1 Bb. 11 - Kalate Zambe Nnomo a Mfefe Mfefé Nkôñelan

Binga bikuu, bengunemelan a besiñ be Solômon. Awu dé

¹ Njô bôte Solômon a nga nye'e binga ya *meyoñ mefe abui, te lañe ngone Faraoñ: Bemôabite, Beamônite, Beédomite, Besidônieñ, Behétieñ,

² Bengone ya meyoñe Nti a nga jô bone b'Israél na: Mia ye bo te ke be be, a be fe ba ye bo te zu be mia, amu teke selan na, ba ye dutu minleme mienan e be bezambe bap; *meyoñ mete mme Solômon a nga kabetane me a dutuban amu nye'an.

³ A nga bili binga be too bengone bejô bôt mintete zamgbwa a bibon mintete zamgbwa, binga bé be nga vôône nleme wé.

⁴ Eyoñe Solômon a ntoo nnôm, binga bé be nga vôône nleme wé e be bezambe befe; nleme wé ô nji beta bo ôse be Nti, e Zambe wé, avale nleme David ésaa wé ô mbe.

⁵ Solômon a nga lat a nkañane astarté, zamba Besidônieñ, nalé fe a nkañane milkom, mbia jôma Beamônite.

⁶ Solômon a nga bo mam me n'abé e mise me Nti, teke tu'a tôñ e zene Nti, aval'ane ésaa wé David.

⁷ Ane Solômon a nga lôñ éto y'ékôndô'ô yôp *zôsôô a Yérusalém, asu kémos, mbia jôme Môab, a asu Molok mbia jôma Beamônite.

⁸ A nga bo nalé be binga bikule bé bese be nga ve mimbon mi ne mbamba menyum a *bityi'a asu bezambe bap.

⁹ Ane Nti a nga yaa Solômon amu a nga vaa nleme wé be Nti, e Zambee Israél, nyô a nga yené be nye biyoñ bibaé.

¹⁰ A nga ve nye mingum mebendé ajô te na, a bo teke lat a bezambe befe; ve Solômon a nji vô'ôlô mebendé me Nti.

¹¹ Ajô te Nti a nga jô Solômon na: Amu nne e ntoo nalé be wo, vôm ô nji ba'ale élate jam, memvinda mam me nga ve wo, ma ye fo'o kandé éjôé a vaa wo je a kalane je mbo ésaé wôé.

¹² Ve ma ye bo te bo jame te éyoñ ô vee amu ésoo wôé David. Ma ye vaa je e mo me mone wôé.

¹³ Ve maa ye ke vaa éjôé; ma ye li'i nyô mon ayoñe da, amu mbo ésaé wom David, a amu Yérusalém me nga top.

Mewosan ma so Solômon atan

¹⁴ Ane Nti a nga telé Solômon môte ya sengane nye; Adad, mon Edomite, a mbe mvoñe bejôô Edom été.

¹⁵ Melu David a nga belan Edom, Yôab, évete mewosan, a beteya na a ke jame mimbim, a nga mane wôé befam bese be mbe Edom.

¹⁶ Yôab a Israél ase be nga too wé ngon ésaman akekui be maneya wôé befam bese ya Edom.

¹⁷ Eyoñe te nje Adad a nga tup baa be b'Edomite, bebo bisaé be ésaa wé, a ke Ejipte. Valé Adad a ngenan ésoé ndôman.

¹⁸ Eyoñ be kôlôya Madian, be nga ke Parañ a kui Ejipte be Faraoñ, njô bôte y'Ejipte, nye ve ve nye *nda, bidi a éfuse si.

¹⁹ Adad a yene *mvam be Faraoñ a kui na a nga bo nye na a lu'u monyañe minga Faraoñ, monyañe nga njô bôt Tapenés.

²⁰ Monyañe Tapenés a nga biaé nye monafam jôé na: Genuba. Tapenés a nga tyili nye mebé e ndaa Faraoñ; a Genuba a nga tabe ndaa Faraoñ, e bone be Faraoñ été.

²¹ Eyoñe Adad a wô'ôya a too Ejipte na David a wuya, a na Yôab, évete mewosan fe a wuya, nde a nga jô Faraoñ na: Jôké'é ma me bulane si jam.

²² Faraoñ a nga jô nye na: Jé ja jembane wo fefele jame na ô kômbô bulan e si jôé? A nga yalane na: Teke jôm, v'akôsa bo nalé jôké'é ma me ke.

²³ Zambe a nga telé Solômon nsiñ mfe: Rézôn, mona Eliada, nyô a nga tube *nda masa wé Adadézer, njô bôte ya Sôba.

²⁴ A nga sulane bôt e fefele jé; a mbe évete ya nsamba, éyoñe David a nga wôé minsamba mi bôte masa wé. Ane be nga ke Damas, a tabe wé a jôô e Damas.

²⁵ A mbe nsiñ Israél nté ôse Solômon a nga vee, éyoñe melu Adad fe a nga bo nye *abé, a a nga vini Israél. A mbe njô bôt e Siri.

Ahiya, * nkulu mejô a kate Yérôbôam nsalane zañ wo ye kui Israél été

²⁶ Yérôbôam a mbe mona Nébat, mon Efratieñ ya Séréda, nyia wé a mbe nkuse minga jôé na Séruya.

²⁷ A mbe mbo ésaé Solômon a a nga bete wo na a wosane njô bôt. Avale di nde e nga bobane na a bete wo a wosane njôô: njô bôte Solômon a mbe a lôñe Milô a dib *abé ya tisone David ésaa wé.

²⁸ Yérôbôam a mbe ngu a éwôlô môt; éyoñ Solômon a yeneya ane ésoé ndômane te ja bo ésaé, nde a nga telé nye mfombô bebe'e mimbe'e bese ya ndaa Yôsep.

²⁹ Melu mete, Yérôbôam a nga kôlô Yérusalém a tôbane *nkulu mejô Ahiya ya Silô *zen, a be'e mfefé alô'ô. Be mbe afan ve bebaé étam.

³⁰ Nde Ahiya a nga bi mfefé alô'ô a nga be'e, a nyabe wô bifus awôm a bibaé,

³¹ a jô Yérôbôam na: Nyoñe bifus awôm asu dôé! Amu avale di nde Nti, e Zambee Israél a jô na: Ma nyô! Ma ye wôlé éjôé e mo me Solômon a ma ye ve wo *meyoñ awôm.

³² Ve a ye bi ayoñe da, amu mbo ésaé wom David, a amu Yérusalém e tison me nga top e *meyoñ mese y'Israél été;

³³ amu be li'iya ma a kute Astarté meboñe si, *zambe Besidônieñ, a kute fe kémos e *zambe Môab a Milkom *zambe Beamônite, a amu be nji wulu mezene mame na, be bo mam me ne *zôsôô e mise mam, a ba'ale memvinda mam, avale David, ésaa Solômon a nga bo.

³⁴ Ma ye bo te nyoñ éjôé ése e mo mé, amu ma ye telé nye njôô melu mese y'ényiñe jé, amu mbo ésaé wom David me nga top a a nga ba'ale mebendé mam a memvinda mam.

³⁵ Ve ma ye wôlé éjôé e mo me mone wé a ve wo *meyoñ awôm;

³⁶ Ma ye ve mone wé ayoñe da nalé mbo ésaé wom David a ye bi mvoñe bejô bôt ôsu viam e Yérusalém; tison me nga tobe na me futi jôé dam nnôm éto.

³⁷ Ma ye nyoñe wo a wo ye bo njôô ya jôm ése ényiñe jôé ja kômbô, wo ye bo njô bôte ya Israél.

³⁸ Nge wo ye vô'ôlô jam ese ma ye bendé wo, a nge wo bo mam me ne *zôsôô mise mam, a mba'alane memvinda mam a mebendé mam, avale mbo ésaé wom David a nga bo, ma ye tabe be wo a ma ye lôñe wo *nda bôt é ne te afô'ôsan, avale me nga lôñe David jia, a ma ye ve wo Israél.

³⁹ Eyoñe te, a mboon ma ye bo wo, ma ye samele mvoñe bôte David, ve sa ke nnôm éto.

⁴⁰ Ane Solômon a nga jeñe na a wôé Yérôbôam. Eyoñe te Yérôbôam a nga tup a ke Ejipte e be Sisak, njô bôte y'Ejipte; a nga tabe Ejipte akekui Solômon a nga wu.

⁴¹ Mimboone mi Solômon mivok, jam ese a nga bo, fe'e jé, mise mi ne ntilan e kalate Mimboon mi Solômon.

⁴² Solômon a nga jôô Israél ase e Yérusalém tañe mimbu mewôm menyin.

⁴³ Ane Solômon a nga bômbô ba b'ésaa a jambe e tisone David ésaa. Wôna mone wé Rôbôam a nga jôô éjiane jé.