1 Bb. 12 - Kalate Zambe Nnomo a Mfefe Mfefé Nkôñelan

Ejôé ja salé zañ: Rôbôam e Yuda, Yérôbôam Israél

¹ Ane Rôbôam a nga ke Sikem, amu Israél ase a nga zu Sikem na be telé nye njôô.

² Yérôbôam, e mone Nébat, a nga wô'ô jame te, valé a ngenan Ejipte, mfa'a a nga tube njô bôte Solômon. Yérôbôam a nga too Ejipte.

³ Be nga lôme bôt be ke loone nye. Eyoñe te Yérôbôam a ékôane bôt ése y'Israél be nga suan a kobô Rôbôam avale di na:

⁴ Esoo a nga bo mbe'e wongan adit; éyoñe ji, wo tame bo ngule bisaé ésoo a adite mbe'e a nga titi bia bitule éveves, éyoñe te bia ye saane wo.

⁵ A nga yalane be na: Kelan a beta'a zuane be ma den melu mela. Ane bôt be nga ke.

⁶ Ane njô bôte Rôbôam a nga sulan bemvendé be nga too fefel ésaa Solômon éyoñ a nga vee a sili be na: Mia lebe ma me yalane bôte bana aya'

⁷ Be nga yalane nye na: Nge môse ya den wo ye bo mbo ésaé ya bôte ba, nge wo saane be, nge wo yalane be a mbamba *nlem, ba ye bo bebo bisaé bôé éyoñ ése.

⁸ Ve Rôbôam a nji nyoñe ngap e melebe bemvendé be nga ve nye. A nga nyoñe melebe ya ba baa be be be yaé be too bongô mbe baa be be be nga too.

⁹ A nga sili be na: Mia lebe ma me yalane bôte bana aya, éyoñ ba kobô avale di na: Bo'ok e mbe'e ésoo a nga titi bia bitule éveves'

¹⁰ E ba baa be be be nga yaé éyoñe ya bongô be nga kobô nye na: Wo ye yalane bôt ba te kobô wo avale nkobô di na: Ésoo a nga bo mbe'e wongan adit, ve wo bo'o bia wô éveves, wo ye jô be na: Ngas ônyu jam é n'anen a dañ angeteñ ésaa wom.

¹¹ Eyoñe ji, ésaa wom a nga titi mia mbe'e ô n'adite bitu ma ma ye dañe bo wô adit; ésaa wom a nga ve mia *melep a minkasa, ve ma, ma ye lebe mia a alé.

¹² Eyoñe te Yérôbôam a bôte bese be nga zu be Rôbôam e môse lale, avale njô bôt a nga jô na: Beta'a zuane be ma mvuse melu mela.

¹³ Nde njô bôt a nga yalane bôt mbia éyalan. A nji semé *melep bemvendé be nga ve nye,

¹⁴ a nga kobô be, aval'ane bendôman be nga lebe nye na: Ésaa wom a nga bo mbe'e wônan adit, ma ma ye dañe ve wô adit; ésaa wom a nga bôme mia a minkasa, ve ma ma ye bôme mia a alé.

¹⁵ Nalé njô bôt a nga bo te wô'ô bôt, amu nkôñelane ya mam ô nga so be Nti, nalé ate nkobô Nti a nga kobô Ahiya ya Silô na a kobô Yérôbôam, e mona Nébat, wo ye tôéban.

¹⁶ Eyoñ Israél ase a nga yene na njô bôt a nji vô'ôlô nye, nde bôt be nga yalane njô bôte na: Ngabe fé bia be David bi bili' Bi nji bi ngab éli'i éziñ bia be mone Izayi! A Israél, bula'an e menda bindelé môé! A David, ba'ale'e *nda jôé éyoñe ji! Eyoñe te Israél a nga bulane menda bindelé mé.

¹⁷ Rôbôam a nga jôô bone b'Israél be nga too bitisone ya Yuda.

¹⁸ Eyoñe te njô bôte Rôbôam a nga lôm Adoram a nga jôô mame ya bisaé. Ve Israél ase a nga lume nye *mekok: ane a nga wu. Rôbôam a nga nga bi ve ngule ya dañe vagoñe na a tup a ke Yérusalém.

¹⁹ Avale di nde Israél a nga bene ndaa David a kui môse wu.

²⁰ Eyoñ Israél ase a wô'ôya na Yérôbôam a bulaneya, be nga bañete nye ékôan, a telé nye njô ya Israél ase. Ayoñe Yuda étam nde e nga li'i e tii a ndaa David.

²¹ Eyoñe Rôbôam a suaneya Yérusalém, a nga sulane ndaa Yuda a ayoñe Bényamin, bôte mewosan toyini ntet a mewôme muam na, be ke wosan Israél, nalé éjôé ja ye bulane be Rôbôam, mone Solômon.

²² Ve Zambe a nga kobô Semaéya, môta Zambe na:

²³ Kobô'ô Rôbôam, mone Solômon, njô bôte ya Yuda, a *nda bôte Yuda ése, a nyô Bényamin, a bôte bevo'o bese ya ayoñ a

²⁴ jô be na: Avale di nde Nti a kobô na: Mia ye bo te bet, a mia ye bo te wosane bobenyoñ, bone b'Israél! Môt ase ya be mia a bula'ane *nda jé, amu jame te da so be ma. Ane be nga bo nkobô Nti mewôk a bulan aval'ane nkobô Nti ô mbe.

Yérôbôam njôô ya Israél, nkañane bone benya'a be or

²⁵ Yérôbôam a nga lôñe Sikem e minkôle mi Efrayim yôp a tabe été; akôlô ya valé nde a nga lôñe Penuél.

²⁶ Ane Yérôbôam a nga jô e nleme wé été na: Éyoñe ji éjôé é ne beta bulane ndaa David,

²⁷ nge bôte bana ba ke Yérusalém a tyi'i biôm e ndaa Nti. Nleme ya bôte ba wo ye beta bulane be masa wop, be Rôbôam, njô bôte ya Yuda, ba ye wôé ma a bulane be Rôbôam, njô bôte ya Yuda.

²⁸ Eyoñ a maneya nyoñe *melep, njô bôt a nga bo bone benya'a be or bebaé a jô bôte na: Mi ju'uya ke Yérusalém! A Israél, bezambe be nga soo wo Ejipte mbe ba.

²⁹ A nga telé wua e Bétél a nyô mbok e Dañ.

³⁰ Eyoñe te é mbe éyoñ ya bo *abé. Bôt be nga ke be wua ya bone benyak a kui Dañ.

³¹ Ane Yérôbôam a nga telé ngume *nda e bito ya bikôndô'ô yôp a betuni a nga nyoñe be bôte bese be too te bôte ya bone be Lévi.

³² Yérôbôam a nga telé abôk e ngone muam é too melu awôm a metan, e too fe ane abôk be nga bo be jemek e Yuda, ane a nga bet ata'a metuna'a. Avale te nde a nga bo e Bétél, a tyi'ik bone benyak a nga bo biôm. A nga telé betuni asu bito ya bikôndô'ô yôp, bi a nga bo.

³³ A nga ke e ata'a metuna'a a nga bo Bétél *môs awôm a tane ya ngone muam, ngon émien a nga top a ôsimesane vié. A nga bo abôk asu bone b'Israél a ke ata'a metuna'a na a di'i mimbon mi ne mbamba menyum.