Mateo 28 - Apam Foforɔ

Yesu wusɔreɛ

¹ Na homeda twaa mu he, nnawɔtwe he da a odi kane ahemakye, Maria Magdalene ne Maria foforɔ he baa sɛ bɛbɛhwɛ da he.

² Na mpofirem, asaasewosoɔ kɛseɛ siiɛ, na Awurade bɔfoɔ firi soro siane baeɛ, beminii boɔ he firii da he ano, na ɔtenaa so.

³ Na ne ho te sɛ anyinam, na n’ataadeɛ yɛ fitaa sɛ asukɔtwea.

⁴ Na ne ho hu nti, awɛmfoɔ he ho popoeɛ, na bɛyɛɛ sɛ nea bɛawuwu.

⁵ Nso bɔfoɔ he ka kyerɛɛ mmaa he sɛ, “Honnsuro! Na menim sɛ hoohwehwɛ Yesu a bɛbɔɔ no asennua mu he.

⁶ Onni ha, na wanyane sɛdeɛ ɔkaeɛ he. Hommra mmɛhwɛ baabi a na ɔda!

⁷ Na honkɔ ntɛm nkɔka nkyerɛ n’asuafoɔ he sɛ, ‘Wanyane afiri awufoɔ mu. Na hwɛ, oodi ho anim kane akɔ Galilea, hɔ ne hobehu no.’ Hwɛ, maka akyerɛ ho.”

⁸ Nti befirii damena he so ntɛmaa de suro ne anigye kɛseɛ tutuu mmirika sɛ bɛɛkɔka akyerɛ n’asuafoɔ he.

⁹ Na ntɛmaa, Yesu hyiaa bɛ kaa sɛ, “Asomdwie nka ho!” Na bɛbaa ne nkyɛne bɛsɔɔ ne nane koto sɔree no.

¹⁰ Afei Yesu ka kyerɛɛ bɛ sɛ, “Honnsuro; honkɔ nkɔbɔ me nuanom amaneɛ sɛ bɛnkɔ Galilea; na bebehu me hɔ.”

Awɛmfoɔ he amanebɔ

¹¹ Bere a bɛnam kwane so ɔɔkɔ he, hwɛ, awɛmfoɔ he bi kɔɔ kuro he mu kɔkaa deɛ asi nyinaa kyerɛɛ asɔfo mpanyimfoɔ he.

¹² Na berɛ a bɛ ne mpanyimfoɔ he hyiaeɛ he betuu agyina bɔɔ pɔ maa awɛmfoɔ he sika kɛseɛ

¹³ ka kyerɛɛ bɛ sɛ “Honka sɛ, ‘Anadwo a na yɛadeda he ne n’asuafoɔ he bewiaa no.’

¹⁴ Na sɛ Amrado he te yei a, yɛbɛkyerɛ no mu na ho ho anka adwaam.”

¹⁵ Nti bɛgyee sika he, ne bɛkɔyɔɔ sɛdeɛ bɛhyɛɛ bɛ he. Na asɛm yi atrɛ Yudafoɔ mu de besi nnɛ.

Asɛmpatrɛ adwuma ho ahyɛdeɛ

¹⁶ Afei asuafoɔ dubaako he kɔɔ, bepɔ bi a ɔya Galilea a na Yesu akyerɛ bɛ he so.

¹⁷ Behuu no he, bɛkoto sɔree no, nso binom gyee akyinnye.

¹⁸ Na Yesu ba bɛka kyerɛɛ bɛ sɛ, “Bɛde soro ne asaase so tumi nyinaa ama me.

¹⁹ Nti honkɔyɛ amane nyinaa m’asuafoɔ, na hommɔ bɛ asu nhyɛ Agya he, Ɔba he ne Honhom Kronkron he dini mu,

²⁰ na honkyerɛkyerɛ bɛ sɛ benni deɛ mahyɛ ho nyinaa so. Na hwɛ, me ne ho ya hɔ nna nyinaa de kosi wiase awieeɛ.”