Yohane 6 - Apam Foforɔ

Nnipa Mpem Num Aduanema

¹ Yeinom akyi he, Yesu kɔɔ Galilea po, nea bɛsane frɛ no Tiberia po, he agya.

² Na nnipakuo kɛseɛ kɔɔ so dii n’akyi, efiri sɛ behuu nsɛnkyerɛnne a na ɔɔyɔ ma ayarefoɔ.

³ Yesu kɔɔ bepɔ he so na ɔne n’asuafoɔ he tenaa hɔ.

⁴ Nso na Yudafoɔ Twam Afahyɛ he abɛne.

⁵ Afei Yesu maa n’ani so na ohuu sɛ nnipakuo kɛseɛ ɔɔba ne nkyɛne he, obisaa Filipo sɛ, “Hefa na yɛbɛtɔ paanoo ama nnipa yi adi?”

⁶ Obisaa yei de sɔɔ no hwɛeɛ, efiri sɛ na ɔno ankasa nim nea ɔɔbɛyɔ.

⁷ Filipo buaa sɛ, “Paanoo a ne boɔ bɛyɛ paani bosome nsia akatua mpo ɔnso bɛ sɛ bɛ mu biaa benya bi adi.”

⁸ Na asuafoɔ he mu baako, Andrea, Simon Petro nua beema, ka kyerɛɛ no sɛ,

⁹ “Abeemaa bi ya ha a ɔwɔ atokoɔ paanoo nnum ne nkyenam nketewa mmienu. Nso yei bɛyɛ nnipadɔm yi dɛ?”

¹⁰ Na Yesu kaa sɛ, “Homma nnipa he ntenatena ase!” Nso na serɛ pii ya hɔ. Nti mmeema a bɛ dodoɔ bɛyɛ mpem num tenatenaa ase.

¹¹ Na Yesu faa paanoo ne nkyenam he, na ɔdaa ase he, ɔkyɛ maa bɛ a bɛtete hɔ he; saa nso ne ɔmaa bɛ nkyenam he dodoɔ a biaa hia.

¹² Na bɛmemeeɛ he, ɔka kyerɛɛ n’asuafoɔ he sɛ, “Hommoaboa mproprowa he ano, na bi anyera.”

¹³ Nti bɛboaboa ano, na atokoɔ paanoo mproprowa he yɛɛ nkɛntɛne dummienu ma ma.

¹⁴ Afei nnipa he huu nsɛnkyerɛnne a Yesu yɔeɛ he, bɛkaa sɛ, “Nɔkwasɛm, diyifoɔ a ɔɔba wiase he di.”

¹⁵ Afei berɛ a Yesu huu sɛ bɛpɛ sɛ bɛkye no si no hene he, ɔno ankasa twee ne ho kɔɔ bepɔ he so bio.

Yesu nantee Nsuo so

¹⁶ Na nwunu doeɛ he, n’asuafoɔ he kɔɔ mpoano,

¹⁷ na bɛforo tenaa kodoɔ bi mu sɛ beetwa po he akɔ Kapernaum. Saa berɛ he na sum ahyɛ dada, na Yesu nnya mmaa bɛ nkyɛne.

¹⁸ Na mframa kɛseɛ bɔ maa po he huruiɛ.

¹⁹ Afei berɛ a bɛharee bɛyɛ nkwansini nnan he, behuu sɛ Yesu nam po he so ɔɔba kodoɔ he ho, na besuroeɛ.

²⁰ Nso ɔka kyerɛɛ bɛ sɛ, “Ɔyɛ me a, honnsuro.”

²¹ Afei deɛ na bɛpɛ sɛ ɔbɛtena kodoɔ he mu, na ankyɛre koraa ne kodoɔ he duruu asaase a bɛɛkɔ so he so.

Paanoo a ofiri Soro baeɛ

²² Adeɛ kyeeɛ he, nnipakuo a na begyina po he agya he huu sɛ kodoɔ biaa nni hɔ gye sɛ baako a n’asuafoɔ he kɔɔ mu he, nso Yesu ne bɛ ankɔ kodoɔ he mu, na n’asuafoɔ he nkoaa ne bɛkɔeɛ.

²³ Na afei akodoɔ firi Tiberia baa baabi a Awurade daa ase, na bedii paanoo he.

²⁴ Na nnipakuo he huu sɛ Yesu ne n’asuafoɔ he mu biaa nni hɔ he, bɛkɔtenatenaa kodoɔ nketewa mu baa Kapernaum bɛhwehwɛɛ Yesu.

²⁵ Na berɛ a behuu no po he agya he, bebisaa no sɛ, “Kyerɛkyerɛfoɔ, mmɛ berɛ ne wobaa ha?”

²⁶ Yesu buaa bɛ sɛ, “Nɔkwasɛm a ɔyam ne sɛ, ɔnyɛ nsɛnkyerɛnne a hohuiɛ nti ne hoohwehwɛ me, na mmom paanoo a hodi meeɛ he nti a.

²⁷ Honnyɔ aduane a ɔsɛe ho adwuma, na mmom honyɔ aduane a ɔtena hɔ de kɔ daa nkwam a Nipa Ba he de bɛma ho he ho adwuma, efiri sɛ, ɔno ne Agya Nyankopɔn ankasa de ne nsɔano agye no atom.”

²⁸ Nti bebisaa no sɛ, “Ɛɛne ne ɔsɛ sɛ yɛ yɔ na yɛayɔ Nyankopɔn nnwuma?”

²⁹ Yesu buaa bɛ sɛ, “Nyankopɔn adwuma ne sɛ hobɛgye nea ɔsomaa no he adi.”

³⁰ Nti bebisaa no sɛ, “Abɛ nsɛnkyerɛnne ne wobɛyɔ na yɛagye wo adi? Mmɛ adwuma ne wooyɔ?

³¹ Yɛ nananom dii mana serɛ he so sɛnea bɛatwerɛ he, ‘Ɔmaa bɛ paanoo a ofiri soro ma bediiɛ.’ ”

³² Na Yesu ka kyerɛɛ bɛ sɛ, “Meeka akyerɛ ho nɔkorem paa sɛ, ɔnyɛ Mose ne maa ho paanoo a ofiri soro he, na mmom m’Agya ne maa ho paanoo kann a ofiri soro he.

³³ Na Nyankopɔn paanoo ne nea osiane firi soro ba na ɔma wiase nkwa he.”

³⁴ Bɛka kyerɛɛ no sɛ, “Owura, ma yɛ paanoo he bi da biaa.”

³⁵ Yesu ka kyerɛɛ bɛ sɛ, “Mene nkwa paanoo he. Nea ɔba menkyɛne he kɔm ɔnne no da, na nea ɔgye me di he, sukɔm ɔnne no da.

³⁶ Nso maka akyerɛ ho sɛ, hoahu me nso honnye nni.

³⁷ Bibiaa a Agya he de bɛma me he bɛba me nkyɛne, na nea ɔba me nkyɛne he, mempam no da,

³⁸ efiri sɛ mefiri soro ne aba sɛ hobɛyɔ nea ɔsomaa me he apɛdeɛ, na ɔnyɛ m’ankasa me deɛ.

³⁹ Nea ɔsomaa me he apɛdeɛ ne sɛ memma nea ɔde ama me he mu biaa nyera, na mmom sɛ menyane no da a odi akyi he.

⁴⁰ Na m’Agya apɛdeɛ ne sɛ biaa a ohu Ba he na ɔgye no di he benya daa nkwa, na menyane no da a odi akyi he.”

⁴¹ Afei Yudafoɔ he firi aseɛ nwiinwii sɛ waka sɛ, “Mene paanoo a osiane firii soro he.”

⁴² Na bɛkaa sɛ, “Ɔnyɛ yei ne Yesu, Yosef ba, nea yenim ne papa ne ne maame he? Ɔyɛɛ dɛ ne afei deɛ ɔdɛ, ‘Mene paanoo a osiane firii soro he’?”

⁴³ Yesu buaa bɛ sɛ, “Honwiinwii ho mu.

⁴⁴ Biaa ntumi mma me nkyɛne gye sɛ Agya a ɔsomaa me he twe no ba; na menyane no nna odi akyire he.

⁴⁵ Bɛatwerɛ ya adiyifoɔ he mu sɛ, ‘Nyankopɔn bɛkyerɛkyerɛ bɛ nyinaa.’ Biaa a wate bibi afiri Agya he nkyɛne na wasua he ne ba me nkyɛne.

⁴⁶ Biaa nhuu Agya he, gye sɛ nea ofiri Nyankopɔn hɔ he; ɔno ne wahu Agya he.

⁴⁷ Meeka akyerɛ ho nɔkorem sɛ, biaa a ɔgye di he benya daa nkwa.

⁴⁸ Mene nkwa paanoo he.

⁴⁹ Ho nananom dii mana serɛ he so, na bewuwuiɛ.

⁵⁰ Yei ne paanoo a osiane firi soro he, sɛ biaa nni na wanwu.

⁵¹ Mene paanoo a nkwa yam a mesiane firi soro baeɛ he, sɛ bi di paanoo yi bi a, ɔbɛtena ase daa. Na paanoo a mede bɛma wiase nkwa he ne me honam.”

⁵² Na afei Yudafoɔ he firi aseɛ kasakasaa bɛ mu sɛ, “Ɔbɛyɛ dɛ na saa beema yi de ne honam ama yɛ adi?”

⁵³ Nti Yesu ka kyerɛɛ bɛ sɛ, “Meeka akyerɛ ho nɔkorem sɛ, sɛ hoanni Nipa Ba he honam na hoannom ne mogyaa a, honnya nkwa ya ho mu.

⁵⁴ Bɛ a bedi me honam na bɛnom me mogyaa he wɔ daa nkwa, na menyane bɛ nna odi akyire he,

⁵⁵ efiri sɛ me honam yɛ aduane ampa na me mogyaa yɛ anonneɛ ampa.

⁵⁶ Bɛ a bedi me honam na bɛnom me mogyaa tena me mu, na me nso metena bɛ mu.

⁵⁷ Sɛnea Agya a ɔte ase he somaa me he, na Agya he nti mete ase he, saa ara nso ne nea odi me honam he, me nti ɔbɛtena ase.

⁵⁸ Yei ne paanoo a osiane firii soro baeɛ a ɔnte sɛ nea ho nananom diiɛ na bewuiɛ he; nea odi paanoo yi bɛtena ase daa.”

⁵⁹ Ɔkaa saa nsɛm yi berɛ a na ɔɔkyerɛkyerɛ Kapernaum hyiadane mu.

Daa Nkwa Nsɛm

⁶⁰ Nti berɛ a n’asuafoɔ he mu bebree tee yei he, bɛkaa sɛ, “Asɛm yi ano ɔdene, hwane ne betumi agye?”

⁶¹ Nso esiane sɛ na Yesu nim sɛ n’asuafoɔ he nwiinwii yei ho nti, obisaa bɛ sɛ, “Yei to ho sintidua anaa?

⁶² Na afei, sɛ hohu Nipa Ba he sɛ ɔɔkɔ soro, baabi a na ɔya kane he nso ɛ?

⁶³ Honhom ne ma nkwa; honam deɛ nka hwee koraa. Nsɛm a maka akyerɛ ho yi yɛ honhom ne nkwa.

⁶⁴ Nso ho mu binom nnye nni.” Na ofiri mfitiaseɛ he na Yesu nnim bɛ a bɛnnye nni ne nea obeyi no ama he.

⁶⁵ Na ɔkaa sɛ, “Yei nti ne meka kyerɛ ho sɛ biaa ntumi mma me nkyɛne gye sɛ Agya he ama no kwane.”

⁶⁶ Yei nti n’asuafoɔ he bebree sane kɔɔ bɛ akyi, na bɛne no annante bio.

⁶⁷ Nti Yesu bisaa dummienu he sɛ, “Ho nso hopɛ sɛ ho kɔ anaa?”

⁶⁸ Simon Petro buaa sɛ, “Awurade, hwane nkyɛne ne yɛbɛkɔ? Wo nkoaa ne wowɔ daa nkwa nsɛm.

⁶⁹ Na yɛagye adi, na yɛahu sɛ wone Kronkronni a wofiri Nyankopɔn hɔ he.”

⁷⁰ Yesu buaa bɛ sɛ, “Nyɛ mene maayi ho nnipa dummienu yi? Nso ho mu baako yɛ bronsam.”

⁷¹ Na ɔɔka Yuda Iskariot, Simon ba he ho asɛm. Ewom sɛ na ɔyɛ dummienu he mu baako deɛ, nso na oobeyi Yesu ama.