Romafoɔ 2 - Apam Foforɔ

Nyankopɔn atemmuo a ɔtene

¹ Ne saa nti, adasamma nni anoyie biaa, sɛnea woteeɛ biaa, woobu bi atɛne he, na woobu woaa wo ho atɛne, efiri sɛ wo a woyɛ temmufoɔ he, woyɔ ade korɔ heaa.

² Hoka sɛ, “Yenim sɛ Nyankopɔn atemmuo a ɔba bɛ a bɛyɔ saa he so he tene.”

³ Nti, wo nipa, wosusu sɛ, sɛnea woteeɛ biaa, sɛ wobu bɛ a bɛyɔ saa he atɛne na wo nso woyɔ saa bi a, wobɛdwane Nyankopɔn atemmuo anaa?

⁴ Anaa wobu N’ayamyɛ pii a ɔno ne boasetɔ ne n’abodwokyɛre he animtia? Wonnim sɛ Nyankopɔn ayamyɛ botae ne sɛ ɔde wo bɛkɔ adwensakram?

⁵ Nso w’akoma pirim ɔne sesa a wompɛ sɛ wosesa nti, wooboaboa Nyankopɔn abufuo ano ama wo ho ama abufuo da he, berɛ a Nyankopɔn atemmuo a ɔtene he beyi ne ho adi;

⁶ efiri sɛ obetua biaa ka sɛnea biaa nnwuma teɛ:

⁷ bɛ a bɛde ntoboaseɛ yɔ papa hwehwɛ animuonyam ne anidie ne nea ɔmporɔ he, ɔbɛma bɛ daa nkwa;

⁸ nso bɛ a bedi ntuturasɛm; na bɛpo nɔkorɛ na bɛfa kwane a ɔntene so he, bebenya abufuo ne asotwe.

⁹ Na ahohiahia ne ahokyerɛ bɛba biaa a ɔyɔ bɔne so, Yudani kane, na afei Helani nso,

¹⁰ nso animuonyam ne anidie ne asomdwie bɛba biaa a ɔyɔ papa so, Yudani kane, na afei Helani nso,

¹¹ efiri sɛ Nyankopɔn nyɛ nyiyimu.

¹² Dodoɔ a benni mmara na bɛyɔɔ bɔne he, bɛbɛkwati mmara he nso ayera, na bɛ a bɛya mmara ase na bɛyɔɔ bɔne nyinaa bɛde mmara he bebu bɛ atɛne.

¹³ Na ɔnyɛ bɛ a betie mmara he ne bɛyɛ ateneneefoɔ Nyankopɔn ani so, na mmom bɛ a bɛyɛ mmara he yɔfoɔ nkoaa ne benya bembuo.

¹⁴ Sɛ Amanamane mufoɔ a benni mmara he, de bɛ awosuo yɔ deɛ mmara he hyɛ sɛ bɛnyɔ a, hedeɛ, ewom sɛ benni mmara he deɛ, nso nea bɛyɔ he yɛ mmara ma bɛ ankasa.

¹⁵ Bɛda no adi sɛ deɛ mmara he hyɛ sɛ bɛnyɔ he bɛatwerɛ no bɛ akomam, sɛnea bɛ ahonim nso di ho adanseɛ; na bɛ nsusuiɛ a ayɛ ntanta bɛtoto bɛ ano anaa obetwitwa agye bɛ

¹⁶ da a Nyankopɔn a ɔnam Yesu Kristo so, bebu nnipa nyinaa kokoam nsusuiɛ atɛne sɛnea asɛmpa a maka he teɛ.

Yudafoɔ ne mmara he

¹⁷ Nso sɛ wofrɛ wo ho Yudani, na wode wo ho to mmara he so, na wohoahoa wo ho Nyankopɔn mu,

¹⁸ na wonim n’apɛdeɛ na wokyerɛ nea ɔyɛ, efiri sɛ bɛatete wo mmara he mu,

¹⁹ na wogye di sɛ wokyerɛ anifirafoɔ kwane, woyɛ hann ma bɛ a bɛnam sum mu,

²⁰ wotene nkwaseafoɔ, woyɛ mmɔfra bɛ kyerɛkyerɛfoɔ, wowɔ mmara he a nimdeɛ ne nɔkorɛ ahyɛ no ma;

²¹ wo a afei deɛ, wokyerɛkyerɛ afoforɔ, wonkyerɛkyerɛ wo ho? Wo a wokasa tia korɔnobɔ he, wommɔ korɔno?

²² Wo a wokasa tia adwammammɔ he, wommɔ adwamane?

²³ Wo a wohoahoa wo ho mmara he mu, wommu mmara he so mfa mmu Nyankopɔn animtia?

²⁴ Saa nti ne bɛatwerɛ sɛ, “Wo nti bɛaka Nyankopɔn dini ho abususɛm Amanamane mu.”

²⁵ Na mmom sɛ wodi mmara he so a twetiatwa ho hia; nso sɛ wobu mmara he so a wo twetiatwa he dane bɛyɛ te sɛnea wontwaa twetia.

²⁶ Nti sɛ bɛ a bentwaa twetia he di mmara he so a, twetia a bentwaeɛ he nti bemmu bɛ sɛ bɛ a bɛatwa bɛ twetia anaa?

²⁷ Nti bɛ a honam fam bentwaa bɛ twetia na nso bedi mmara he so he bebu ho a bɛatwerɛ mmara he amma ho, na bɛatwa ho twetia nso hoto mmara he fɔ.

²⁸ Ɔnyɛ honam fam nnoɔma ne ma bi yɛ Yudani, saa ara nso ne twetiatwa kann nso nna adi anisoɔ ne honam fam nnoɔma mu.

²⁹ na mmom, sɛ bi yɛ Yudani mapa a, ɔyɛ no ne mu, na twetiatwa ankasa yɛ akoma mu asɛm; ɔyɛ honhom mu adeɛ, na mmom ɔnyɛ honam mu adeɛ. Nea ɔyɛ Yudani mapa he, n’ayeyie firi Nyankopɔn hɔ, na mmom ommfiri nnipa hɔ.