1 Bb. 13 - Kalate Zambe Nnomo a Mfefe Mfefé Nkôñelan

Ata'a metuna'a ya Bétél da yo'oban, Yérôbôam a nyoñe melep

¹ Môta Zambe a nga kui Bétél a so'o Yuda, éyoñe Yérôbôam a nga telé ata'a metuna'a na a di'i mimbon mi ne mbamba menyum, aval'ane nkobô Nti ô mbe.

² Nde a nga kobô ata'a metuna'a mejô me n'abé, ane nkobô Nti ô mbe, a jô na: A ata'a metuna'a! A ata'a metuna'a! Avale di Nti a jô na: Tame yen, monafam a ye bialé *nda David; jôé dé da ye bo Yôzias; a ye tyi'i betuni ya bito ya bikôndô'ô yôp e be wo yôp, mbe ba di'i mimbon mi ne mbamba menyum e be wo yôp, a ba ye di'i bivese bi bôt e be wo yôp.

³ Amôs ôte ôbien, a nga ve ndem a jô na: Ndeme ya na Nti a kobôya nje nyô: ata'a metuna'a da ye salé zañ, a asup e n'été yôp da ye mialan.

⁴ Eyoñe njô bôte Yérôbôam a nga wô'ô mbia mejô môta Zambe a nga kobô ata'a metuna'a ya Bétél nde a nga samese wo ata'a metuna'a yôp a jô na: Biane nye! Ane wo Yérôbôam a mbe a samese'e môta Zambe ô nga yemele, a nji fe bo ngule ya bulane wô mvus.

⁵ Ane ata'a metuna'a e nga salé, asup e nga too été yôp ve mane mialan, avale ndeme môta Zambe a nga ve e mbe, avale nkobô Nti ô mbe.

⁶ Ane njô bôt a nga nyoñe nkobô a jô môta Zambe na: Ye'ela'ane Nti, e Zambe wôé, ye'ela'ane nye ajô dam, nalé ma ye bo ngule ya bulane wo mvus. Ane môta Zambe a nga ye'elane Nti, a njô bôt a nga bo nguleya dutu wo wé, wô ve bulan ane ô mbe.

⁷ Nde njô bôt a nga jô môta Zambe na: Za'a bi nyiine *nda ô di, a ma ye ve wo jôm.

⁸ Môta Zambe a nga yalane njô bôte na: To'o wo ve ma éfase ya *nda jôé, maa ye ke nyiine *nda jôé. Maa ye ke di bidi nge nyu mendim.

⁹ Amu *atiñ e nga vebane be ma nkobô Nti été na: Wo ye bo te di bidi nge nyu mendim, a wo ye bo te bulan e *zen ô nga so.

¹⁰ A nga tyii zene fe teke bulan e *zen a nga suane je Bétél.

Ngbwengbwem ja wôé nkulu mejô

¹¹ Nnôme *nkulu mejô ô nga too Bétél. Wua ya bone bé a nga zu kañete nye mam mese môta Zambe a nga bo e Bétél *môs ôte, a mejô a nga kobô njô bôt. Eyoñe *bon be maneya kate ésaa wop nkañete te,

¹² a nga jô be na: A te ke zene fé? Bon be nga yene zene môta Zambe a nga so Yuda a nga ke:

¹³ nd'a nga jô bone na: Futa'ane ma éto éjakase yôp. Ane be nga futi nye éto éjakase yôp, nde a nga tabe été yôp.

¹⁴ A nga tôñe môta Zambe a koone nye a too élé térébeñte si. A nga jô nye na: Ye wo ô ne môta Zambe a nga so Yuda? Nye na: Ma le!

¹⁵ A nga jô nye na: Bia wo za'a bi ke *nda bi di.

¹⁶ Ve a nga yalane na: Bia wo bi se nguleya bulan a me se nguleya nyiine *nda jôé. Maa ye ke di bidi, nge nyu mendim bia wo vôm ate;

¹⁷ amu e ne ma njôban, nkobô Nti été na: Wo ye bo te di bidi nge nyu mendim, a wo ye bo te bulane *zen ô nga tyii éyoñ ô nga ke.

¹⁸ A nga jô nye na: Ma fe me ne *nkulu mejô ane wo; Engele a te kobô ma mejô mete me so'o be Nti na: Bula'ane nye *nda jôé, a ja'a bidi a nyu mendim. A nga laane nye minsos.

¹⁹ Ane baa môta Zambe be nga bulan; a nga di bidi e *nda jé a nyu fe mendim.

²⁰ Be ngenan be too tawôlô, ane ajô Nti é nga zu be *nkulu mejô a nga bulane nye mvus.

²¹ A a nga yôtane môta Zambe a nga so Yuda na: Avale di Nti a kobô na: Amu ô nga bo abendé Nti melo a bo te ba'ale abendé Nti, e Zambe wôé a nga ve wo,

²² amu ô nga bulan a di bidi a nyu mendim e vôm a nga jô wo na: Wo ye bo te di bidi nge nyu mendim, ajô te mbime wôé wo ye bo te nyiine soñ b'ésoo.

²³ Eyoñ a maneya di bidi a nyu mendim, a nga futi éto éjakase yôp asu *nkulu mejô a nga soo nye,

²⁴ nde a nga ke; ane ngbwengbwem é nga bi nye *zen a wôé nye. Mbime wé ô nga wuabane zene yôp. Ngbwengbwem é nga tele fe fefele mbim;

²⁵ bôt be nga lôt be nga yene mbim ô bôô zene yôp a ngbwengbwem é tele e fefele mbim; be nga kañete jame te éyoñ be nga kui e tisone nnôme *nkulu mejô ô nga too.

²⁶ Nkulu mejô a nga bulane nye mvuse *zen, a nga wô'ô jame te a jô na: E môta Zambe a nga bo abendé Nti melo nye le; Nti a te ve nye ngbwengbwem é nyabe nye a wôé nye, avale nkobô Nti a nga kobô nye ô mbe.

²⁷ Wôna a nga kobô bone bé a jô na: Futa'ane ma éto éjakase yôp. Ane be nga futi je.

²⁸ Nde a nga ke a koone mbim ô bôô zene yôp, éjakas a ngbwengbweme ki be tele fefele mbim. Ngbwengbwem é nji ke di mbim nge nyab éjakas.

²⁹ Ane *nkulu mejô a nga bete mbime môta Zambe, ve beté wô éjakase yôp a kee wô. Ane nnôme *nkulu mejô ô nga bulane tison asu meyep a njamane mbim.

³⁰ A nga jam e mbime wé soñ, a be nga yône nye be jô'ô na: Eéé! A mojañ!

³¹ Eyoñ a maneya jame nye, a nga jô bone na: Éyoñe ma ye wu, mia ye jame ma e soñe môta Zambe, mia ye bôôé bivese biam e fefel émbié.

³² Amu e ne fo'o bebela na: Nkobô bidim a nga kobô ata'a metuna'a ya Bétél a menda bito ya bikôndô'ô yôp mese me ne bitisone ya Samari, a jôé Nti, wo ye fo'o tôéban.

³³ Eyoñe jame te e maneya, Yérôbôam a nji bulane mvus e mbia zene wé. A nga beta telé betuni asu bito ya bikôndô'ô yôp, mbe a nga nyoñ e be bôte bese; ba bese be nga kômbô, a nga telé be betuni ya bito ya bikôndô'ô yôp.

³⁴ Jame te é nga dutu *nda Yérôbôame na é bo abé; ajô te é nga man jaabane *si nyô.