1 Bb. 16 - Kalate Zambe Nnomo a Mfefe Mfefé Nkôñelan

¹ Ajô Nti e nga zu be Yéhu mon Anani ajô Baésa na:

² Amu me nga bete wo mbuluk a telé wo évete ya bôte bam Israél, ve ô nga viane wulu e zene Yérôbôam a dutu bôte bame na, be bo *abé a kui vôme ya ve ma ôlune *nlem a mboon *abé wobe te,

³ ajô te ma ye vose Baésa a *nda jé ése, a ma ye bo *nda jôé ane ndaa Yérôbôam mona Nébat.

⁴ Môt ase ya ndaa Baésa a ye wu e tison, bemvu ba ye di nye, a e môt ase ya *nda jé a ye wu afan, anone ya yôp da ye di nye.

⁵ Mimboon Baésa mivok, jam a nga bo, ndañane wé, ye mam mete me nji bo ntilan e kalate minkañete bejô bôte y'Israél'

⁶ Baésa ba b'ésaa be nga bômbô vôme wua a be nga jame nye Tirsa. Mone wé Ela a nga jôô éjiane jé.

⁷ Nti a nga kobô fe Baésa a *nda jé anyu *nkulu mejô Yéhu: amu *abé ese a nga bo e mise me Nti a ve nye ôlune *nlem a mboone ya mo mé, ô funa'an ane wu ya ndaa Yérôbôam, a amu fe a nga mane jiane ndaa Yérôbôam éte.

Ela, njô Bôte y'Israél

⁸ Mbu mewôm mebaé a saman Asa a nga jôô Yuda, ñwô Ela, mona Baésa, a nga tebe njôô bôte ya Israél e Tirsa, tañe mimbu mibaé.

⁹ Mbo ésaé wé Zimri, évet éfase bevagoñe jia a nga bôndé fe'e ya wôé nye. Njô bôt a nga too éyoñe te e Tirsa a wo'o bilam e ndaa Arsa évete ya ndaa njô bôt.

¹⁰ Ane Zimri a nga nyiine *nda, ve bibi Ela a wôé nye, jame te e nga bobane mbu mewôm mebaé a zamgbwale Asa a mbe njô bôte ya Yuda; ane a nga jôô éjiane jé.

¹¹ Nné ane a nga tebe njôô a tab'éto njôan, a nga wôé ndaa Baésa ése, teke li'i fam, nge évuvuman nge mvôé.

¹² Zimri a nga jiane ndaa Baésa ése avale Nti a nga kobô anyu *nkulu mejô Yéhu ajô Baésa,

¹³ ajô *abé ese Baésa a nga bo, di Ela, di mone wé, *abé a nga bo a di a nga dutu Israél na a bo, a kui vôme ya ve Nti, e Zambe Israél ôlune *nlem, amu zesé bengunemelane jap.

¹⁴ Mimboon mi Ela mivok, jam ese a nga bo, ye mam mete me nji bo ntilan e kalate minkañete bejô bôte y'Israél'

Zimri, njô bôte ya Israél

¹⁵ Mbu mewôm mebaé a zamgbwale Asa a nga jôô e Yuda, ñwô Zimri a nga tebe njôô ya Israél e Tirsa tañe melu zamgbwa; éyoñe te bôt be wosa'ane Gibetone Befilisteñ.

¹⁶ E bôt be nga wosane Gibeton be nga wô'ô foé na: Zimri a kpwéya éjôé, a wôéya fe njô bôt. Eyoñe te *môs ôte ôbien, e minkan, Israél ase a nga telé Omri, évete ya nsamba, ane njô bôte ya Israél.

¹⁷ Eyoñe te Omri a Israél ase be nga kôlô Gibeton a dili Tirsa bita.

¹⁸ Eyoñe Zimri a nga yene na tison é nyoñebaneya, a nga nyiin ôleme ya ndaa njô bôt; a nga di'i ndaa njô bôt e nyôle jé ébien a wu.

¹⁹ Nalé a nga kui amu *abé a nga bo, *abé a nga bo a di a nga dutu Israél na a bo.

²⁰ Mimboone mi Zimri mivok a nkpwéan a nga kpwé éjôé, ye mam mete me nji bo ntilan e kalate minkañete bejô bôte ya Israél'

²¹ Eyoñe te bôte ya Israél be nga kandane ngam ébaé: ngame jia é nga ke mvuse Tibni mona Ginat na, be telé nye njô bôt; ngame fok é nga tôñe Omri.

²² Bôt be nga tôñe Omri be nga dañe ba be nga tôñe Tibni, mona Ginat. Ane Tibni a nga wu a Omri a nga tebe njô bôt

Omri njô bôte ya Israél

²³ Mbu mewôm melal a wua, Asa a nga jôô Yuda, ñwô Omri a nga tebe njô bôte ya Israél tañe mimbu awôm a mibaé. A nga jôô mimbu misaman e Tirsa.

²⁴ Eyoñe te a nga kuse nkôle Samari Sémer tañe betalañ be argent bebaé. A nga yemete nkôle Samari a yôlé tison a nga lôñe na Samari, jôé te e nga so e di môt a mbee nkôl Sémer.

²⁵ Omri a nga bo mam me n'abé e mise me Nti. A mbe angôndô ya mbia môt a dañe bejôô bese be mbe nye ôsu.

²⁶ A nga tôñe Yérôbôam mone Nébat mezene mese, a nga vu *abé ese a nga bo a di a nga dutu Israél na a bo a kui vôme ya tuli Nti e Zamba Israél amu zesé bengunemelane bap.

²⁷ Mimboon mi Omri mivok, mam a nga bo, biyoñ a nga dañ, ye mam mete me nji bo ntilan e kalate minkañete bejô bôte ya Israél'

²⁸ Ane Omri baa b'ésaa be nga bômbô vôme wua a be nga jame nye Samari. Mone wé Akab a nga jôô éjiane jé.

Akab, njô bôte ya Israél

²⁹ Akab, mona Omri, a nga tebe njô bôte ya Israél mbu mewôme lale a muame Asa a nga jôô e Yuda. Akab, mona Omri a nga jôô Israél mimbu mewôm mebaé a mibaé e Samari.

³⁰ Akab, mona Omri, a nga bo mam me n'abé e mise me Nti a dañe bôte bese be mbe nye ôsu.

³¹ Amu a nga yene mvuane ya vu *abé Yérôbôam mona Nébat ane mone jam, nde a nga beté ôdo'é a nlu'ane Yézabél, ngone Etbaal, njô bôte Besidônieñ; a nga ke saane Bebaal a kute be meboñe si.

³² A nga lôñ ata'a metuna'a asu *baal e *nda a nga lôñe nye Samari.

³³ Akab a nga telé akôn ôzezambe; a nga ke ôsu a bo mame ya ve Nti, e Zambe Israél ôlune *nlem a dañe bejô bôte bese y'Israél be mbe ny'ôsu.

³⁴ Melu mé, Hiél ya Bétél a nga lôñe Yérikô; A nga ve Abiram, ntôle monafame wé asu ya bô'ô mimbôka'a ya Yérikô; avale te fe a nga ve Segub, mesu'ulan me mone mé, asu ya tyelé mimbé ya Yérikô, avale Nti a nga kobô Yasua mona Nun.