Mateo 20 - Apam Foforɔ

Bobe turo mu adwumayɔfoɔ

¹ “Na soro ahennie he te sɛ afuowura bi a ɔkɔɔ abɔntene anɔpatutuutu sɛ ɔɔkɔpɛ apaafoɔ akɔ ne bobe turo mu.

² Ɔne bɛ dii ano maa osii sɛ obetua paani da korɔ akatua ama he, ɔmaa bɛkɔɔ ne bobe turo mu.

³ Berɛ a ofirii abɔntene bɛyɛ nnɔn nkron he, ohuu apaafoɔ foforɔ dwaso sɛ begyina hɔ a bɛnnyɔ hwee.

⁴ Na ɔka kyerɛɛ bɛ sɛ, ‘Ho nso ho nkɔ bobe turo mu hɔ, na metua ho ka sɛdeɛ ɔsɛ.’ Nti bɛkɔeɛ.

⁵ Berɛ a ɔkɔɔ abɔntene bio bɛyɛ awigyina ne bɛyɛ nnɔn mmeɛnsa he, ɔyɔɔ saa.

⁶ Na ɔbɔɔ bɛyɛ nnɔn num he ɔkɔɔ abɔntene kohuu sɛ binom gyinagyina hɔ; na obisaa bɛ sɛ, ‘Mmɛ nti ne hogyina hɔ kwa da mu nyinaa?’

⁷ Bɛka kyerɛɛ no sɛ, ‘Nipa biaa mmɔ yɛ paa nti a.’ Ɔka kyerɛɛ bɛ sɛ, ‘Ho nso honkɔ bobe turo mu hɔ.’

⁸ Nnwunu dwoeɛ he, bobe turo wura he ka kyerɛɛ ne hwɛsoni sɛ, ‘Frɛ apaafoɔ he na tua bɛ ka, firi deɛ otwa toɔ so kosi deɛ odi kane so.’

⁹ Ɔfrɛɛ apaafoɔ a ɔfaa bɛ nnɔn num he baeɛ, na ɔmaa bɛ mu biaa sɛnea paani dakorɔ akatua teɛ.

¹⁰ Afei bɛ a bedii kane baeɛ he, na benim sɛ bebenya bebree; nso bɛ mu biaa nyaa sɛnea paani dakorɔ akatua teɛ.

¹¹ Na bɛ nsa kaeɛ he, benwinwini tiaa bobe turo wura he,

¹² kaa sɛ, ‘Yeinom a bɛbaa akyire yi yɔɔ adwuma dɔnhwere baako pɛ, nso woama yɛ a yɛayɔ adwuma da mũ nyinaa ama awia ahye yɛ ne bɛ nyinaa pɛ.’

¹³ Nso obuaa bɛ mu baako sɛ, ‘Damfo, wotee me aseɛ sɛ wobɛgye dakorɔ akatua; nti menyɔɔ wo bɔne biaa.

¹⁴ Fa wo akatua kɔ; ɔyɛ mepɛ sɛ mɛma bɛ a bɛbaa akyire yi sɛ wo.

¹⁵ Menni ho kwane sɛ mede m’agyapadeɛ yɔ deɛ meaa me pɛ? Anaa m’ayamyɛ nti na w’ani abere yi?

¹⁶ Saa ne akyidifoɔ bedi kane, na adikanfoɔ mmom abedi akyire.”

Yesu wuo ne ne wusɔreɛ ho nkɔmhyɛ a ɔtɔ so mmeɛnsa

¹⁷ Berɛ a bɛɛkɔ Yerusalem he, Yesu frɛɛ asuafoɔ dummienu he gyinaa nkyɛne, na ɔka kyerɛɛ bɛ kwane so sɛ,

¹⁸ “Hwɛ, yɛɛkɔ Yerusalem, na bɛde Nipa Ba he bɛhyɛ asɔfo mpanyimfoɔ ne atwerɛfoɔ he nsa, na bebebua no kumfɔ;

¹⁹ na bɛde no ahyɛ Amanamane mufoɔ nsa ama bɛadi ne ho fɛw na bɛabɔ no mmaa, na bɛabɔ no asennuam, na da a ɔto so mmeɛnsa he Nyankopɔn anyane no afiri awufoɔ mu.”

Ɔsɛ dikanfoɔ sɛ ɔyɛ somfoɔ

²⁰ Afei Sebedeo mma he ne bɛ maame baa Yesu hɔ. Na bɛ maame he buu nkotodwe Yesu anim, na ɔsrɛɛ ne hɔ bibi.

²¹ Na obisaa no sɛ, “Mmɛ ne woopɛ?” Na ɔka kyerɛɛ no sɛ, “Hyɛ sɛ w’ahennie mu hɔ me mma mmienu yi bɛtena wo nifa ne wo benkum so.”

²² Nso Yesu buaa sɛ, “Wonnim deɛ woobisa he. Hobetumi anom kuruwaa a mɛnom he bi?” Bebuaa sɛ, “Yebetumi.”

²³ Na ɔka kyerɛɛ bɛ sɛ, “Kuruwaa a mɛnom he deɛ ho nso hobɛnom, nso sɛ hobɛtena me nsa nifa ne benkum so deɛ, ɔnnyɛ me ne mede bɛma, na mmom, ɔya hɔ ma bɛ a m’ Agya asiesie de ama bɛ.”

²⁴ Berɛ a asuafoɔ du he tee yei he, bɛ bo fuu anuanom mmienu yi paa.

²⁵ Nso Yesu frɛɛ bɛ baa ne nkyɛne kaa sɛ, “Honim sɛ wiase Amanamane sodifoɔ hyɛ bɛ nkurofoɔ so, na bɛ mu akɛsefoɔ he di bɛ so tumi.

²⁶ Ɔnsɛ sɛ ho deɛ hoyɔ saa; na deɛ ɔpɛ sɛ ɔyɛ kɛseɛ ho mu he ɔsɛ sɛ ɔyɛ ho mu somfoɔ,

²⁷ na deɛ ɔpɛ sɛ ɔyɛ ho mu dikanfoɔ he, ɔsɛ sɛ ɔyɛ akoa ho mu;

²⁸ sɛdeɛ Nipa Ba he nso amma sɛ bɛnsom no na mmom ɔbɛsomeɛ na ɔde ne nkwa ayɛ agyedeɛ ama nipa bebree he.”

Yesu saa mmeema anifirafoɔ mmienu bi yadeɛ

²⁹ Beefiri Yeriko he, nipadɔm pii tu dii n’akyi.

³⁰ Na mmeema anifirafoɔ mmienu bi tete kwane nkyɛne. Berɛ a bɛtee sɛ Yesu ootwam he, bɛteaam sɛ, “Awurade hu yɛ mmɔbɔ, Dawid Ba!”

³¹ Nnipadɔm he hyɛɛ bɛ ketee sɛ bɛnyɔ komm; nso bɛteateam kɛse paa sɛ, “Hu yɛ mmɔbɔ, Awurade, Dawid Ba!”

³² Yesu gyinaa hɔ dinn, na ɔfrɛɛ bɛ, bisaa bɛ sɛ, “Mmɛ ne hopɛ sɛ menyɔ ma ho?”

³³ Bɛka kyerɛɛ no sɛ, “Awurade, ma yenhu adeɛ.”

³⁴ Yesu huu bɛ mmɔbɔ, na ɔde ne nsa kaa bɛ ani. Amonom hɔaa behuu adeɛ bio na bedii n’akyi.