Yakobo 4 - Apam Foforɔ

Wiase Adamfofa

¹ Hefa ne kõ ne apereapereɛ a ɔya ho mu yi firi ba? Omfiri ho akɔnnɔ a ɔne honam akwaa di ako ya ho mu he?

² Hopɛ bibi nso honnya; nti ho di awu. Ho anibere bibi nso honnya; nti hodi akõ ne apereapereɛ. Honnya, efiri sɛ hommisa.

³ Hobisa nso ho nsa nka, efiri sɛ hobisa no kwammɔne so, sɛdeɛ hode bedi ho honam akɔnnɔ ho dwuma.

⁴ Ei awaresɛefoɔ! Honnim sɛ wiase yi adamfofa yɛ tane a bɛ tane Nyankopɔn anaa? Biaa a ɔpɛ sɛ ɔyɛ wiase adamfo yɛ Nyankopɔn tamfoɔ.

⁵ Anaa hosusu sɛ twerɛsɛm he ka no kwa sɛ, “Nyankopɔn twe honhom a ɔde adua yɛ mu he ho ninkunu?”

⁶ Nso adom a ɔde ma he dɔɔso; nti ɔka sɛ, “Nyankopɔn si ahantafoɔ kwane, na ɔdom ahobrɛaseɛfoɔ.”

⁷ Ne saa nti hommrɛ ho ho ase nhyɛ Nyankopɔn ase. Honnsi bronsam kwane, na ɔbɛdwane afiri ho nkyɛne.

⁸ Hommɛne Nyankopɔn na ɔno nso bɛtwe abɛne ho. Honhohoro ho nsa, na homma ho akoma mu nte, ho nnebɔnyɛfoɔ a ho adwene yɛ ntanta.

⁹ Hontwa adwo na hommɔ bena na honsu. Homma ho anigyeɛ nnane benabɔ na ho ahosɛpɛ nso nane aboobodie.

¹⁰ Hommrɛ ho ho ase Awurade anim, na ɔbɛma ho so.

Atenyie ho kɔkɔbɔ

¹¹ Anuanom, honnnka nsɛmmɔne ntia ho ho. Nipa biaa a ɔka asɛmmɔne tia bi he anaa obu bi atɛne he, ɔka asɛmmɔne tia mmara he na obu mmara he atɛne; nso sɛ wobu mmara he atɛne a, wonyɛ mmara he sodifoɔ, na mmom, woyɛ temmufoɔ.

¹² Na Nyankopɔn ne yɛ mmarahyɛfoɔ ne temmufoɔ a obetumi agye nkwa na obetumi asɛe nso. Na wo ne hwane a wobu bi atɛne?

Mfa kyena nhoahoa wo ho

¹³ Mhõõ, afei ho nso ɛ! Ho a hoka sɛ, “Nnɛ anaa kyena yɛbɛkɔ kuro yei anaa foforɔ so na yɛadi afe hɔ, adi dwa na yɛapɛ sika,”

¹⁴ nso honnnim adekyeeɛ mu nsɛm. Honnim nea obesi ho nkwa ho? Hote sɛ huhuo a ɔya hɔ mmerɛ tiaa bi na ɔyera.

¹⁵ Nea ɔsɛ sɛ ho ka mmom ne sɛ, “Sɛ ɔyɛ Awurade pɛ a, yɛbɛtena ase ayɔ yei anaa yei.”

¹⁶ Nso sɛdeɛ ɔteɛ yi, ho hoahoa ho ho ahantan kwane so; saa ahohoahoa he nyinaa yɛ bɔne.

¹⁷ Nti nipa biaa a onim deɛ ɔyɛ na wannyɔ he, ɔyɛ bɔne mma no.