Yuda 1 - Apam Foforɔ

Nkyea

¹ Yesu Kristo akoa Yuda a ɔyɛ Yakobo nua twerɛ krataa yi de kɔma bɛ a bɛafrɛ bɛ a Agya Nyankopɔn dɔ bɛ na bɛakora bɛ ama Yesu Kristo he.

² Mmɔborɔhunu, asomdwie ne dɔ nnɔɔso mma ho.

Kristofoɔ gyidie ho pere

³ Adɔfonom, berɛ a meebɔ mmɔdene atwerɛ ho afa nkwagyeɛ a yɛ nyinaa te mu he ho he, mehuu sɛ ohia sɛ metwerɛ de fa hia ohia sɛ hoyere ho ho gyina gyidie a Nyankopɔn de ahyɛ ahoteefoɔ nsa prɛko he ho.

⁴ Na nnipa bi awiawia bɛ ho aba mu a befiri tete atwerɛ bɛ ho asɛm ato hɔ ama saa atemmuo yi, amumuyɔfoɔ a bɛde akohwibra bu Nyankopɔn adom he animtia, na bɛpo Owura korɔ a ɔne Awurade Yesu Kristo he.

Torɔ akyerɛkyerɛfoɔ atemmuo

⁵ Ɔyɛ nɔkorɛ sɛ honim yei dada, nso mepɛ sɛ mekae ho adwene fa gyeɛ a Awurade gyee Israelfoɔ firii Misraim asaase so prɛko na akyire yi he, ɔsɛee bɛ a bɛannye asɛm he anni he.

⁶ Na abɔfoɔ a bɛtraa bɛ tumi, na begyaa bɛ atenaeɛ he, bɛde daa nkɔnsɔnkɔnsɔn agugu bɛ ya sum kabii mu a Nyankopɔn de bɛ asie ɔɔtwɛne da kɛseɛ he atemmuo.

⁷ Saa ara ne Sodom ne Gomora ne nkuro a atwa bɛ ho ahyia a bɛyɔɔ sɛ yeinom, de bɛ ho maa adwamammɔfoɔ, na bekodii honam akɔnnɔ akyi a na ɔnyɛ ne kwane so, na bɛde daa gya twee bɛ aso de ayɔ nsɛnnahɔ ama yɛ.

⁸ Saa nnipa he nam saa kwane korɔ heaa so sosoo daeɛ ma bɛyɔɔ bɔne tiaa bɛ nipadua. Bemmu tumidie, na bɛkasa tiaa animuonyamfoɔ.

⁹ Nso berɛ a bɔfo-panyini Mikael ne bronsam ɔɔpere Mose amu so a akasakasaa sii bɛ ntam he mpo, bɔfoɔ Mikael anyɔ n’adwene sɛ ɔbɛka asɛmmɔne abu no atɛne, na mmom asɛm a ɔkaeɛaa ne sɛ, “Awurade nka w’anim!”

¹⁰ Nso saa nnipa yi ka nea bennim he ho nsɛmmɔne, na deɛ befiri bɛ nnipa su mu nim sɛ mmoa a benni adwene he nso nim he, ɔno mu ne begu bɛ ho fi.

¹¹ Mmusuo nka bɛ! Efiri sɛ, kwane a Kain faa so heaa so ne bɛnam, na mfasoɔ nti, bɛde bɛ ho ahyɛ mfomsoɔ a Bileam yɔeɛ he bi ase. Bɛayɔ dɔm sɛnea Kora yɔɔ dɔm he nam so ma bɛasɛe bɛ sɛ ɔno.

¹² Yeinom yɛ ho dɔ adidie mu nkekaeɛ, bɛne ho bom oodidi, bɛmfɛre adeɛ, bɛyɛne bɛ ho; bɛte sɛ mununkum a nsuo nni mu a mframa twetwe kyinkyini, anaa nnua a so nhahane apere a onni aba, na awu mprenu a ne nhini atutu.

¹³ Bɛ aniwuo da adi te sɛ po asorɔkye a opu ahuro fi gu, bɛte sɛ nsoromma a okyinkyini a Nyankopɔn de bɛ asie sum kabii mu afebɔɔ.

¹⁴ Yeinom ho ne Henok nso a ɔtɔ Adam so nson awoɔ ntoatoasoɔ mu hyɛɛ saa nnipa yi ho nkɔm teteete sɛ, “Hwɛ, Awurade ne n’abɔfoɔ kronkron mpempem bɛba,

¹⁵ na bɛabebu ho nyinaa atɛne na bɛabu nnebɔnyɛfoɔ nyinaa atɛne bɛ bɔne a bɛayɔ ne nsɛm a ano ɔdene a bɛaka atia Nyankopɔn he ho.”

¹⁶ Yeinom yɛ anwiinwiifoɔ, yɔnaafoɔ a bedi bɛaa bɛ akɔnnɔ akyi, na bɛyɛ anumdwafoɔ a mfasoɔ nti, bɛdɛfɛdɛfɛ nnipa.

Kɔkɔbɔ ne afutuo ahodoɔ

¹⁷ Adɔfonom, honkae nsɛm a tete he asomafoɔ he ka too hɔ faa Awurade Yesu Kristo ho,

¹⁸ bɛkaa sɛ, “Sɛ awieeɛ he duru a, fɛwdifoɔ bɛba a, bebedi bɛaa bɛ amumuyɔ akɔnnɔ akyi.”

¹⁹ Yeinom ne nnipa a bɛnam bɛ akɔnnɔ so de mpaepaemu ba he. Na benni Honhom he.

²⁰ Nti adɔfonom, metu ho fo sɛ, honkɔ so nyini ho gyidie kronkron mu, hommɔ mpaeɛ Honhom Kronkron he tumi mu,

²¹ na honkɔ so ntena Nyankopɔn dɔ mu berɛ a hootwɛne yɛ Awurade Yesu Kristo mmɔborɔhunu mu ama wama ho nkwa a onni awieeɛ he.

²² Na akyinnyegyefoɔ nso, honhu bɛ mmɔbɔ

²³ berɛ a hoontwe bɛ afiri gya mu agye bɛ nkwa, homfa suro nhu binom mmɔbɔ, na hontane nipasu a ɔte sɛ ataadeɛ a nkekaeɛ akeka mu he nso.

Nhyira nsɛm

²⁴ Na nea obetumi asɔ ho mu na hoansonti, na ɔde ho asi n’animuonyam anim sɛ nnipa a benni dɛm ahosane mu he,

²⁵ Nyankopɔn koro a ɔnam yɛ Awurade Yesu Kristo so yɛ yɛ Agyenkwa he, ɔno ne animuonyam ne kɛseyɛ ne ahoɔdene ne tumi nka no mmerɛ santene, seesei ne daa nyinaa. Amen.