Yohane 7 - Apam Foforɔ

Yesu nuanom annyeannie

¹ Yei akyi he, Yesu kɔɔ Galilea. Na ɔmpɛ sɛ ɔbɛkɔ Yudea efiri sɛ na Yudafoɔ he ɔɔhwehwɛ kwane bi afa so aku no.

² Afei na Yudafoɔ Apata Afahyɛ he abɛne.

³ Nti ne nuanom ka kyerɛɛ no sɛ, “Firi ha kɔ Yudea sɛ ɔbɛyɛ na w’asuafoɔ he nso behu nnwuma a wooyɔ,

⁴ efiri sɛ biaa a ɔpɛ sɛ nnipa bebree behu no he nni dwuma kokoam. Sɛ hoyɔ saa nnoɔma yi a, homfa ho ho nkyerɛ wiase.”

⁵ (Na ne nua mmeemanom mpo nnye no nni.)

⁶ Nti Yesu ka kyerɛɛ bɛ sɛ, “Me berɛ nnuruiɛ, na ho deɛ, berɛ biaa yɛ ma ho.

⁷ Wiase nni nnyinasoɔ biaa de tane ho, na me deɛ ɔtane me, efiri sɛ medi ne ho adanseɛ sɛ ne nnwuma yɛ bɔne.

⁸ Honkɔ afahyɛ he ase, me deɛ mennya nkɔɔ afahyɛ yi ase, efiri sɛ berɛ he nnuruiɛ.”

⁹ Na ɔkaa yeinom wieeɛ he, ɔtenaa Galilea.

Yesu kɔɔ afahyɛ he ase

¹⁰ Na ne nuammeemanom kɔɔ afahyɛ he ase he, ɔno nso kɔeɛ a wannyi ne ho adi na mmom ɔde ne ho sieeɛ.

¹¹ Na Yudafoɔ ɔɔhwehwɛ no afahyɛ he ase; na bebisaa sɛ, “Ɔya he?”

¹² Na bɛyɛɛ ne ho huhuhuhu pii nnipadɔm he mu. Binom kaa sɛ. “Ɔyɛ nipa pa.” Binom nso kaa sɛ, “Daabi, ɔɔdaadaa nkurofoɔ he.”

¹³ Nso, Yudafoɔ he ho hu nti, biaa anyi n’anim anka ne ho asɛm.

¹⁴ Afei berɛ a afahyɛ he duruu mfimfini he, Yesu kɔɔ asɔredane he mu, na ofirii aseɛ kyerɛkyerɛeɛ.

¹⁵ Na yei yɛɛ Yudafoɔ he nwanwa ma bɛkaa sɛ, “Ɔyɛɛ dɛ ne nipa a onsuaa nwoma biaa yi nim nwoma saa?”

¹⁶ Na Yesu buaa bɛ sɛ, “Nea me kyerɛkyerɛ he nyɛ me dea, na mmom ɔyɛ nea ɔsomaa me he dea.”

¹⁷ Sɛ bi pɛ sɛ ɔyɛ n’apɛdeɛ a, obehu sɛ nkyerɛkyerɛ he firi Nyankopɔn hɔ anaa m’ankasa ne mebɔ me tim kasa.

¹⁸ Bɛ a bɛbɔ betim kasa he hwehwɛ bɛ ankasa bɛ animuonyam; na nea ɔhwehwɛ nea ɔsomaa no he animuonyam he yɛ nɔkwafoɔ a nea ɔntene biaa nni ne mu.

¹⁹ “Ɔnyɛ Mose ne maa ho mmara he? Nso ho mu baako mpo nni mmara he so. Ɛɛne nti ne hoopɛ kwane afa so aku me?”

²⁰ Nnipa he buaa sɛ, “Wowɔ honhommɔne; hwane ne ɔɔhwehwɛ wo aku wo?”

²¹ Yesu buaa bɛ sɛ, “Maayɔ adwuma baako, na yei yɛ ho nyinaa nwanwa.

²² Mose maa ho twetiatwa (ɔnyɛ sɛ ofiri Mose hɔ, na mmom ofiri agyanom hɔ), na ho twa nipa twetia homeda.

²³ Sɛ hotumi twa nipa twetia homeda sɛ ɔbɛyɛ a ɔnto Mose mmara he a, ɛɛne nti ne ho bo afu me sɛ mama bi ho ayɛ ne dene homeda?

²⁴ Hommfa nea hohu mmmu atɛne, na hommu atɛntenenee.”

Kristo he di?

²⁵ Afei Yerusalemfoɔ he binom kaa sɛ, “Ɔnyɛ beema yi ne bɛɛpɛ no aku no yi?

²⁶ Nso, hwɛ ɔɔkasa peteem, nso bɛnka hwee nkyerɛ no. Nti mpanyimfoɔ he ahu sɛ ɔno ne Kristo he anaa?

²⁷ Yei deɛ yenim nea ofiri, nso Kristo he deɛ sɛ ɔba a, biaa onhu baabi a ofiri.”

²⁸ Nti berɛ a Yesu ɔɔkyerɛkyerɛ asɔredane mu hɔ he, ɔteaam sɛ, “Honim me, na honim baabi a mefiri nso. Na ɔnyɛ m’ankasa mepɛ so na me baeɛ, na nea ɔsomaa me he yɛ nɔkwafoɔ a honnim no.

²⁹ Menim no efiri sɛ, mefiri ne nkyɛne ne baeɛ, na ɔno ne somaa me.”

³⁰ Nti bɛhwehwɛɛ kwane a bɛbɛfa so akye no nso biaa amfa ne nsa anka no, efiri sɛ na berɛ he nnuruiɛ.

³¹ Na nnipakuo he mu pii gyee no diiɛ, na bebisaa sɛ, “Sɛ Kristo he ba a, ɔbɛyɔ nsɛnkyerɛnne asene nea nipa yi ayɔ yi anaa?”

Bɛsomaa Mpanyimfoɔ sɛ bɛnkɔ kye Yesu

³² Farisifoɔ he tee sɛ nnipakuo he oonwinwii keka yeinom fa ne ho, na Farisifoɔ ne asɔfoɔ mpanyimfoɔ he somaa asɔrefie awɛmfoɔ sɛ bɛnkɔ kye no.

³³ Yesu ka kyerɛɛ bɛ sɛ, “Meya ho nkyɛne berɛ tiaa bi, na meebɛkɔ nea ɔsomaa me he nkyɛne.

³⁴ Hobɛhwehwɛ me, na honhu me, na nea meya he, hontumi mma hɔ.”

³⁵ Yudafoɔ he bisaa bɛ ho bɛ ho sɛ, “Hefa ne nipa yi pɛ sɛ ɔkɔ a nti yenhu no? Ɔpɛ sɛ ɔkɔ Yudafoɔ a bɛahwete Helafoɔ mu he nkyɛne na ɔkɔkyerɛkyerɛ Helafoɔ he anaa?

³⁶ Abɛ asɛm ne ɔɔka yi sɛ, ‘Hobɛhwehwɛ me, na honhu me, na nea meya he, hontumi mma hɔ’?”

Nkwa Nsuo

³⁷ Da a otwa toɔ afahyɛ he mu he, Yesu gyinaa hɔ teaam sɛ, “Nea sukɔm de no he mmra me nkyɛne mɛnom nsuo.

³⁸ Sɛnea twerɛsɛm he aka he, ‘Nea ɔgye me di he, nkwa asubɔntene bɛtene afiri n’akomam.’ ”

³⁹ Nso ɔkaa yei faa Honhom a na bɛ a bɛbɛgye no adi he benya he ho, saa berɛ he na Honhom he nnya mmaeɛ, efiri sɛ na bennya nhyɛɛ Yesu animuonyam.

Nnipa he mu ntete mu

⁴⁰ Na bɛtee saa nsɛm yi he, nnipa bi firi nnipakuo he mu kaa sɛ, “Diyifoɔ he di ampa.”

⁴¹ Na binom nso kaa sɛ, “Kristo he di.” Na binom nso bisaa sɛ, “Kristo he befiri Galilea anaa?”

⁴² Twerɛsɛm he nkaa sɛ Kristo he befiri Dawid ase ne Betlehem, akuraa a na Dawid te mu he ne bɛba?”

⁴³ Afei Yesu nti nnipakuo he mu kyekyɛeɛ.

⁴⁴ Na bemu binom pɛɛ sɛ bɛkye no, nso biaa amfa ne nsa anka no.

Mpanyimfoɔ he Annyeanie

⁴⁵ Nti awɛmfoɔ he sane kɔɔ asɔfoɔ mpanyimfoɔ ne Farisifoɔ he hɔ, na bebisaa awɛmfoɔ he sɛ, “Mmɛ nti ne hoankye no?”

⁴⁶ Awɛmfoɔ he buaa sɛ, “Nipa biaa nkasaa sɛ beema yi da!”

⁴⁷ Afei Farisifoɔ he kaa sɛ, “Wadaadaa ho nso anaa?

⁴⁸ Mpanyimfoɔ he bi anaa Farisifoɔ he bi agye no atom anaa?

⁴⁹ Na nnipakuo yi a bennim mmara he—bɛadome bɛ!”

⁵⁰ Nikodemo a ɔbaa Yesu nkyɛne dabi he a na ɔyɛ bemu baako bisaa sɛ,

⁵¹ “Sɛ wonnii kane ntiee bi anum asɛm nhuu nea ɔɔyɔ a, nti yɛ mmara he tumi bu no atɛne?”

⁵² Bebuaa sɛ, “Womfiri Galilea, anaa wofiri hɔ? Hwehwɛ mu hwɛ na wobehu sɛ diyifoɔ biaa nni hɔ a obefiri Galilea asɔre.”

Baa he a bɛkyee no adwammammɔ mu he

⁵³ [Nti biaa kɔɔ fie.