1 Bb. 19 - Kalate Zambe Nnomo a Mfefe Mfefé Nkôñelan

Elie a ke nkôl Oréb

¹ Ane Akab a nga Kañete Yézabél mam mese Elie a nga bo, ane a nga wôé bekulu mejô be *baal bese.

² Nde Yézabél a nga lôme *nlôman b'Elie be kate nye na: Bezambe be bo'o ma jame di, be beté fe dili, nge a akiti, aval awolo di, me boo te bo ényiñe jôé e jam ô nga bo ényiñe wua ase ya be be.

³ Eyoñ Elie a nga yene nalé, a nga kôlô si a ke na a kaman ényiñe jé. A nga kui Birséba ya Yuda, ane a nga li'i mbo ésaé wé valé.

⁴ Emien a nga ke *nkôte si tañe dulu ngume môs; a nga tabe élé jenéé si a sili awu a jô'ô na: E dañeya! A Nti, éyoñe ji, nyoñ ényiñe jam, amu me nji bo *mvo'é a dañe b'ésaa bam.

⁵ A nga bômbô si *a ke ôyo élé yenéé si. Ane éngele a nga nnambe nye a jô nye na: Kôlô'ô si a di.

⁶ Ane a nga fombô a yen abôla'a nlô dé, éwôlé é bete meko'o me n'ayôñe yôp a nde'e mendim. Nde a nga di a nyu, a beta fe bômbô si.

⁷ Engele Nti a nga beta zu éyoñe baa, a nnambe nye a jô na: Kôlô'ô si a di amu zene dulu ja yiane bo ayap asu dôé.

⁸ A nga kôlô si, ve di a nyu; a amu ngule bidi bi bi nga ve nye, a nga wulu melu mewôm menyin a môse mewôm menyin a ke kui e nkôle Zambe, Oréb.

⁹ Oréb wé, a nga nyiin e beta ako'o été a bômbô valé. Eyoñe te ajô Nti e nga zu be nye na: Wo bo jé va a Elie'

¹⁰ Nye na: Me maneya ve ngule jam ése asu Nti, Zambe ya minsamba mewosan; amu bone b'Israél be maneya ben élate jôé, be maneya tyam meta'a metuna'a môé, be maneya wôé bekulu mejô bôé a meyo me nkpwaté mekôn, me li'iya ve ma étam, ba jeñe fe na be nyoñ ényiñe jam.

¹¹ Nti a nga jô na: Kui atan a tebe nkôle yôp asu be Nti! Ane Nti a nga lôt; beta ngul évuñulu é nga nyabe minkô a sale mekôm asu be Nti; Nti a nji bo évuñulu été. Eyoñ évuñulu é lôteya, mfô'ôsane si ô nga bo; Nti a nji bo e mfô'ôsane si été.

¹² Mvuse mfô'ôsane si, nduan; ve Nti a nji bo e nduan, e mvuse nduan nje ñhe abeñ a évôvoé *tyiñ é nga so.

¹³ Eyoñ Elie a nga wô'ô je, a nga solé asu a alô'ô dé, a nga kui atan a tebe anyiine ya beta akok. Ane *tyiñ é nga jô nye na: A Elie, wo bo jé va'

¹⁴ Nye na: Me maneya ve ngule jam ése asu Nti, Zambe ya minsamba mewosan; amu bone b'Israél be maneya ben élate jôé, be maneya tyam meta'a metuna'a môé, be maneya wôé bekulu mejô bôé a meyo me nkpwaté mekôn, me li'iya v'étam étam, ba jeñe fe na be nyoñ ényiñe jam.

¹⁵ Nti a nga jô nye na: Kelek a tyii e zene ya *nkôte si a kui Damas; éyoñ ô kuiya, wo ye wo'o Azaél mbon ane njô bôte ya Siri.

¹⁶ Wo ye wo'o Yéhu, e mona Nimsi mbon ane njô bôte ya Israél, a wo ye wo'o Elizé mona Safat ya Abél-Mehôla mbon ane *nkulu mejô éjiane jôé.

¹⁷ A ye bo na môt a ye tube nkpwaté mekône Yéhu, Azaél a ye wôé nye; môt a tube nkpwaté mekône Yéhu, Elizé a ye wôé nye.

¹⁸ Ve ma ye li'i bôte toyini zamgbwa Israél été, ba bese be ngenan te kute *baal meboñe si nge latane nye anyu.

Elizé a ye tyendé Elie

¹⁹ Ane Elie a nga kôlô valé a koon Elizé, e mone Safat a senane si. Benya'a mewôm mebaé a benyin be mbe ny'ôsu, a nga bili bebaé fefele jé. Ane Elie a nga lôte nye bebé a wua alô'ô dé be nye.

²⁰ Ane Elizé a nga li'i benya'a bé, a nga tôñ Elie mbile mvus a jô na: Ma taté ke ya'an ésaa wom a nyia wom, éyoñe te ma ye tôñe wo. Elie a nga yalane nye na: Kelek a bulan, amu jam ma te bo wo.

²¹ Eyoñ a keya Elie ôyap, éyoñe te a nga bulane zu nyoñe benya'a bebaé, a ve be bityi'a; a nga yame minsône miap a bilé benyak be nga tii, a ve mie bôt be di. Eyoñe te a nga kôlô si, ve tôñe nye a saane nye.