Yakobo 3 - Apam Foforɔ

Kɛtrɛma dwodwoɔ

¹ Anuanom, hommpere ho ho nyɛ akyerɛkyerɛfoɔ, efiri sɛ sɛnea honim he, bebebu yɛ a yɛyɛ akyerɛkyerɛfoɔ he atɛne a mu ɔdene;

² na yɛ nyinaa yɔ mfomsoɔ bebree. Nipa biaa a ɔnyɔ mfomsoɔ kasa mu he yɛ pɛ, na otumi to nipadua he nyinaa nnareka.

³ Sɛ yɛde nnareka to pɔnkɔ ano ma no yɔ setie ma yɛ a, yetumi ka aboa he kɔ faako a yɛpɛ.

⁴ Hwɛ hyɛne nso, ɔnam ne kɛseɛ nti mframa a mu ɔdene ne tumi pia no, nso bɛde bibi ketewa bi ne ka no ma deɛ hyɛnkafoɔ he pɛ sɛ ɔkɔ biaa odi so.

⁵ Saa ne kɛtrɛma nso teɛ, ɔyɛ honam akwaa a osua deɛ, nso ɔhoahoa ne ho nnoɔma akɛseɛ ho. Hwɛ kwaeɛ kɛseɛ a gya ketewa bi tumi hye ne nyinaa!

⁶ Na kɛtrɛma te sɛ gya; ɔyɛ nipadua akwaa a ɔte sɛ kuro a amumuyɔ ahyɛ mu ma, efiri sɛ, ɔde nkekaeɛ ba nipadua he nyinaa ho, na ɔde gya to asetena kwane nyinaa mu, na amanehunu kuro he mu ne ɔsɔ gya he.

⁷ Na dasani tumi hyɛ ntɔteboa ne ntakraboa, mmoa a bɛwea ne bɛ a bɛya po mu nyinaa so. Nipa tumi yɔ yei nyinaa

⁸ nso kɛtrɛma deɛ, ontumi nnya ho ahohyɛsoɔ, kɛtrɛma yɛ ade bɔne a ɔyɛ werɛmfoɔ a awuduro ahyɛ no ma.

⁹ Ɔno ne bɛde hyira Awurade ne Agya he, na ɔnoaa nso ne bɛde dome nnipa a bɛayɔ bɛ sɛ Nyankopɔn nsɛso.

¹⁰ Ano korɔ heaa mu ne nhyira ne nnome firi ba. Me nuanom, ɔnsɛ sɛ ɔba saa.

¹¹ Nti nsuo korɔgyee ne nsuo a ahono betumi afiri nsuo aniwa korɔ mu aba anaa?

¹² Me nuanom, sɛnea borɔdoma ntumi nso ngo aba he, na bobe nso ntumi nso borɔdoma aba he, saa ara nso ne asuti a ɔyɛ nkyenenkyene ntumi mma nsu pa.

Nyansa ahodoɔ mmienu

¹³ Ho mu hwane ne yɛ nyansafoɔ ne nimdefoɔ? Ma no mfa n’abrabɔ pa nkyerɛ sɛ ɔdwo, na ofiri nyansa mu ne yɔ ne nnwuma.

¹⁴ Nso sɛ ahoɔyeya dendenndene ne pɛsɛmenkomenya ya ho akoma mu a, honnhoahoa ho ho na honnni torɔ ntia nɔkorɛ he nso.

¹⁵ Saa nyansa yi mfiri soro, na mmom, ɔyɛ wiase nyansa a mfasoɔ biaa nni mu na ofiri ahonhommɔne.

¹⁶ Na baabi a anibereɛ ne pɛsɛmenkomenya ya he, hɔ nso ne basabasa ne bɔne nyinaa bi ya.

¹⁷ Na nyansa a ofiri soro he deɛ, deɛ odi kane ne sɛ, ho te, na afei ɔpɛ asomdwie, ɔdwo, ɔwɔ asoɔmmerɛ, ɔwɔ nteaseɛ; ahummɔborɔ ne aba pa ahyɛ no ma, a ɔnyɛ nyiyimu anaa nyaatwom kwane biaa so.

¹⁸ Na begu tenenee aba asomdwie mu ma bɛ a bɛpɛ asomdwie.