Biblia Todo Logo
Bìoball air-loidhne

- Sanasan -

1 Bb. 14 - Kalate Zambe Nnomo a Mfefe Mfefé Nkôñelan


Nga Yérôbôam a * nkulu mejô Ahiya
(1 Bb 15:25-30; Yas 23:15; Sam 78:58-59 )

1 Melu mete, Abiya, e mone Yérôbôam, a nga kon.

2 Ane Yérôbôam a nga jô ngale na: Wo ye kôlô si a jaé biôm avale ba ye bo te yeme wo na ô ne minga Yérôbôam wôna kelek e Silô. Ô lôô *nkulu mejô Ahiya a ne wé; nye a nga jô ajô dame na, ma ye bo njô bôte ya ayoñe di.

3 Nyoñe belet awôm, biwôlé a nde'e wôé, kele nyiine be nye; a ye kate wo jam da ye kui be mon.

4 Ane nga Yérôbôam a nga bo nalé, a nga kôlô si a ke Silô, a nyiine ndaa Ahiya. Ahiya a mbe te fe nguleya yen, amu mise mé me nga beme vôme wua amu nnôm.

5 Nti a nga jô Ahiya na: Tame yene nga Yérôbôam, a zu yene wo ajô mone wé amu a kon. Wo ye kobô nye avale di a avale di. Eyoñ a ye so, a ye yené ane minga mfe.

6 Eyoñ Ahiya a nga wô'ô éduñe ya mebo mé, éyoñ a nga nyiine *mbé, a nga jô na: Nyi'in a nga Yérôbôam; amu jé mboone te? Wo kômbô yené ane minga mfe! Me ne nlômane be wo me bili foé ja ve nleme mintaé.

7 Kelek a jô Yérôbôam na: Avale di nde Nti, e Zambee Israél a jô na: Me nga bete wo ézezañe bôt, a telé wo évete ya bôte bam Israél,

8 me nga wôlé éjôé e *nda bôte David a ve wo je. Ve ô nji ke bo ane mbo ésaé wom David, nye a nga ba'ale mebendé mam a timbi a ma a *nlem wé ôse na, a bo fo'o ve jam e ne *zôsôô e mise mam.

9 O boya *abé a dañe bôte bese be mbe wo ôsu, ô keya bo womiene bezambe befe a bengunemelan be ne mboon a ékpwembé é ne nyeman na me wô'ôlun, a ô wuaya ma e mvuse jôé.

10 Ajô te ma ye zuu bidim e *nda bôte Yérôbôam; ma ye vaa befam e be Yérôbôam, ja'ana ba be ne alo, nge ba be ne fili Israél été; ma ye vose mvoñe bôte ya ndaa Yérôbôam ane ba vos akun ne meñ.

11 Môt ase ya *nda bôte Yérôbôam a ye wu tison, bemvu ba ye di nye; a môt ase y'été a ye wu afan, anone ya yôp da ye di nye, amu Nti a kobôya.

12 Mfa'a wôé, kôlô'ô si a bulane *nda jôé; éyoñe mebo môé ma ye tebe tison, mon a ye wu.

13 Israél ase a ye be'e meyep asu dé, a ba ye jame nye, amu nye étam a ye jambe soñ e *nda bôte Yérôbôam ése; amu e be nye étam, e *nda bôte Yérôbôam ése, nye Nti, e Zambee Israél, a yeneya jam éziñ é ne mvaé.

14 Nti a ye telé Israél njô bôt, a ye vaa *nda bôt Yérôbôam. Jame te da ye bobane den. Jia? Ke éyoñ ébiene ji!

15 Nti a ye bibi Israél; da ye kui be nye ane nkaé wo kebelane mendim. A ye vaa Israél e mbamba si a nga ve b'ésaa a a ye mialane nye ôsôé Efrate yat, amu be nga ba mekôn m'azezambe map, a ve Nti ôlune *nlem a mboone wop.

16 A ye kuan Israél amu minsem Yérôbôam a nga bo a amu minsem a nga tindi Israél na a bo.

17 Ane nga Yérôbôam a nga kôlô si a ke a kui Tirsa. Eyoñ a nga kui bebé anyiine *mbé, nde monafam a nga wu.

18 Be nga jame nye soñ, a Israél ase a nga be'e meyep asu dé, avale Nti a nga kobô *nkulu mejô Ahiya mbo ésaé wé.

19 Mimboone mi Yérôbôam mivok: bita, njôan, mam mete mese me ne ntilane kalate mam bejô bôte y'Israél ba bo mbu ôse;

20 Yérôbôam a nga jôô mimbu mewôm mebaé a mibaé, ane baa b'ésaa be nga bômbô vôme wua. Mone wé Nadab a nga jôô éjiane jé.


Rôbôam njô bôte ya Yuda
( 2 Minkte 12 ; Yer 2:19 )

21 Rôbôam, e mona Solômon, a nga jôô e Yuda. Eyoñ a nga telébane njôô, a nga bili mimbu mewôm menyin a wua. A nga jôô mimbu awôm a zamgbwa e Yérusalém, tisone Nti a nga top e *meyoñ mese y'Israél na a futi jôé dé. Nyia a mbe jôé na Naama, ngone Amonite.

22 Yuda a nga bo *abé e mise me Nti a dutu nye a suñ *aban a dañ abime b'ésaa be nga dutu nye na a suñe de.

23 Aval'ane b'ésaa bap, be nga lôñe bito ya bikôndô'ô yôp asu mebelane map. Nalé fe be nga telé *mekok a mekôn m'azezambe e minkôle mise mi ne mbetane yôp, a e bilé bise bi ne nyumene si;

24 bebo mfufub ébamba be nga too fe si Yuda melu mete, be nga bo aval ane mbia be mam mese meyoñe Nti a nga titan ôsu bone b'Israél be mbe.

25 Mbu tane Rôbôam a nga jôô ñwô Sisak, njô bôte y'Ejipte a nga ke wosane Yérusalém.

26 A nga nyoñ akume ya Ndaa Nti a akume ya ndaa njô bôt. A nga nyoñe fo'o biôme bise; a nga nyoñ to'o bibene bi or Solômon a nga bo.

27 Nde njô bôte Rôbôam a nga bo bibene bi mvot éjiane jap a kalane bie bivete bemate mbil bi mbe bi ba'ale'e anyiine ya ndaa njô bôt.

28 Eyoñ ése njô bôt a mbe a kelek e Ndaa Nti, bemate mbil be nga nyoñe bibene bite a zuu bie aba bemate mbil.

29 Mimboon mi Rôbôam mivok, jam ese a nga bo, ye me nji bo ntilan e kalate minkañete bejô bôte ya Yuda'

30 Bita bi mbe éyoñ ése e zañe Rôbôam a Yérôbôam.

31 Ane Rôbôam baa b'ésaa be nga bômbô vôme wua; ba b'ésaa be nga jambe e tisone David. A jôé nyia e mbe Naama, ngon Amonite. Mone wé Abiyam a nga jôô éjiane jé.

Bible en langue Bulu © L'Alliance Biblique du Cameroun, 2007, 2015.

Bible Society of Cameroon
Lean sinn:



Sanasan