Mateo 19 - Apam Foforɔ

Awaregyaeɛ ho nkyerɛkyerɛ

¹ Yesu ka yeinom wiee he, ofirii Galilea kɔɔ Yudea mpɔtamu hɔ Yordan akyi.

² Na nnipa nnipadɔm pii dii n’akyi, na ɔsaa bɛ yadeɛ hɔ.

³ Na Farisifoɔ baa ne nkyɛne bɛsɔɔ no hwɛeɛ, sɛ, “Mmara ma ho kwane sɛ asɛm bi nti beema bi gyae ne yerɛ anaa?”

⁴ Obuaa sɛ, “Honkenkane sɛ, mfitiaseɛ he, beema ne baa ne Nyankopɔn bɔɔ bɛ

⁵ na ɔkaa sɛ, ‘Yei nti ne beema begya ne papa ne ne maame, na ɔde ne ho akɔbata ne yerɛ, na bɛ mmienu ayɛ honam baako’?

⁶ Ne saa nti bɛnna so nyɛ mmienu bio, na mmom bɛyɛ honam korɔ. Nti deɛ Nyankopɔn de abom he, ɔnsɛ sɛ biaa tete mu.”

⁷ Afei bebisaa no sɛ, “Hedeɛ, mmɛ nti ne Mose hyɛɛ yɛ sɛ, bi betumi ama awaregyaeɛ krataa na wagyae baa he?”

⁸ Ɔka kyerɛ bɛ sɛ, “Ɔyɛ ho akomadene nti ne Mose maa ho kwane sɛ honyae ho yerɛnom, na ofiri mfitiaseɛ he, na ɔnte saa.

⁹ Na meeka akyerɛ ho, sɛ ɔnyɛ adwamammɔ nti, na bi gyae ne yerɛ na ɔsane ware foforɔ a, wasɛe awareɛ.”

¹⁰ N’asuafoɔ he ka kyerɛ no sɛ, “Sɛ saa ne beema ne ne yerɛ asɛm teɛ deɛ a, ɔnsɛ sɛ bi ware koraa.”

¹¹ Na ɔka kyerɛɛ bɛ sɛ, “Ɔnyɛ biaa ne betumi agye saa nkyerɛkyerɛ yi, gye sɛ bɛ a bɛde ho nteaseɛ ama bɛ nkoaa.

¹² Na binom ya hɔ a bɛwoo bɛ he na bɛ ho nni hɔ, na binom nso ya hɔ a, nnipa ne ama bɛ ayɛ saa, na binom so ya hɔ a bɛ ankasa, ne soro ahennie he nti, bɛayɔ ama bɛ ho nni hɔ. Deɛ obetumi agye yei he, ɔnye.”

Yesu hyiraa mmɔfra

¹³ Afei bɛde mmɔfra braa Yesu, sɛ ɔmfa ne nsa ngu bɛ so mmɔ mpaeɛ mma bɛ. Na Asuafoɔ he kaa bɛ a bɛde bɛ baeɛ he anim;

¹⁴ Nso Yesu kaa sɛ, “Homma mmɔfra he mmra me nkyɛne, na ho nsi bɛ kwane; na bɛ a bɛte saa ne soro ahennie he yɛ bɛ dea.”

¹⁵ Na ɔde ne nsa guu bɛ so hyiraa bɛ na ɔkɔɔ ne kwane.

Daa nkwa

¹⁶ Afei, nipa bi baa Yesu nkyɛne bebisaa no sɛ, “Kyerɛkyerɛfoɔ, mmɛ nwuma pa ne menyɔ na manya daa nkwa?”

¹⁷ Na obisaa no sɛ, ‘Mmɛ nti ne wobisa me papa ho asɛm? Baako pɛ ne yɛ papa. Sɛ wopɛ sɛ wo nya nkwa a, di ahyɛdeɛ he so.”

¹⁸ Ɔka kyerɛɛ no sɛ, “Mu deɛ ɔya he?” Na Yesu kaa sɛ, “Nni awu; Nsɛe awareɛ; Mmɔ korɔno; Nni adansekunumu;

¹⁹ Di w’agya ne wo na nni; na afei, Dɔ wo yɔnko sɛ wo ho.”

²⁰ Abranteɛ he ka kyerɛɛ Yesu sɛ, “Maadi yeinom nyinaa so; mmɛ bio ne ɔsɛ sɛ meyɔ?”

²¹ Yesu ka kyerɛɛ no sɛ, “Sɛ wo pɛ sɛ wo woyɛ pɛ a, kɔ, tɔno w’ahonyadeɛ, na fa sika he ma ahiafoɔ, na wobenya agyapadeɛ soro; na afei bra, bedi m’akyi.”

²² Berɛ a abranteɛ he tee saa asɛm he, ɔde awerɛhoɔ firii hɔ kɔeɛ, efiri sɛ na ɔwɔ ahonyadeɛ pii.

²³ Na Yesu ka kyerɛɛ asuafoɔ he sɛ, “Nɔkorɛ meeka akyerɛ ho, ɔbɛyɛ dene ama sikani sɛ ɔbɛkɔ soro ahennie mu.

²⁴ Bio, meeka akyerɛ ho, ɔbɛyɛ mmerɛ ama yoma sɛ ɔbɛfa paneɛ tokuro mu sene sɛ sikani bɛkɔ Nyankopɔn ahennie mu.”

²⁵ Asuafoɔ he tee yei he, ɔyɛɛ bɛ nwanwa kɛse, na bɛkaa sɛ “Sei ne ɔteɛ deɛ a, hwane ne betumi anya nkwa?”

²⁶ Na Yesu hwɛɛ bɛ kaa sɛ, “Nnipa fam deɛ ɔnyɛ yie, nso Nyankopɔn fam deɛ bibiaa nni hɔ a ontumi nyɛ hɔ.”

²⁷ Na afei Petro yii ano sɛ, “Hwɛ, yɛagya nnoɔma nyinaa hɔ abedi w’akyi, mmɛ ne yebenya?”

²⁸ Yesu buaa bɛ sɛ, “Nɔkorɛ meeka akyerɛ ho, sɛ Nipa Ba he tena n’animuonyam adwa so a, na nnoɔma nyinaa yɛ foforɔ a, ho a hoadi m’akyi yi nso ho bɛtena ahennwa dummienu so, abu Israel mmusuakuo dummienu he atɛne.

²⁹ Na biaa a me dini nti, wagya afie anaa nuammeema anaa nuammaa, anaa papa anaa maame anaa mma, anaa nsaase hɔ he, obenya no mmɔho ha, na obenya daa nkwa nso.

³⁰ Nso adikanfoɔ he mu pii bedi akyire, na akyikafoɔ mmom abedi kane.