Yakobo 1 - Apam Foforɔ

Nkyea

¹ Yakobo, Nyankopɔn ne Awurade Yesu Kristo akoa, twerɛ krataa yi de kɔma abusuakuo dummienu a bɛabɔ ahwete he de nkyea mma bɛ nyinaa.

Kristoni ne Sɔhwɛ

² Me nuanom, sɛ hohyia sɔhwɛ ahodoɔ biaa a, hommu no anigyeɛ,

³ efiri sɛ honim sɛ, ho gyidie he sɔhwɛ yɛ boasetɔ ho adwuma.

⁴ Na homma boasetɔ nwie n’adwuma, sɛnea ɔbɛyɛ a ho bewie honhom mu nyini na ho ayɛ pɛ, a bibiaa ɔnka.

Nyansa a ofiri Nyankopɔn

⁵ Sɛ ho mu bi hia nyansa a, ma no mmisa Nyankopɔn a ɔma nnipa nyinaa adeɛ kwa na ahohora biaa nni mu he, na ɔde bɛma nipa korɔ he.

⁶ Na mmom ɔsɛ sɛ obisa no gyidie mu, a n’adwene ɔnyɛ no ntanta, efiri sɛ nea n’adwene yɛ no ntanta he te sɛ po asorɔkye a mframa bɔ no di akɔneaba.

⁷ Na mma saa nipa he nsusu sɛ obenya Awurade hɔ bibiaa;

⁸ efiri sɛ, nipa a n’adwene yɛ no ntanta he hinhim n’akwane nyinaa mu.

Hia ne ahonya

⁹ Ɔsɛ sɛ gyidini a ɔyɛ hiani he ma n’ani gye, efiri sɛ, ɔwɔ honhom mu ahonyadeɛ,

¹⁰ na defoɔ a ɔnyɛ gyidini he mma ne werɛ nho, efiri sɛ, ɔbetwam akɔ sɛ wiram nhwiren.

¹¹ Na sɛdeɛ awia de ne hyeɛ pie, na ɔhye wira mma ne nhwiren te tɔ, ma nhwiren he ahoɔfɛ sɛe he, saa ne defoɔ nso betwam akɔ berɛ a ogu so ɔɔyɔ ne nnwuma he.

Amaneɛ ne sɔhwɛ

¹² Nhyira ne nipa a ɔto ne bo ase sɔhwɛ mu. Na sɛ otumi gyina sɔhwɛ berɛ he mu a, obenya nkwa abotire a Awurade ahyɛ bɔ sɛ ɔde bɛma bɛ a bɛdɔ no he.

¹³ Sɛ sɔhwɛ ba bi so a, mma onii he nka sɛ, “Nyankopɔn asɔ me ahwɛ”, efiri sɛ bi ntumi mfa bɔne nsɔ Nyankopɔn nhwɛ, na ɔno nso nsɔ bi nhwɛ.

¹⁴ Na mmom bi akɔnnɔ ne gyegye no, daadaa no na ɔsɔ onii he hwɛ;

¹⁵ na sɛ saa akɔnnɔ he nyinsɛne a, ɔwo bɔne, na sɛ bɔne he nso nyini a, ɔwo wuo.

¹⁶ Me nuanom adɔfo, hommma bɛnnaadaa ho.

¹⁷ Akyɛdeɛ pa ne nnoɔma a ɔyɛ pɛ nyinaa firi soro, ofiri hann Agya he hɔ ne ba. Ɔno ne nsakraeɛ anaa adanedaneɛ sunsum biaa nni ne mu.

¹⁸ Ɔnam n’asɛm a ɔyɛ nɔkorɛ so ne woo yɛ, sɛdeɛ ɔbɛyɛ a ɔno ankasa ne pɛ bɛba mu, na yɛabɛyɛ sɛ n’abɔdeɛ mu aba a odi kane.

Asɛm he tie ne ne yɔ

¹⁹ Anuanom adɔfo, honhu yei sɛ: Ɔsɛ sɛ nipa biaa yɔ krado wɛne n’aso tie asɛm; ɔnsɛ sɛ ɔpere ne ho kasa; saa nso ne ɔnsɛ sɛ ɔpere ne ho fa abufuo;

²⁰ efiri sɛ, abufuo nna Nyankopɔn tenenee mma.

²¹ Nti honto fi ne bɔne nyinaa ngu, na homfa ahobrɛaseɛ nye Nyankopɔn asɛm a bɛadua ne ho mu a obetumi agye ho kra nkwa he.

²² Honyɛ asɛm he yɔfoɔ, na mmom honnyɛ atiefoɔ kɛkɛ, nnaadaa ho ho.

²³ Na sɛ bi tie asɛm he kɛkɛ na wamfa anni dwuma a, ɔte sɛ nipa a ɔhwɛ n’ anim ahwehwɛ mu;

²⁴ na sɛ ɔhwɛ n’anim na ofiri hɔ kɔ a, hɔaa na ne werɛ afiri sɛdeɛ na ɔteɛ he.

²⁵ Nso deɛ ɔhwɛ mmara a ɔyɛ pɛ mu he, mmara a ɔma ahofadie he tena ne mu, ɔnyɛ tiefoɔ werɛfirefoɔ na mmom ɔyɛ deɛ otie na ɔyɔ, bebehyira no deɛ ɔyɔ nyinaa mu.

²⁶ Sɛ bi dwene sɛ ɔyɛ nyamesomni, na woanto ne kɛtrɛma nnareka na mmom ɔdaadaa n’akoma a, na ne nyamesom he yɛ kwa.

²⁷ Nyamesom a ho te na nkekaeɛ nni mu a Agya Nyankopɔn ani sɔ di: Sɛ bi bɛdwene nyanka ne akunafoɔ ho, bɛ ahohiahia mmerɛ mu, na ɔbɛte ne ho afiri wiase nkekaeɛ ho.