Mateo 7 - Apam Foforɔ

Atenyie ho nkyerɛkyerɛ

¹ Hommmu atɛne, na bɛammu ho atɛne.

² Na atɛne a hobu he ɔnoaa ne bɛde bebu ho, na deɛ wode susu he, ɔno ne bɛde besusu ama ho.

³ Mmɛ nti ne wohwɛ wo yɔnko ani ase mfrɛ, na wonnwene mpuna a ɔda w’ani so he ho?

⁴ Anaa mmɛ nti ne wotumi ka kyerɛ wo yɔnko sɛ, Mma menyi w’ani ase mfrɛ berɛ a mpuna da so da w’ani so?

⁵ Wo nyaatwomni, di kane yi mpuna a ɔda w’ani so he, na ɔbɛma woahu yie na woatumi ayi wo yɔnko ani ase mfrɛ.

Honngu ade kronkron ho fi

⁶ Hommfa ade kronkron mma nkramane; na honnto ho nhwene pa ngu mma mprako, na bɛamfa bɛ nane antiatia so na bɛannane amma ho so ammɛseɛ ho.

Adesrɛ

⁷ Hommisa, na bɛde bɛma ho; honhwehwɛ, na hobehu; hommom, na bebebie pono he ama ho.

⁸ Na biaa a obisa he, ne nsa ka, na biaa a ɔhwehwɛ he, ohu, na biaa a obom he bebie pono he ma no.

⁹ Ho mu hwane ne ne ba bisa no paanoo a ɔbɛma no boɔ?

¹⁰ Anaa ne ba bisa no adwene a ɔbɛma no wɔ?

¹¹ Na afei sɛ ho a hoyɛ nnebɔnyɛfoɔ mpo de nnepa mma ho mma a, ɔbɛyɛ dɛ ne ho Agya a ɔya soro he ɔmmfa nnoɔma pa mma bɛ a bebisa no!

Mmara titire

¹² Nti adeɛ biaa a hopɛ sɛ nnipa yɔ ma ho he, honyɔ saa mma bɛ; na yei ne nea mmara he ne adiyifoɔ he ka.

Akwane ahodoɔ mmienu

¹³ Homfa pono teaa he mu nwuram; na kwane deɛ ɔkɔ sɛeɛ mu he pono trɛ na so fa ɔmmerɛ, na dodoɔ ne fa saa kwane he so.

¹⁴ Na pono teaa, ɔne kwane teaa he so fa ɔdene na ɔno ne kɔ nkwa mu, na nnipa kakraa bi ne hu saa pono ne kwane he.

Dua ne n’aba

¹⁵ Honhwɛ yie atorɔ adiyifoɔ ho, bɛ a bɛfira dwane nwoma ba ho nkyɛne nso bɛ mu paa deɛ bɛyɛ mpataku.

¹⁶ Bɛ aduaba ne hode behu bɛ. Bɛtete bobe nkasɛe so anaa bɛtete borɔdoma hwerɛmo so?

¹⁷ Saa nso ne dua pa biaa so aba pa, na dua bɔne so aba bɔne.

¹⁸ Dua pa ntumi nso aba bɔne, saa nso ne dua bɔne ntumi nso aba pa.

¹⁹ Dua biaa a ɔnso aba pa he betwa to twene gya mu.

²⁰ Nti bɛ aba ne hode behu bɛ.

Setie ho nkyerɛkyerɛ

²¹ Ɔnyɛ biaa a ɔfrɛ me sɛ, Awurade, Awurade, ne bɛkɔ soro ahennie mu, na mmom deɛ ɔyɔ m’Agya a ɔya soro he apɛdeɛ.

²² Saa da he, bebree bebisa me sɛ, Awurade, Awurade, yɛamfa wo dini anhyɛ nkɔm, na yɛamfa wo dini antutu ahonhommɔne, na yɛamfa wo dini annyɔ tumideɛ pii anaa?

²³ Na mɛpae mu aka akyerɛ bɛ sɛ, Mennim ho da; homfiri me so nkɔ, ho a hoyɔɔ nnebɔne.

Abotane ne anwea so dansie

²⁴ “Nipa biaa a otie me nsɛm yi na ɔyɔ bɛyɛ sɛ nyansani a osii ne dane abotane so.

²⁵ Nsuo tɔeɛ, nsuhyiri baeɛ, na mframa bɔ bɛbɔɔ no, nso ammu angu, efiri sɛ otoo ne fapem he abotane so.

²⁶ Nso nipa biaa a otie me nsɛm yi na ɔnnyɔ he bɛyɛ sɛ bi a onnim nyansa a osii ne dane anweam.

²⁷ Nsuo tɔeɛ, nsuhyiri baeɛ, mframa bɔ bɛbɔɔ no, na obu guu fam tim bubuu pasaa!”

²⁸ Na afei, berɛ a Yesu kaa nsɛm yi wieeɛ he, nnipadɔm he ho dwirii bɛ ne nkyerɛkyerɛ he ho,

²⁹ efiri sɛ ɔkyerɛkyerɛɛ bɛ sɛ bi a ɔwɔ tumi, na ɔnyɛ sɛnea bɛ atwerɛfoɔ he kyerɛkyerɛ he.