Tito 3 - Apam Foforɔ

Akristofoɔ abrabɔ

¹ Kae Kreta asafo he sɛ bɛmmerɛ bɛ ho ase nhyɛ bɛ a bedi bɛ so ne tumidie ahodoɔ ase, bɛnyɛ setie, nsiesie bɛ ho ma nnwuma pa nyinaa,

² bɛnnka biaa ho asɛmmɔne, bɛnnyɛ ntɔkwapɛfoɔ, ɔsɛ sɛ bɛ dwo na bɛde anidie ma nnipa biaa,

³ efiri sɛ, berɛ bi a atwam a na yɛ nso yennim nyansa, na yɛyɛ asoɔdenfoɔ, na yɛamane afiri kwane pa he so, na yɛyɛ nkoa ma akɔnnɔ ahodoɔ ne anigyedeɛ he, yɛde nitane ne ahoɔyeya ne bɔɔ yɛ bra, a na yɛ ho yɛ ahi, tentanee yɛ ho yɛ ho.

⁴ Nso berɛ a yɛ Agyenkwa Nyankopɔn nnepa ne n’ayamyɛ daa adi he,

⁵ ɔgyee yɛ, ɔnyɛ tenenee nnwuma bi a yɛayɔ nti, na mmom ɔnam ne mmɔborɔhunu so faa nsuo adwareɛ a ɔnam awofoforɔ ne foforɔyɛ a ofiri Honhom Kronkron so ne gyee yɛ.

⁶ Saa Honhom yi ne ɔnam yɛ Agyenkwa Yesu Kristo so ahwie agu yɛ so pii,

⁷ sɛdeɛ ɔbɛyɛ a, yɛnam n’adom so benya bembuo na yɛabɛyɛ adedifoɔ daa nkwa anidasoɔ he mu.

⁸ Ɔyɛ nɔkwasɛm paa. Na yeinom ne mehwɛ sɛ wohyɛ mu kena, sɛdeɛ ɔbɛyɛ a bɛ a bɛabɛgye Nyankopɔn adi he bɛhwɛ yei sɛ bɛde bɛ ho bɛma nnwuma pa; yeinom ne yɛ paa na ɔyɛ mfasodeɛ ma nnipa.

⁹ Twe wo ho firi akyinnye hunu, ananasɛm, akasakasaa ne ntɔkwa a ɔfa mmara he ho, efiri sɛ, mfasoɔ nni so na ɔyɛ nnoɔma hunu.

¹⁰ Nipa a ɔde mpaepaemu ba a woakasa akyerɛ no baako ne ne mprenu so, na wantie he, wo ne no nya twaka biaa,

¹¹ efiri sɛ, wonim sɛ, saa nipa he yɛ debɔnyɛni a wayera kwane, na waabu ne ho fɔ.

Asɛm a otwa toɔ ne nhyira

¹² Sɛ mesoma Artema anaa Tihiko ba wo nkyɛne a, bɔ mmɔdene sɛ wobɛba me hɔ Nikopoli, efiri sɛ hɔ ne maabɔ me tim pɔ sɛ medi awɔ mmerɛ he.

¹³ Bɔ mmɔdene sɛ wobegya mmaranimfoɔ Sena ɔne Apolo kwane a bibiaa onhia bɛ.

¹⁴ Na ma yɛ nkurofoɔ nsua sɛ bebetu bɛ ho asi hɔ ama nnwuma pa na bɛde aboa nnoɔma a ohia paa, na bɛanyɛ nnipa a mfasoɔ nni bɛ so.

¹⁵ Bɛ a bɛka me ho nyinaa kyea wo. Kyea bɛ a bɛdɔ yɛ gyidie he mu nyinaa. Adom nka ho nyinaa!