Mateo 25 - Apam Foforɔ

Yesu de soro ahennie he totoo Mmabaa bi ho

¹ Yesu kaa sɛ, “Afei nso soro ahennie he bɛyɛ sɛ mmabaa du bi a bɛfaa bɛ nkanea sɛ beekohyia ayefokunu.

² Na bɛ mu nnum yɛ mmadwemma, na nnum nso nyɛ mmadwemma.

³ Berɛ a bɛ a bɛnyɛ mmadwemma he faa bɛ nkanea he bɛamfa ngo anka ho;

⁴ nso mmadwemma he deɛ bɛfaa ngo kaa bɛ nkanea he ho.

⁵ Ɔkyɛreɛ a ayefokunu he mmaeɛ he, bɛ nyinaa bɛ ani kumiiɛ na bɛdedaeɛ.

⁶ Nso anadwo dasuom bɛtee nteamu, ‘Hwɛ, ayefokunu he di! Hommra mmehyia no.’

⁷ Nti mmabaa he nyinaa sɔre sosɔɔ bɛ nkanea he.

⁸ Bɛ a bɛnyɛ mmadwemma he ka kyerɛɛ mmadwemma he sɛ, ‘Homma yɛ ho ngo yi bi, na yɛ nkanea he oodumdum.’

⁹ Nso mmadwemma he buaa bɛ sɛ, ‘Daabi, ɔnso yɛ ne ho; honkɔ adetɔnfoɔ hɔ nkɔtɔ bi.’

¹⁰ Na bɛkɔɔ sɛ bɛɛkɔtɔ bi he, ayefokunu he baeɛ, na bɛ a bɛasiesie bɛ ho he ne no kɔɔ ayefohyia he ase; na bɛtoo pono he mu.

¹¹ Yei akyi he, mmabaa a bɛnyɛ mmadwemma he nso baeɛ, na bɛkaa sɛ, ‘Owura, owura, bie yɛ.’

¹² Nso obuaa sɛ, ‘Nɔkorɛ meeka akyerɛ ho, mennim ho.’

¹³ Saa nti honwɛne, efiri sɛ honnim da anaa dɔnhwere korɔ he a (Nipa Ba he bɛba.)

Akontabuo ho mfantoho

¹⁴ “Na ɔte sɛ beema bi a ootu kwane, na ɔfrɛɛ ne nkoa na ɔde n’agyapadeɛ hyɛɛ bɛ nsa;

¹⁵ ɔmaa baako sika dwetire mmɔho nnum, na foforɔ so mmɔho mmienu na foforɔ so baako, sɛdeɛ biaa ahoɔdene teɛ. Na ɔkɔɔ ne kwane.

¹⁶ Deɛ onyaa sika dwetire nnum he ntɛmaa ɔde kodii dwa, na ɔnyaa sika dwetire mmɔho nnum kaa ho.

¹⁷ Saa ne deɛ onyaa mmienu he nso nyaa mmienu kaa ho.

¹⁸ Nso deɛ onyaa baako he kɔ kotutuu fam na ɔde ne wura sika he siee hɔ.

¹⁹ Mmerɛ tentene bi akyi he, nkoa he wura he baeɛ na ɔne bɛ bebuu akonta.

²⁰ Na deɛ onyaa sika dwetire mmɔho nnum he baa anim, de sika dwetire mmɔho nnum foforɔ baeɛ, ɔkaa sɛ ‘Owura, womaa me sika dwetire mmɔho nnum; hwɛ mede nnum abɛka ho.’

²¹ Ne wura he ka kyerɛɛ no sɛ, ‘Mo ne yɔ, akoa pa ne nɔkwafoɔ; woadi kakra yi ho nɔkorɛ, mede nnoɔma bebree bɛhyɛ wo nsa; nya wo wura anigye he bi.’

²² Na nea ɔnyaa sika dwetire mmɔho mmienu he so baeɛ, bɛkaa sɛ, ‘Owura, womaa me sika dwetire mmɔho mmienu; hwɛ manya mmɔho mmienu aka ho.’

²³ Ne wura he ka kyerɛɛ no sɛ, ‘Mo ne yɔ, akoa pa nɔkwafoɔ; woadi kakra yi ho nɔkorɛ, mede nnoɔma bebree bɛhyɛ wo nsa; nya wo wura anigye he bi.’

²⁴ Afei deɛ onyaa sika dwetire baako he nso baeɛ, bɛkaa sɛ, ‘Owura, menim sɛ woyɛ bi a wo asɛm ɔdene, wotwa aba firi baabi a wonnuaeɛ, na woboaboa ano baabi wonto aba mpeteeɛ;

²⁵ nti mesuroeɛ, na mede wo sika he kosiee fam. W’adeɛ di, gye.’

²⁶ Nso ne wura he buaa sɛ, ‘Wo akoa bɔne ne anihafoɔ! Wonnim sɛ metwa baabi a mennguiɛ, na meboaboa ano baabi a memmfa mmpeteɛ?

²⁷ Saa deɛ a nka ɔsɛ sɛ wode me sika he kɔto sika korabea, na mesane ba a, manya me sika he ne ho ba.

²⁸ Afei honye mfiri ne nsam, homfa mma nea ɔnyaa dwetire du he.

²⁹ Na bɛ a bɛanya bi aka nea bɛde ama bɛ ho he, bɛde bebree bɛka bɛ ho, na bɛanya ama no abu so; na bɛ a bɛanya hwee anka nea bɛde ama bɛ ho he deɛ, kakra a bɛwɔ he mpo, bɛbɛgye afiri bɛ nsam.

³⁰ Akoa a ne so nni mfasoɔ yi deɛ, homfa ne nto sum kabii mu, baabi a suu ne setwerɛ ya.’

Atemmuda kɛseɛ he

³¹ “Sɛ Nipa Ba he ba n’animuonyam mu a, na abɔfoɔ nyinaa ka ne ho a, ɔbɛtena n’animuonyam adwa so.

³² Amane nyinaa bɛboaboa bɛ ano n’anim, na ɔbɛpaepae nnipa mu sɛ dwanhwɛfoɔ paepae nnwane firi mmirekyie mu,

³³ na ɔde nnwane he begyina ne nsa nifa so na mmirekyie he nso ɔde bɛ agyina ne nsa benkum so.

³⁴ Na hene he bɛka akyerɛ bɛ a bɛya ne nifa so he sɛ, ‘Hommra, ho a m’Agya ahyira ho, hommɛfa ahennie a bɛasiesie ama ho firi wiase mfitiaseɛ he nni;

³⁵ efiri sɛ kɔm dee me na homaa me aduane diiɛ, nsukɔm dee me na homaa me nsuo nomeeɛ, meyɛɛ hɔhoɔ na hode me kɔɔ fie,

³⁶ medaa adagya na hofiraa me ntoma, meyareeɛ, na hohwɛɛ me, mekɔdaa afiase na hobɛsraa me.’

³⁷ Na teneneefoɔ he bebua sɛ, ‘Awurade, da bɛ ne yehuu sɛ kɔm de wo na yɛmaa wo aduane diiɛ, anaa nsukɔm de wo na yɛmaa wo nsuo nomeeɛ?

³⁸ Na da bɛ ne yehuu sɛ woyɛ hɔhoɔ na yɛfaa wo kɔɔ fie, anaa woda adagya na yefiraa wo ntoma?

³⁹ Na da bɛ ne yehuu sɛ woyare anaa woda afiase na yɛbaa wo nkyɛne?’

⁴⁰ Na hene bebua bɛ sɛ, ‘Nɔkorɛ meeka akyerɛ ho, sɛ hoyɔ maa me nuanom nkumaa yi mu baako he, hoayɔ ama me nso.’

⁴¹ Na ɔbɛka akyerɛ bɛ a bɛya ne nsa benkum so he sɛ, ‘Ho a bɛadome ho, homfiri me so nkɔ daa gya a bɛasiesie ama Bronsam ne n’abɔfoɔ he mu;

⁴² efiri sɛ kɔm dee me nso hoamma me aduane, nsukɔm dee me, nso hoamma me hwee annom,

⁴³ meyɛɛ hɔhoɔ nso hoamfa me ankɔ fie, medaa adagya nso hoamfira me ntoma, meyareeɛ na mekɔdaa afiase nso hoammɛsra me.’

⁴⁴ Hɔ ne bɛ so bɛbɛka sɛ, ‘Awurade, da bɛ na yehuu sɛ kɔm de wo anaa sukɔm de wo, anaa woyɛɛ hɔhoɔ anaa wodaa adagya anaa woyareɛ anaa wokɔdaa afiase, na yɛannyɔ wo yie?’

⁴⁵ Na obebua bɛ sɛ, ‘Nɔkorɛ meeka akyerɛ ho sɛ, sɛdeɛ hoannyɔ amma nkumaa yi mu baako he, saa ne hoannyɔ amma me nso.’

⁴⁶ Na yeinom befiri hɔ akɔ daa asotwe mu, na ateneneefoɔ he bɛkɔ daa nkwa mu.”