1 Bb. 10 - Kalate Zambe Nnomo a Mfefe Mfefé Nkôñelan

Njô bôta minga ya Saba a ke Yérusalém

¹ Njô bôta minga ya Saba a nga wô'ôtan ñwumane Solômon a nga wum mfa'a duma Nti, nde a nga zu ve'ele nye a mesoé me ba.

² A nga suan e Yérusalém a beta nsamba: bekamel be be'e bityita'a, or abui a meko'o me n'édima. Nde a nga zu be Solômon a kate nye mam mese me mbe nye *nlem.

³ Solômon a nga ye'ele nye jam ese a nga sili, a teke jam éziñ e mbe nsolan be njô bôt, nde a nga bo te ye'ele nye.

⁴ Ane njô bôta minga ya Saba a nga yene fe'e Solômon, *nda a nga lôñ,

⁵ bidi ya tawôlô wé, étaba'a bebo bisaé bé, bisaé a mengômesan me bôt be nga saane nye, biwôlô bi bôt bia kalane nye *élaé, a *bityi'a bi ne ngumba a nga ve ndaa Nti:

⁶ nde a nga bi ébu'anyu a mo a jô njô bôte na: E ne bebela, e jam me nga wôk e si jam ajô ya mejô môé a fe'e jôé!

⁷ Me nji buni mejô mete te naa me zu a yen a mise mam. Tame yen, be nji kate ma, ja'ane v'éfase ya mam me yeneya. Fe'e jôé a mefo'o môé bia dañe ñwumane me nga wô'ôtane be wo.

⁸ Mvom a bôte bôé, mvom a bebo bisaé bôé be tele wo ôsu éyoñ ése a wô'ô fe'e jôé!

⁹ Ebotan a Nti, e Zambe wôé, Nyô a nga yene wo mvaé, a toé wo éto njôane ya Israél! Amu Nti *a nye'e Israél éyoñ ése, nde a nga telé wo njô bôte na ô tyi'i mejô *zôsôô.

¹⁰ A nga ve njô bôte betalañ be or ntet a mewôm mebaé, étua abui bityita'a a meko'o me n'édima. Aval abui bityita'a te e nji tame yené e funa'ane di njô bôta minga ya Saba a nga ve Solômon.

¹¹ Besitima be Iram be nga soo or, ôfir, mbe fe be nga soo abui bilé bi Santal a meko'o me n'édima Ôfir.

¹² Njô bôt a nga belane bilé bi Santal mfa'a ya bo nka'alé asu minsamba beyia bia. Avale bilé bi Santal bite e nji beta so a bi nji beta yené a kui môse ya den.

¹³ Njô bôte Solômon a nga ve njô bôta minga ya Saba jôm ése a nga kômbô, jôm ése a nga sili, a ve fe nye biôm bia yiane njô bôt ane Solômon. Nd'a nga bulan a ke si jé, émien a bebo bisaé bé.

Akume Solômon

¹⁴ Or a nga bo a so'o Solômon mbu ôse a mbe betalañ mintete misaman, mewôm mesaman a besaman,

¹⁵ te lañe nyô bekuan abom be nga zuu nye, a nyô bisaé bekuane biôm, a nyô bejô bôte bese ya mfulane *meyoñ a bejôô ya si éte.

¹⁶ Njô bôte Solômon a nga kôme biben bi or a ne mbiban mintete mibaé; a nga belan ében ése y'été besikel be or mintete misaman,

¹⁷ a bone biben bi or a ne mbiban mintete mila, jia ése y'été a nga belan bemine be or belaa; njô bôt a nga naane bie e *nda ya afane Libañ.

¹⁸ Njô bôt a nga bo beta éto njôane mimbañ a dube je a or a ne *mfuban.

¹⁹ Eto njôane te é nga bili abet da ke été metelé mebo mesaman, éfase ya yôp é mbe njiñelete mfa'a ya mvus; éto é nga bili vôm ba beté mo bifas bibaé; ngbwengbwem ébaé é tele e fefele mo.

²⁰ Bengbwengbwem awôm a bebaé be nga tele e bifas bibaé ya ôbet. Teke éjôé éfe é nga tame bi avale jôme te.

²¹ Biôm bise njô bôte Solômon a nga belane bie asu menyu bi mbe mboon a or, a biôme mebelan bise ya *nda ya afane Libañ bi mbe mboon a or a ne *mfuban. Teke jôm é mbe mboon a argent; melu me Solômon, be nji kobô kobô ajô argent.

²² Amu njô bôt a nga bili e mañ, besitima ya Tarsis a ba be Iram; besitima ya Tarsis be nga so mimbu milale mise, be so'o or, argent, mimbañ, bekoé a anon e ne anen.

²³ Njô bôte Solômon a mbe éwôlô a dañe bejô bôte bese ya *si nyô mfa'a ya akum a fek.

²⁴ Bôte bese be nga jeñe na be tôbane Solômon a wô'ô fe'e jé Zambe a nga futi nye *nlem.

²⁵ Môt ase a nga zuu mveane wé: biôm bi ne mboon a argent, bi bi ne mboon a or, mengômesan, menga, bityita'a, bikabela a bemulé. Nalé a nga boban mbu ôse.

²⁶ Solômon a nga tôkan bevagoñ a bebebe bikabela; a nga bili bevagoñ toyini a mintete minyin, bewulu bikabela toyini awôm a ébaé, a nga kee bie e bitison be nga ba'ale biôm mewosan e Yérusalém, e fefele njô bôt.

²⁷ Njô bôt a nga bo na argent a yené Yérusalém fe v'ane *mekok, a bilé bi Sédre bi mbe abui, v'ane besikomor be ne Séféla.

²⁸ Be nga soo bikabela bi Solômon Ejipte; nsamba bekuan abom be njô bôt ô mbe ô kele nyoñe bie minsamba minsamba, be va'a ngume tañ;

²⁹ vagoñ wua a mbe a so'ok Ejipte a besikel be argent ntet a mewôm metan. Be mbe fe be so'o bie asu bejô bôte ya Behétieñ; a bejô bôte ya Siri.