot ôsu ya bôte na: Nabot a nga yo'é Zambe a njô bôt! Nde be nga kee nye tison atan; ane be nga lume nye *mekok a ane a nga wu.

¹⁴ Be nga lôme be kate Yézabél na: Be lumeya Nabot *mekok a a wuya.

¹⁵ Eyoñe Yézabél a nga wô'ô na be maneya lume Nabot *mekok a a wuya, a nga jô Akab na: Kôlô'ô si ô nyoñ afube mindi'i Nabote ya Yizrél, nyô a nga bene ve wo de, a tañe moné; amu Nabot a nji fe bo ényiñe ji, a wuya.

¹⁶ Eyoñe Akab a wô'ôya na Nabot a wuya, a nga kôlô si a ke afube mindi'i Nabote ya Yizrél na a nyoñe de é bo éndéé.

¹⁷ Ane ajô te e nga zu b'Elie mone Tisbite na:

¹⁸ Kôlô'ô si, kele tôban Akab, njô bôte ya Israél a ne Samari; nye le a ne afube mindi'i Nabot, e vôm a ndôme zu na a nyoñe de e bo éndéé! Wo ye jô nye na: Jia? Ô wôéya môt ô bo fe évamban!

¹⁹ A wo ye jô nye na: Avale di nde Nti a kobô na: E vôm émien bemvu be nga nyiane metyi me Nabot, bemvu ba ye fe nyiane metyi môé womien.

²⁰ Ane Akab a nga jô Elie na: Ye ô zuya koone ma a nsiñe wom? Elie a nga yalane nye na: Me zuya koone wo, amu ô kuaneya womien asu ya bo jam e n'abé e mise me Nti.

²¹ Ma nyô, ma ye zuu mbia jame be wo; ma ye vose wo, ma ye vaa to'o na nyô a dañe tyôtyoé be ba bese be ne ba b'Akab, nyô ba bi a nyô ba suu Israél.

²² A ma ye bo *nda jôé é funane ndaa Yérôbôam, mona Nébat, a ndaa Baésa, mona Ahiya, amu ô boya na, me wô'ôlun a bo na Israél a bo *abé.

²³ Nti a kobôya fe ajô Yézabél a a jôya na: Bemvu ba ye di Yézabél bebé aka'a Yizrél.

²⁴ Môte ya bôte b'Akab a ye wu tison été, bemvu ba ye di nye a nyô a ye wu afan, anone ya yôp da ye di nye.

²⁵ Môte mfe a nji kuan émien ane Akab, asu ya bo mam me n'abé e mise me Nti, a Yézabél, e minga wé a nga tindi nye a bo nalé.

²⁶ A nga bo mboon wo dañ angôndô, nkabetane bengunemelan aval ane Beamorééñ Nti a nga titan ôsu bone b'Israél be nga bo.

²⁷ Eyoñ Akab a maneya wô'ô mejô m'Elie, a nga nyabe mengômesane mé, ve jaé nkuta nyô a tyi bidi; a mbe a bômbô'ô si a be'e nkuta te, a wulu'u fe ôte'etek.

²⁸ Ane ajô Nti é nga zu be Elie, mone Tisbite na:

²⁹ Ye ô yeneya ane Akab a sili émiene si asu dam? Amu a siliya émiene si asu dam, ma ye bo te zuu bidim éyoñ a vee, v'éyoñe melu me mone wé, nje ma ye zuu bidim e *nda jé.