Romafoɔ 16 - Apam Foforɔ

Nkyea

¹ Afei medi yɛ nuabaa Foibe, somfoɔ a ɔya Kenkrea asafo mu ho adanse-pa kyerɛ ho,

² sɛnea ɔbɛyɛ a hobɛgye no Awurade mu sɛ anidie a ɔfata ahoteefoɔ, na hommoa no nea obebisa ho nyinaa ho, efiri sɛ waboa nnipa bebree a meaa nso meka ho bi.

³ Honkyea Priska ne Akwila, bɛ a bɛ ne meyɔ adwuma Kristo Yesu mu,

⁴ na bekuu bɛ ho maa me, me nkwa ho, na meda bɛ ase, ɔnyɛ bɛ nkoa na mmom Amanamane mufoɔ asafo he nyinaa nso ka ho bi.

⁵ Honkyea asafo a ɔya bɛ fie he nso. Honkyea me dɔfo Epaineto, a ɔyɛ Kristo mu abakane ya Asia he.

⁶ Honkyea Maria a, wayɔ adwuma dene paa ho mu he.

⁷ Honkyea Androniko ne Yunia, m’abusuafoɔ a na bɛka me ho afiase; bɛ a bedi mu asomafoɔ he mu, na bɛya Kristo mu ansa na meeba.

⁸ Honkyea Amplia a ɔyɛ me dɔfo Awurade mu.

⁹ Honkyea Urbano a ɔyɛ me yɔnko Kristo mu dwumayɔni, ne me dɔfoɔ Staki.

¹⁰ Honkyea Apele, a ɔsɔ ani Kristo mu. Honkyea bɛ a befiri Aristobulo abusua mu.

¹¹ Honkyea me busuani Herodion. Honkyea Narkiso abusuafoɔ a bɛya Awurade mu.

¹² Honkyea adwumayɔfoɔ a bɛya Awurade mu, Trifaina ne Trifosa. Honkyea dɔfoɔ Persi a wayɔ adwuma dene Awurade mu.

¹³ Honkyea Rufo a, bɛayi no Awurade mu; na honkyea ne maame—a ɔyɛ me nso me maame.

¹⁴ Honkyea Asinkrito, Flegon, Herme, Patroba, Herma, ne anuanom a bɛka bɛ ho.

¹⁵ Honkyea Filologo, Yulia, Nereo ɔne ne nuabaa, ne Olimpa, ne ahoteefoɔ a bɛ ne bɛya hɔ he.

¹⁶ Honkyeakyea ho ho dɔ kwane so. Kristo asafo he nyinaa kyea ho.

Nkyerɛkyerɛ a otwa toɔ

¹⁷ Anuanom, mehyɛ ho nkurane sɛ, honhwɛ ho ho yie bɛ a bɛde mpaepaemu ne sintiduatoɔ, de ko tia nkyerɛkyerɛ a hoasua he; hontwe ho ho mfiri bɛ ho,

¹⁸ efiri sɛ nnipa a bɛte saa he nsom yɛ Awurade Kristo, na mmom bɛsom bɛ a bɛ akɔnnɔ, na bɛde kɛtrɛma dɛ ne adɛfɛdɛfɛsɛm daadaa bɛ a bennim bɔne he akoma.

¹⁹ Nti ɔma m’ani gye ho ho, mepɛ sɛ honya nnepa ho nyansa, na honte ho ho mfiri bɔne ho koraa.

²⁰ Asomdwie Nyankopɔn he bɛpɛkyɛ Satan ho nane ase ntɛm. Yɛ Awurade Yesu Kristo adom nka ho ho.

²¹ Timoteo, me yɔnko dwumayɔni, ne Lukio ne Yason ne Sosipatro a bɛyɛ m’abusuafoɔ kyea ho.

²² Me Tertio a meetwerɛ Paulo ano asɛm yi, me nso mekyea ho Awurade mu.

²³ Gaio a ɔyɛ me ne asafo he nyinaa fiewura nso kyea ho. Erasto, kurom ha sikakorafoɔ, ne yɛ nua beema Kwarto nso kyea ho.

²⁴ [Yɛ Awurade Yesu Kristo adom nka ho nyinaa. Amen.]

Nhyirasɛm a otwa toɔ

²⁵ Afei Nyankopɔn a otumi hyɛ ho dene sɛnea m’asɛmpa he teɛ ne Yesu Kristo ho asɛnka, sɛnea adiyie ahintasɛm a bɛde siee teteete

²⁶ nso afei deɛ bɛayi no adi, na ɔnam adiyifoɔ ntwerɛe so a bɛama Amanamane mufoɔ bɛahu, sɛnea daa daa Nyankopɔn hyɛeɛ he, sɛ ɔde setie a ɔkɔ gyidie mu—

²⁷ Nyankopɔn a ɔno ne nyansafoɔ korɔ he, animuonyam mfa Yesu Kristo so, nka no daa! Amen.