Yohane 9 - Apam Foforɔ

Beema bi a bɛwoo no anifira mu nyaa n’ayaresa

¹ Na afei Yesu ootwam baabi he, ohuu beema bi a bɛwoo no he na n’ani afira.

² N’asuafoɔ he bisaa no sɛ, “Kyerɛkyerɛfoɔ, hwane ne yɔɔ bɔne, beema yi anaa n’awofoɔ, sɛ bɛwoo no a na n’ani afira yi?”

³ Yesu buaa sɛ, “Ɔnyɛ beema yi anaa n’awofoɔ ne yɔɔ bɔne, na mmom bɛwoo no anifra mu senea ɔbɛyɛ a Nyankopɔn nnwuma bɛda adi ne mu.

⁴ Adekyeɛ ya hɔ yi ɔsɛ sɛ yɛyɔ nea ɔsomaa yɛ he nnwuma; anadwo ɔɔba a biaa ntumi nnyɔ adwuma.

⁵ Berɛ a meya wiase yi, mene wiase hann.”

⁶ Ɔkaa saa he, ɔtoo ntasuo too fam, na ɔde ntasuo he fraa nnɛteɛ, na ɔde nnɛteɛ he faa nifirani he ani so.

⁷ Na ɔka kyerɛɛ no sɛ, “Kɔhohoro so ya tadeɛ Siloa (asekyerɛ ne nea bɛasoma no) mu.” Na ɔkɔhohoroo so, na ɔbaeɛ he na ohu adeɛ.

⁸ Ne mpɔtamufoɔ ne bɛ a na benim no sɛ na ɔyɛ srɛsrɛfoɔ he kaa sɛ, “Ɔnyɛ beema a na ɔte hɔ srɛsrɛ adeɛ he di?”

⁹ Afei binom kaa sɛ, “Ɔyɛ ɔno a.” Na binom nso kaa sɛ, “Ɔsɛ no.” Na ɔnoaa deɛ, ɔkaa sɛ, “Ɔyɛ me a.”

¹⁰ Na bebisaa no sɛ: Ɔyɛɛ dɛ ne w’ani abie yi?

¹¹ Obuaa sɛ, “Nipa bi a bɛfrɛ no Yesu ne potɔɔ nnɛteɛ de sraa m’ani so, na ɔka kyerɛ me sɛ, ‘Kɔ tadeɛ Siloa mu kɔ hohoro so.’ Na mekɔ hohoroo so he, mehuu adeɛ.”

¹² Na bebisaa no sɛ, “Ɔya he?” Na ɔkaa sɛ, “Mennim.”

Farisifoɔ he hwehwɛɛ Ayaresa he mu

¹³ Bɛde nea nka ɔyɛ nifirani he kɔɔ Farisifoɔ nkyɛne.

¹⁴ Na nea na ɔteɛ ne sɛ, na saa da a Yesu potɔɔ nnɛteɛ de biee n’ani he yɛ homeda.

¹⁵ Na Farisifoɔ he nso bisaa no bio sɛnea ɔyɔeɛ a ohuu adeɛ. Na ɔka kyerɛɛ bɛ sɛ, “Nnɛteɛ ne ɔde sraa m’ani so a, mekɔ hohoroo so a, mehuu adeɛ yi.”

¹⁶ Na Farisifoɔ he mu bi kaa sɛ, “Nipa yi mfiri Nyankopɔn nkyɛne, efiri sɛ onni homeda.” Nso binom bisaa sɛ, “Ɔbɛyɛ dɛ na nipa debɔneyɛni atumi ayɔ nsɛnkyerɛnne a ɔte sɛ yi?” Afei mpaepaemu baa bɛ mu.

¹⁷ Nti bɛsane bisaa nea na ɔyɛ nifirani he sɛ, “Wone wabie w’ani, na wo nso mmɛ ne wowɔ ka fa ne ho?” Ɔkaa sɛ, “Ɔyɛ diyifoɔ.”

¹⁸ Nso na Yudafoɔ he nnye ne ho nsɛm he nni, sɛ na nka ɔyɛ nifirani na seesei ohu adeɛ, kosii sɛ bɛfrɛɛ deɛ ohuu adeɛ he awofoɔ,

¹⁹ na bebisaa bɛ sɛ, “Ho ba a hoka sɛ howoo no nifirani he di? Afei ɔyɛɛ dɛ ne ohuu adeɛ yi?”

²⁰ N’awofoɔ he ka kyerɛɛ bɛ sɛ, “Yenim sɛ yɛba di, na yɛwoo no nifirani;

²¹ na sɛnea ɔyɔeɛ a ohuu adeɛ yi deɛ yennim. Afei nso nipa korɔ a obiee n’ani he, yɛdeɛ, yennim no; waanyini, hommisa no, na ɔno ankasa betumi ayi ano.”

²² Deɛ nti a n’awofoɔ kaa saa ne sɛ, na besuro Yudafoɔ he; efiri sɛ, na Yudafoɔ he apam dada sɛ, sɛ bi paem ka sɛ Yesu ne Kristo he a, bebetu no afiri hyiadane he mu.

²³ Yei ne maa n’awofoɔ kaa sɛ, “Wɔanyini hommisa no.”

²⁴ Na bɛfrɛɛ nipa a na nka ɔyɛ nifirani he ne mprenu so ka kyerɛɛ no sɛ, “Fa animuonyam ma Nyankopɔn! Yɛ deɛ, yenim sɛ nipa yi yɛ debɔnyɛni.”

²⁵ Na ɔkaa sɛ, “Sɛ ɔyɛ debɔnyɛni a, mennim; adeɛ baako pɛ ne menim, na nka meyɛ nifirani, na afei deɛ maahu adeɛ.”

²⁶ Na bebisaa no sɛ: Mmɛ ne ɔyɔ maa wo? Obiee w’ani he sɛ?

²⁷ Ɔka kyerɛɛ bɛ sɛ, “Maaka akyerɛ ho dada, na hoantie? Ɛɛne ne hopɛ sɛ hote bio? Ho nso hopɛ sɛ hoyɛ n’asuafoɔ anaa?”

²⁸ Bɛyeyaa no, na bɛkaa sɛ, “Wone woyɛ ne suani; na yɛ deɛ, yɛyɛ Mose asuafoɔ.”

²⁹ Yenim sɛ Nyankopɔn kasa kyerɛɛ Mose; na yei deɛ, yennim baabi a ofiri.

³⁰ Beema he buaa sɛ, “Yei ne ɔnwanwa he, sɛ honnim faako a ofiri, nso wabie m’ani.

³¹ Yenim sɛ Nyankopɔn ntie abɔnefoɔ, na otie bɛ a bɛsom no ne bedi n’apɛdeɛ so.

³² Ofiri tete de besi nnɛ yɛntee sɛ bi abie bi a bɛwoo no nifirani ani da.

³³ Sɛ beema yi mfiri Nyankopɔn hɔ a, nka ontumi nyɔ hwee.”

³⁴ Bebuaa no sɛ, “Wo a bɔne mu ne bɛwoo wo yi ne wookyerɛkyerɛ yɛ yi?” Na bɛpamoo no firi hɔ.

Honhom mu Anifira

³⁵ Yesu tee sɛ bɛapam no, na ohuu no he, obisaa no sɛ, “Wogye Nipa Ba he di?”

³⁶ Obuaa sɛ, “Owura, ɔno ne hwane? Ka kyerɛ me na mennye no nni.”

³⁷ Yesu ka kyerɛɛ no sɛ, “Woahu no, na ɔnoaa ne ɔne wo ɔɔkasa yi.”

³⁸ Ɔkaa sɛ, “Awurade, megye no di.” Na ɔsɔree no.

³⁹ Yesu ka kyerɛɛ no sɛ, “Atemmuo nti ne mebaa wiase, na bɛ a benhu adeɛ he ahu adeɛ, na bɛ a behu adeɛ he bɛadane anifirafoɔ.”

⁴⁰ Na Farisifoɔ he mu bi a na bɛ ne no ya hɔ tee asɛm yi, na bebisaa no sɛ, “Yɛ nso yɛyɛ anifirafoɔ anaa?”

⁴¹ Na Yesu ka kyerɛɛ bɛ sɛ, “Sɛ honyɛ anifirafoɔ a nka bɔne nni ho ho. Na afei ho dɛ, ‘Yehu adeɛ.’ Ho bɔne he aka hɔ.”