1 Bb. 17 - Kalate Zambe Nnomo a Mfefe Mfefé Nkôñelan

Nkulu mejô Elie a kate ajô mfum

¹ Elie mone Tisbite, wua ya bôt be nga too e Galad, a nga jô Akab na: Ane Nti a vee, Zambe ya Israél, Nyô ma Saane nye, melok nge mveñ bia ye bo te bo mimbu, vengevenge ve ma ma sili bie.

² Ajô Nti e nga zu be Elie na:

³ Kôlô'ô va ô ke mfa'a jôp da tôô, a sobô mfôm ôtôñe Kérit ô ne Yordan mfa'a jôp da tôô.

⁴ Eyoñe te wo ye bo nguleya nyu mendime y'ôtôñ a me bendéya bimgbwañ na, bi ve wo bidi wé.

⁵ Ane a nga ke a bo avale Nti a nga kobô nye; a nga ke tabe mbi'ili ôtôñe Kérit ô ne Yordan, mfa'a jôp da tôô.

⁶ Bimgbwañ bi mbe bi va'a nye belet a tit mametyé, belet a tit mamengô'é; a mbe a nya'a mendime ya ôtôñ.

⁷ Eyoñe melu me lôteya, ane ôtôñe ô nga vele, amu mveñ é nji ke fe noñ.

⁸ Ane ajô Nti e nga zu be nye na:

⁹ Kôlô'ô si ô ke Sarépta ya Sidoñ, wo ye tabe wé; me bendéya nkuse minga wé na ô ve wo bidi.

¹⁰ Ane a nga kôlô si a ke Sarépta a suan anyiine tison. Nkuse minga ô nga too valé ô kô'ane nja'a. A nga loone wô a jô na: Ma ye'elane wo na, ô ke jeñe ma ayôme mendime ndek me nyu!

¹¹ Ane a nga ke jeñe me. A nga beta loone nye a jô nye na: Ma ye'elane wo na: Kele jeñe ma éfuse belet e wo wôé été!

¹² Minga a nga yalane na: Ane Nti, e Zambe wôé a vee! Me nji bi jôm é too nkôman, me bili ve doé avut e vie'e été, a ôyôme mbon e ndek; éyoñ me maneya to'é bifuse bi nja'a, ma ye bulane ke yame biôme bite asu dam a mone wom; bia ye di bie, mvus éte bia ye wu.

¹³ Elie a nga jô nye na: Te ko woñ; bula'an a bo jam wo te jô; ve da taté'é yame ma mon éwôlé a biôm ô bili éyoñe te wo zu ve ma je; wo ye su'ulane yam asu dôé a nyômon.

¹⁴ Amu avale di nde Nti, Zambe ya Israél a jô na: Vie'e avut wo ye bo te bo ékôkoé, Nde'e mbon ja ye bo te vele, akekui môse Nti a ye noo mveñe *si nyô.

¹⁵ Ane a nga ke, a bo aval Elie a nga jô; a nga di, émien, Elie a *nda bôte jé melu melu.

¹⁶ Vie'e avut ô nji bo ékôkoé, a nde'e mbon é nji vele, avale Nti a nga kobô anyu b'Elie.

¹⁷ Eyoñe mam mete me maneya, mona nkuse minga, mmie ndaa, a nga kon. Ôkone wé ô mbe étua ngul abui, teke fe nguleya kuli mvebe.

¹⁸ Ane a nga jô Elie na: Bia wo bi ne za ajôô, a môta Zambe? Ye ô nga zu be ma a bo me na me simesan *abé me nga bo, a wôé fe ma mon'

¹⁹ Elie a nga yalane nye na: Ke'e ma mone wôé! Ane a nga nyoñe nye e mo me minga, ve be'e nye a kee nye étune *nda ya yôp, vôm a nga too, a bôôé nye énoñe jé.

²⁰ Nde a nga ye'elane Nti a jô na: A Nti, e Zambe wom, ye wo yi *abé e be nkuse minga me zuya bo *ntabe nda jé, éyoñe wo kañese na mone wé a wu'

²¹ Nde Elie a nga butubu mongô yôp biyoñ bilaa a jô'ô na: A Nti, e Zambe wom, kañese'e na mvebe mongô nyô ô beta zu be nye.

²² Ane Nti a nga wô'ô *tyiñ Elie, ane mvebe mongô ô nga beta zu be nye, ane a nga nyiñ.

²³ Ane Elie a nga nyoñe mongô a sise nye *nda si a so'o étune ya yôp, a kee nye nyia; Elie na: Yenek! Nyô mon a nyiñeya.

²⁴ Minga a nga jô Elie na: Yaa, éyoñe ji me yemeya na, ô ne môta Zambe a na, ajô Nti e ne fo'o wo anyu.