Romafoɔ 3 - Apam Foforɔ

¹ Afei, mmɛ ne Yudani wɔ boro so? Anaa mmɛ mfasoɔ ne ya twetiatwa so?

² Ɔdɔɔso kwane hodoɔ bebree so, efiri sɛ nea odi kane he, Yudafoɔ he ne bɛde Nyankopɔn nsɛm hyɛɛ bɛ nsa.

³ Na sɛ bɛ mu binom annye anni ɛ? Nti bɛgye a bɛannye anni he bɛsesa Nyankopɔn nɔkorɛdie he anaa?

⁴ Daabi da! Ewom sɛ nnipa biaa nni nɔkorɛ, ma Nyankopɔn nyɛ nɔkwafoɔ, sɛnea bɛatwerɛ sɛ: “Sɛnea wobedi bem wo nsɛm mu. Na woadi nkunim w’atemmuo mu.”

⁵ Nti sɛ tene a yɛntene da Nyankopɔn tenenee adi a, mmɛ ne yɛbɛka? Nti Nyankopɔn ntene sɛ obehwie n’abufuo agu yɛ so? (Meka no nipa fam.)

⁶ Daabi da! Saa deɛ a mmɛ kwane ne Nyankopɔn bɛfa so abu wiase atɛne?

⁷ Nso sɛ tene a mentene ma Nyankopɔn nɔkorɛdie bu so ma n’animuonyam da adi a, mmɛ nti ne bɛda so bu me sɛ debɔneyɛni?

⁸ Na ɛɛne nti ne yɛnka sɛ (sɛnea binom ka to yɛ so sɛ, yɛ dɛ), “Homma yɛnyɔ nnebɔne na nnepa aba?” Bɛ afobuo fata bɛ!

Nipa biaa ntene Nyankopɔn anim

⁹ Hedeɛ asɛm he ne sɛ? Nti yɛ Yudafoɔ he kyɛne bɛ a bɛaka he anaa? Daabi, ɔnte saa koraa; efiri sɛ yɛadi kane aka sɛ, Yudafoɔ oo, Helafoɔ oo, biaa hyɛ bɔne tumi ase,

¹⁰ sɛnea bɛatwerɛ sɛ: “Biaa nni hɔ a ɔtene, baako mpo nni hɔ;

¹¹ Biaa nni nteaseɛ, biaa nni hɔ a ɔhwehwɛ Nyankopɔn.

¹² Biaa amane afiri kwanpa he so, bɛ nyinaa mfasoɔ nni bɛ so; biaa nni hɔ a ɔda ayamyɛ adi, biaa nni hɔ, baako mpo nni hɔ.”

¹³ “Bɛ mene mu yɛ awufoɔ adakamena a ano abie; bɛde bɛ kɛtrɛma di torɔ.” “Nankatia borɔ ya bɛ ano.”

¹⁴ “Duabɔ ne adenwono ahyɛ bɛ anum ma.”

¹⁵ “Bɛ nane ɔhare mogyahwieguo ho;

¹⁶ sɛeɛ ne awerɛhoɔ ya bɛ kwane so,

¹⁷ na asomdwie kwane deɛ, bennim.”

¹⁸ “Nyamesuro nni bɛ ani so.”

¹⁹ Afei yenim sɛ, nea mmara he ka biaa, ɔkasa kyerɛ bɛ a bɛya mmara he ase, sɛnea ɔbɛyɛ a ano biaa bɛka atom, na wiase nyinaa abu nkonta akyerɛ Nyankopɔn,

²⁰ efiri sɛ nipa biaa nni hɔ a obedi bem Nyankopɔn anim, sɛnea mmara he nnwuma teɛ, efiri sɛ yɛnam mmara he so ne yenya bɔne ho nimdeɛ.

Tenenee a ɔnam gyidie so ba

²¹ Na afei, bɛakwati mmara he ayi Nyankopɔn tenenee adi, na mmara he ne adiyifoɔ he di ho adanseɛ,

²² Nyankopɔn tenenee a ɔnam Yesu Kristo mu gyidie so ma bɛ a bɛgye di nyinaa. Na nyiyimu nnim,

²³ efiri sɛ nnipa nyinaa ayɔ bɔne na yɛtɔ sini Nyankopɔn animuonyam ho;

²⁴ na afei ɔyɛ akyɛdeɛ kwa sɛ Nyankopɔn nam n’adom ne gyeɛ a ɔya Kristo Yesu mu he so abu nnipa bem.

²⁵ Kristo ne Nyankopɔn de no asi hɔ sɛ ne mogyaa he nyɛ mpatadeɛ a nipa nam gyidie so ne nya mu kyɛfa; na Nyankopɔn de ayi ne tenenee adi sɛ nnebɔne a bɛyɔɔ no kane he, ɔnam ne boasetɔ so abu n’ani agu so;

²⁶ sɛnea ɔbɛyɔ a ɔbɛda n’ankasa ne tenenee adi saa berɛ yi mu, na berɛ a obu nipa a ɔwɔ Yesu mu gyidie bem he, ada adi sɛ ɔyɛ teneneeni mapa.

²⁷ Afei mmɛ ne ahohoahoa yi? Wɔayi afiri hɔ. Mmɛ nhyehyɛeɛ so na ɔnam? Mmara nnwuma so? Daabi, na mmom ɔnam gyidie nhyehyɛeɛ so.

²⁸ Na yesi no pi sɛ ɔnam gyidie so ne bebu bi bem, na mmom omfiri mmara nnwuma mu.

²⁹ Anaa Nyankopɔn yɛ Yudafoɔ nkoaa bɛ Nyankopɔn? Ɔnnyɛ Amanamane mufoɔ nso Nyankopɔn anaa? Ampa, ɔyɛ Amanamane mufoɔ nso Nyankopɔn,

³⁰ efiri sɛ, Nyankopɔn yɛ baako; na ɔnam gyidie korɔ he a so ne bebu twetiatwafoɔ ne bɛ a bentwaa bɛ twetia bem.

³¹ Ɔsɛ sɛ yɛde saa gyidie he tu mmara he gu anaa? Daabi da! Na mmom, yɛma mmara he ase tim.