1 Bb. 2 - Kalate Zambe Nnomo a Mfefe Mfefé Nkôñelan

David a ve Solômon mebendé

¹ Eyoñe melu David a nga yiane wu me nga bo bebé, a nga bendé Solômon e mone wé na:

² Me nga ke e zene si ése ja ke, ajô te yeme ngu, nalé fe na bo'o fam!

³ Ba'ale'e minjôane mi Nti, e Zambe wôé; wulu'u e mezene mé; ba'ale'e mebendé mé, miñye'elane mié a metiñe mé avale me ne ntilan e kalate metiñe me Môze, nalé e jam ese wo bo nge kak da ye wulu *mvo'é.

⁴ A Nti a ye tôé mejô mé a nga kobô me na: Nge bone bôé ba ye ba'ale mezene map a wulu e bebela été e mise mam a minleme miabe mise, a binyiñe biabe bise, teke na môte wua ya bôte bôé a ye jembane tabe éto njôane ya Israél.

⁵ Wo yem e jame Yôab e mone Séruya a nga bo ma, e jam a nga bo bivete mewosane bibaé y'Israél, Abnér e mone Nér a Amasa e mone Yéter. A nga wôé be. A nga kuli metyi ya bita éyoñe *mvo'é, a a nga futi metyi bita e kandé é nga tii nye angeteñ a e be Silifas be nga too nye mebo.

⁶ Wo ye bo aval'ane fe'e jôé é né, ve te jô'é na éfumulu ésile jé é siliki *mvo'é e vôme ya miñwuan.

⁷ Ve wo ye mvamane bone be Barsilayi ya Galad; ba yiane bo e nsamba ya ba ba di tawôlô wôé, amu be nga zu be ma a mbamba *nlem éyoñ me nga tube monyoñe Absalom.

⁸ Ve tame yene fefele jôé: Siméyi e mone Géra, mone Bényaminite ya Bahurim, a nga yo'é ma mbia ñyo'on e môse me nga ke Mahanayim; v'a nga zu tôbane ma e Yordan. Ajô te me nga kane nye ngana, me kala'ane Nti na: Ma ye bo te wôé wo a nkpwaté mekôn.

⁹ V'éyoñe ji, te nyoñe nye ane môt a ne te bijô, amu ô ne môt a ne fek; wo ye yem e jam wo yiane bo nye; wo ye bo na éfumulu ésile jé é siliki vôme ya miñwuan e metyi été.

¹⁰ Ane David a nga bômbô baa b'ésaa a jambe e tisone David.

¹¹ David a nga jôô Israél tañe mimbu mewôm menyin; a nga jôô mimbu zamgbwa Ebroñ a mimbu mewôm mela a milaa e Yérusalém.

Solômon a bo na be wôé Adôniya, Yôab a Simeyi

¹² Ane Solômon a nga tabe éto njôane David ésaa wé a éjôé jé é nga dañe yeme ngu.

¹³ Adôniya, e mone Agit a nga zu koone Batséba nyia Solômon. Batséba a nga sili nye na: Ye wo zu mbamba nzuan? Adôniya a nga yalane nye na: Mvo'é!

¹⁴ Adôniya nye na: Me bili ajô ya kate wo. Batséba na: Kobô'ô!

¹⁵ Adôniya na: Womien wo yeme na éjôé é mbe énjam, a Israél ase a nga lôô ve ma na me bo njô bôt. V'éjôé é lumeya ma mvus a é keya be mojañ; a maneya nyoñe je amu nkômbane Nti.

¹⁶ Eyoñe ji me bili ve jame da ya sili wo; te titane ma. Batséba a nga jô nye na: Kobô'ô!

¹⁷ Adôniya na: Ma ye'elane wo, jô'ôk e njô bôte Solômon, ma buni na aa ye ke titane wo na: A ve ma Abisag, ngone Sunamite, a bo minga wom.

¹⁸ Batséba a nga yalane na: Mvo'é! Mamien ma ye kobô njô bôt ajô dôé.

¹⁹ Ane Batséba a nga nyiine be njô bôte Solômon na, a kobô nye ajô Adôniya. Njô bôt a nga tebe tetele a ke tôbane nye a vitibi ôsu vié; nd'a nga beta tabe éto njôane jé a bo fe na be telé éto éfe asu nyia njô bôt; ane nyia a nga tabe si e mbo nnôme wé.

²⁰ A nga jô Solômon na: Ma kômbô sili wo mone jam; te titane ma. Njô bôt a nga yalane nye na: Sili'i a nyia wom! Maa ye ke titane wo.

²¹ Nye na: Ye be ne fo'o ve monyoñ Adôniya Abisag, ngone Sunamite a bo minga wé'

²² Ane njô bôte Solômon a nga yalane nyia na: Amu jé wo sili Abisag, ngone Sunamite asu Adôniya? Ke wo yiane jibi sili éjôé asu dé amu a ne mojañe *mvendé! Asu dé, asu *ntuni Abiatar, asu Yôab e mone Séruya!

²³ Njô bôte Solômon a nga kalane Nti a jô'ô na: Zambe a bo'o ma avale di, nalé fe avale dili! Asu ya kuan ényiñe jé, nde Adôniya a te kobô mejô mete.

²⁴ Eyoñe ji, ane Nti a vee, nyô a nga yemete ma a tooé ma éto njôan ésaa wom David a e Nye fe a teléya ma ngume *nda bôt bejôô avale a nga jô, e môse wu ôbien Adôniya a ye wu!

²⁵ Ane njô bôte Solômon a nga lôme Benayahu, e mone Yehoyada a ke wôé nye. Nde Adôniya a nga wu.

²⁶ Wôna njô bôt a nga jô *ntuni Abiatar na: Kele Anatôt, e vôm bifuse bi si biôé bi né, amu ô ne e môt a yiane wu; ve maa ye ke wo wôé môse wu amu ô nga be'e éwolo Nti Zambe ôsu David, ésaa wom, a jibi e mam mese a nga jibi mia nye.

²⁷ Ane Solômon a nga vaa Abiatar bisaé bi *ntuni Nti; nalé mejô me Nti a nga kobô ajô ndaa Eli e Silô ma ye tôéban.

²⁸ Ane foé ya jame te é nga kui be Yôab. Yôab a nga ke ngame Adôniya ve saa ngame Absalom. Ajô te a nga ke sobô e Nda éndelé Nti a bi minla'a mi ata'a metuna'a.

²⁹ Nde be nga kate njô bôte Solômon na: Yôab a keya sobô e *nda éndelé Nti; a ne e fefel ata'a metuna'a. Ane Solômon a nga lôme Benayahu e mone Yehôyada a jô nye na: Kele wôé nye.

³⁰ Nde Benayahu a nga nyiine *nda éndelé Nti a jô Yôab na: Avale di njô bôt a jô na: Kui atan! Ve Yôab a nga yalane na: Momo! Nne ma ye wu va. Ane Benayahu a nga kate njô bôt avale Yôab a nga kobô a yalan.

³¹ Nde njô bôt a nga jô nye na: Bo'ok aval a te jô: kpwa'a nye yôp a wo ye jame nye. Nalé wo ye vaa ma a *nda bôt ésaa wom étome ya metyi Yôab a nga kuli teke amu.

³² Nti a bula'ane sôôé metyi mé e nlô wé ôbiene yôp, amu a nga wôé bôte bebaé be mbe *zôsôô a mbamba be bôt a dañe nye, a nga wôé be a nkpwaté mekôn David ésaa wom teke yem; bôte bete be mbe na: Abnér e mone Nér, évete mewosane ya Israél a Amasa e mona Yéter, évete mewosane ya Yuda.

³³ Metyi map me sôéban e nlô Yôab a e nlô mvoñe bôte jé nnôm éto! Ve mfa'a David a e mvoñe bôte jé, e mfa'a *nda bôte jé a éto njôane jé ébotan ja ye tabe été nnôm éto é so'o be Nti.

³⁴ Ane Benayahu e mone Yehôyada a nga bet a ku Yôab yôp a wôé nye; be nga jame Yôab e *nda jé é mbe e *nkôte si.

³⁵ Njô bôt a nga telé Benayahu, e mone Yehôyada, évete ya nkane bita éjiane Yôab a telé fe *ntuni Sadok éjiane Abiatar.

Solômon a bo na Simeyi a wu

³⁶ Ane njô bôt a nga lôm be ke loone Siméyi a jô nye na: Lôñe womiene *nda e Yérusalém; wo ye tabe été teke kui mfa'a ya li nge li.

³⁷ Nge da kui *môs éziñ na wo kui atan a dañe mbi'ili Sédroñ, yeme na wo ye wu teke selan; a metyi môé ma ye sôéban e nlô wôé womiene yôp.

³⁸ Nde Siméyi a nga jô njô bôte na: Nkobô te ô n'abeñ. Avale masa wom njô bôt a maneya jô, avale te mbo ésaé wôé a ye bo; ajô te Siméyi a nga tabe ayap e Yérusalém.

³⁹ V'éyoñe mimbu mila mi lôteya, bebaé ya bebo bisaé be Siméyi be nga tup a ke be Akis e mone Maaka, njô bôte ya Gat; be nga kate Siméyi jame te na: Bebo bisaé bôé be ne e Gat.

⁴⁰ Nde Siméyi a nga kôlô si a dañ éjakase yôp a ke e Gat be Akis, asu ya nyoñe bebo bisaé bé. Simeyi a nga bo ve meke a meso ya bulane soo bebo bisaé bé Gat.

⁴¹ Ane be nga kate Solômon na, Siméyi a nga kôlô Yérusalém na a ke Gat a soya fe.

⁴² Nde njô bôt a nga loone Siméyi a jô nye na: Ye me nji bo wo na ô kalane Nti a ve wo ayemé na: Môse wo ye kui atane tison a ke avale vôm ese ô ne ke tuka'a yeme na wo ye wu teke selan'

⁴³ Amu jé ô nji ke semé ngana ô nga kan ôsu Nti, nalé fe abendé me nga ve wo'

⁴⁴ Wôna njô bôt a nga jô Siméyi na: Womien wo yem, a e nleme wôé fe wo yem *abé ese ô nga bo David ésaa wom; ajô te Nti a bo na mboone *nkpwala wôé ô ku e nlô wôé womien.

⁴⁵ Ve njô bôte Solômon a ye nyoñ ébotan a éto njôane David ja ye yeme ngu nnôm éto ôsu Nti.

⁴⁶ Ane njô bôt a nga lôme Benayahu e mona Yehôyada nd'a nga kui atan, a kpwelé Siméyi yôp nye ve wu. Avale di nde njôan ô nga yeme ngu e mo me Solômon