Mateo 5 - Apam Foforɔ

Bepɔ so asɛnka—Nhyirasɛm

¹ Berɛ a Yesu huu nnipadɔm he, ɔkɔɔ bepɔ he so; na ɔtenaa ase he, n’asuafoɔ baa ne nkyɛne.

² Na afei obiee na no kasaeɛ, na ɔkyerɛkyerɛɛ bɛ sɛ:

³ “Nhyira ne bɛ a ahia bɛ honhom mu, efiri sɛ bɛ ne soro ahennie he yɛ bɛ dea.

⁴ Nhyira ne bɛ a bedi awerɛhoɔ, efiri sɛ bɛ ne bebenya awerɛkyekyerɛ.

⁵ Nhyira ne bɛ a bɛdwo, efiri sɛ bɛ ne bebedi asaase he so.

⁶ Nhyira ne bɛ a tenenee ho kɔm ne sukɔm de bɛ, efiri sɛ bɛ ne bɛbɛma bɛammee.

⁷ Nhyira ne bɛ a behu afoforɔ mmɔbɔ, efiri sɛ bɛ ne bebehu bɛ mmɔbɔ.

⁸ Nhyira ne bɛ a bɛ akoma mu te, efiri sɛ bɛ ne bebehu Nyankopɔn.

⁹ Nhyira ne bɛ a bɛhwehwɛ asomdwie, efiri sɛ bɛ ne bɛbɛfrɛ bɛ Nyankopɔn mma.

¹⁰ Nhyira ne bɛ a tenenee nti bɛtaa bɛ, efiri sɛ bɛ ne bebenya soro ahennie he.

¹¹ Nhyira ne ho sɛ nnipa ka nsɛm gu ho so, na bɛtaa ho na bɛka nsɛmmɔne bebree fa ho ho, na me nti bedi torɔ gu ho so.

¹² Homma ho ani nnye, efiri sɛ howɔ akatua kɛseɛ ya soro, na saa ne bɛtane adiyifoɔ a bedii ho anim kane he.

Mfantoho a ɔfa nkyene ne hann ho

¹³ Hone asaase yi so nkyene; nso sɛ nkyene dɛ yera a, ɔbɛyɛ dɛ na ayɛ nkyene bio? Bɛmmfa nnyɔ hwee bio, gye sɛ bɛto gu ma betiatia so.

¹⁴ Hoyɛ wiase hann. Kuro a ɔda mmepɔ so ntumi nhinta.

¹⁵ Nipa biaa nsɔ kanea mmfa nnhyɛ atam ase, na mmom bɛde si kanea dua so, na ahyerɛn ama nnipa a bɛya fie hɔ nyinaa.

¹⁶ Ne saa nti homma ho kanea nhyerɛn mma nnipa nyinaa, na bɛahu ho nnwuma pa na bɛahyɛ ho Agya a ɔya soro he animuonyam.

Mmara he ho nkyerɛkyerɛ

¹⁷ Honnwene sɛ maaba sɛ meebeyi mmara ne adiyifoɔ he hɔ; mamma sɛ meebeyi no hɔ, na mmom maaba sɛ meebɛma no aba mu pefee.

¹⁸ Nɔkorɛ meeka akyerɛ ho, kosi sɛ soro ne asaase betwam he, atwerɛdeɛ anaa nsensaneɛ ketewa baako mpo omfiri mmara he mu kosi sɛ ne nyinaa bɛba mu.

¹⁹ Ne saa nti, nipa biaa a obebu mmara nsɛm ketewa baako mpo so, na ɔbɛkyerɛkyerɛ binom ama bɛayɔ saa he, ɔbɛyɛ ketewa soro ahennie mu; nso deɛ odi so na ɔkyerɛkyerɛ ma nnipa di so he ɔbɛyɛ kɛseɛ soro ahennie mu.

²⁰ Meeka akyerɛ ho, sɛ ho tenenee ammoro atwerɛfoɔ ne Farisifoɔ bɛ deɛ so a, honnya soro ahennie mu kwane da.

Abufuo ho nkyerɛkyerɛ

²¹ “Hoate sɛ bɛka kyerɛɛ tetefoɔ he sɛ, ‘Honni awu; na nea odi awu biaa bedi fɔ atemmuo mu.’

²² Na me deɛ meeka akyerɛ ho sɛ, sɛ wo bo fu wo nua a, wobedi fɔ atemmuo mu; wodi wo nua atɛm sɛ nipahunu a wobedi fɔ mpanyimfoɔ atitire he asɛniiɛ; na sɛ woka sɛ, ‘Woyɛ kwasea’ a, wobedi fɔ akɔ gya a onnum da mu.

²³ Nti sɛ wode afɔrebɔdeɛ ba afɔrebokyia ho, na wokae sɛ wo nua wɔ bibi tia wo a,

²⁴ nea odi kane a ɔsɛ sɛ woyɔ ne sɛ, gya w’afɔrebɔdeɛ he afɔrebokyia he so na wo ne no nkobom, na ɔno akyi he woasane aba abɛbɔ w’afɔdeɛ.

²⁵ Sɛ wo ne wo soboɔbɔni nam kwane so ɔɔkɔ asennibea a, yɛ ntɛm na wo ne no mmom ansa na wo ne no aduru asennibea hɔ, anyɛ saa a wo soboɔbɔni he de wo bɛhyɛ temufoɔ nsa, na temufoɔ he so de wo ahyɛ wɛmfoɔ nsa, na ɔde wo akɔto afiase.

²⁶ Nɔkorɛ, meeka akyerɛ ho, wonnya kwane mmfiri kosi sɛ wobetua wo kaprɛ a aka wo nsam he ansa.”

Awaresɛeɛ ho nkyerɛkyerɛ

²⁷ “Hoate sɛ bɛkaa sɛ, ‘Nsɛe awadeɛ.’

²⁸ Na me deɛ meeka akyerɛ ho sɛ biaa a ɔhwɛ baa akɔnnɔ so sɛ nka ɔpɛ sɛ ɔne no bɛda he afa no n’akomam dada.

²⁹ Sɛ w’ani nifa to wo sintidua a, tu firi hɔ na to twene; ɔyɛ ma wo sɛ wobɛhwere akwaa baako kyɛne sɛ wode nipadua he nyinaa bɛto amanehunu gya mu.

³⁰ Na sɛ wo nsa nifa to wo sintidua a, twa firi hɔ na to twene; ɔyɛ ma wo sɛ wobɛhwere akwaa baako kyɛne sɛ bɛde nipadua he nyinaa bɛto amanehunu gya mu.”

Awaregyaeɛ ho nkyerɛkyerɛ

³¹ “Afei nso, bɛkaa sɛ, ‘Biaa a obegyae ne yerɛ he, ɔmma no awaregyaeɛ krataa.’

³² Na me deɛ meeka akyerɛ ho sɛ, sɛ bi gyae ne yerɛ na ɔnyɛ adwamammɔ nti ne ogyae no a, obetumi ama baa he aseɛ awareɛ; na biaa a ɔbɛware baa a bɛagyae no he nso aseɛ awareɛ.

Ntanka ho nkyerɛkyerɛ

³³ “Bio, hoate sɛ bɛka kyerɛɛ tetefoɔ he sɛ, ‘Nka ntanhunu, nso fa wo ntankadeɛ ma Awurade.’

³⁴ Na me deɛ meeka akyerɛ ho sɛ, Nka ntam koraa, mfa soro nka ntam, efiri sɛ ɔyɛ Nyankopɔn ahennwa,

³⁵ saa nso ne mfa asaase nka ntam, efiri sɛ ɔyɛ ne nane ntiasoɔ; mfa Yerusalem nso nka ntam, efiri sɛ ɔyɛ Hene kɛseɛ he ahenkuro.

³⁶ Na nka wo ti ntam, efiri sɛ wontumi nnyɔ tinwii baako mpo fufuo anaa tuntum.

³⁷ Na ma nea wobɛka sɛ ɔyɛ ‘ɛɛ, he, nyɛ ɛɛ’, na nea wobɛka sɛ ‘daabi, he nso nyɛ daabi’; yei akyi ade foforɔ biaa firi bɔne mu.

Awerɛtɔ ho nkyerɛkyerɛ

³⁸ “Hoate sɛ bɛkaa sɛ, ‘ani nsi ani ananem, na sẽ nso nsi sẽ ananem.’

³⁹ Na me deɛ meeka akyerɛ ho sɛ, Ho ne bɔnefoɔ nni asie. Nso sɛ bi pae w’aso nifa mu a, dane baako he nso ma no;

⁴⁰ sɛ bi pɛ sɛ ɔne wo di asɛm na ɔfa w’ataadeɛ ngusoɔ a, fa deɛ ɔhyɛ aseɛ he so ka no ho;

⁴¹ na sɛ bi hyɛ wo sɛ wo ne no nkɔ borɔfo-kwansini baako a, kɔ borɔfo-kwansini mmienu.

⁴² Adeɛ biaa a bi bɛsrɛ afiri wo hɔ he, fa ma no, na deɛ ɔfɛm bibi firi wo hɔ biaa nkame no.

Dɔ w’atamfoɔ

⁴³ “Hoate sɛ bɛkaa sɛ, ‘Dɔ wo yɔnko na tane w’atamfoɔ.’

⁴⁴ Na me deɛ meeka akyerɛ ho sɛ, Honnɔ ho atamfoɔ na hommɔ mpaeɛ mma bɛ a bɛtaa ho,

⁴⁵ saa ne bɛma ho ayɛ ho Agya a ɔya soro he mma; efiri sɛ ɔma awia pie abɔnefoɔ ne ateneneefoɔ so, na ɔtɔ nsuo gu ateneneefoɔ ne bɛ a bɛnnyɛ ateneneefoɔ so.

⁴⁶ Na sɛ hodɔ bɛ a bɛdɔ ho a, mmɛ akatua ne hobenya? Togyefoɔ mpo nnyɔ saa anaa?

⁴⁷ Na sɛ ho kyea ho nuanom nkoaa a, mmɛ ne ho ayɔ akyɛne binom? Amanamane mufoɔ mpo nnyɔ saa?

⁴⁸ Honyɛ pɛ, efiri sɛ, ho Agya ɔya soro he yɛ pɛ.