Mateo 18 - Apam Foforɔ

Ahobrɛaseɛ ho nkyerɛkyerɛ

¹ Saa berɛ he asuafoɔ he baa Yesu nkyɛne bebisaa no sɛ, “Hwane ne yɛ kɛseɛ soro ahennie mu?”

² Na ɔfrɛɛ abɔfra bi, na ɔde no gyinaa bɛ ntam,

³ na ɔkaa sɛ “Nɔkorɛ meeka akyerɛ ho, sɛ hoanyɔ ho ho sɛ mmɔfra a, hontumi nhyɛne soro ahennie mu.

⁴ Nipa biaa a ɔbrɛ ne ho ase sɛ abɔfra he, ɔno ne deɛ ɔyɛ kɛseɛ paa soro ahennie mu.

⁵ “Deɛ ɔgye abɔfra a ɔte sei baako me dini mu he, ɔgye me.

Sintiduatoɔ

⁶ Sɛ ho mu bi to mmɔfra nketewa a bɛgye me di yi mu baako sintidua a, nsunsuansoɔ a ɔbɛba ne so he so kyɛne sɛ bɛde ayuyammoɔ bɛsɛne ne kɔno mu de no akɔto po bunu mu.

⁷ “Wiase nnue, sintidua nti! Otwa sɛ sintidua toɔ ba, nso deɛ ɔnam ne so bɛba he, onnue!

⁸ Sɛ wo nsa anaa wo nane to wo sintidua a, twa firi hɔ, na to twene; ɔyɛ mma wo sɛ wode nsa sini anaa nane sini bɛkɔ nkwa mu sene sɛ wowɔ nsa mmienu anaa nane mmienu na bɛbɛto wo ato daa amanehunu gya mu.

⁹ Na sɛ w’ani to wo sintidua a, tu, na to twene; ɔyɛ sɛ wode ani baako bɛkɔ nkwam sene sɛ wowɔ ani mmienu na bɛbɛto wo atwene amanehunu gya mu.

Dwane a wayera ho mfantoho

¹⁰ “Honhwɛ yie na hoammu nketewa yi baako mpo animtia; meeka akyerɛ ho, soro hɔ, bɛ abɔfoɔ hwɛ m’Agya a ɔya soro he anim daa.

¹¹ [Na Nipa Ba he baeɛ sɛ ɔɔbɛgye bɛ a bɛayera.]

¹² Hosusu yei ho sɛ? Sɛ dwanhwɛfoɔ bi wɔ nnwane ha, na sɛ baako yera a, onnyae aduokro-nkron he mmepɔ he so nkɔnhwehwɛ baako a wayera he anaa?

¹³ Sɛ ohu no a, nɔkwasɛm ne sɛ, n’ani gye ne ho kyɛne aduokro-nkron a bɛanyera he.

¹⁴ Saa ara nso ne ɔnyɛ ho Agya a ɔya soro he pɛ sɛ nketewa yi mu baako bɛyera.

Sɛdeɛ beyi bi a w’ayɛ bɔne atɛne

¹⁵ “Sɛ wo nua fom wo a, kɔ na kɔka ne mfomsoɔ kyerɛ no, berɛ a ho mmienu nkoaa hoahyia. Sɛ otie wo a, woanya wo nua.

¹⁶ Na sɛ wanntie wo a, fa nipa baako anaa mmienu ka wo ho, na asɛm he nyina adansefoɔ mmienu anaa mmeɛnsa so.

¹⁷ Sɛ saa nipa he anntie bɛ a, ka kyerɛ asafo he; na sɛ saa nipa he antie asafo he nso a, fa no sɛ bi a ɔnnyɛ gyidini, na mmom togyeni.

¹⁸ Nɔkorɛ meeka akyerɛ ho, deɛ hobɛkyekyere no asaase so he yɛ deɛ bɛakyekyere no soro, na deɛ hobɛsane no asaase so he yɛ deɛ bɛasane no soro.

¹⁹ Bio, nɔkorɛ meeka akyerɛ ho sɛ, ho mu mmienu yɛ anokorɔ adeɛ biaa a hobebisa no asaase yi so a, m’Agya a ɔya soro he bɛyɔ ama ho.

²⁰ Baabi a nnipa mmienu anaa mmeɛnsa ahyia me dini mu he, na meka bɛ ho.”

Bɔnefakyɛ

²¹ Na Petro baa ne nkyɛne bebisaa no sɛ, “Awurade, mprɛ dodoɔ sɛ ne me nua yɔ bɔne tia me a me mfa nkyɛ no? Onkoduru mprɛ nson?”

²² Yesu ka kyerɛɛ no sɛ, “Menka nkyerɛ wo sɛ, mprɛ nson, na mmom, onkosi mprɛ aduɔson mmɔho nson.

Akoa a onni bɔnefakyɛ he ho mfantoho

²³ “Ne saa nti bɛde soro ahennie he bɛtoto hene bi a ɔpɛɛ sɛ ɔne ne nkoa bu akonta ho.

²⁴ Berɛ a ɔhyɛɛ nkotabuo ase he, bɛde bi a ɔde no ka a ɔboro paani mfie dunnum akatua begyinaa n’anim;

²⁵ esiane sɛ ontumi ntua nti, ne wura he hyɛɛ sɛ bɛntɔno ɔne ne yerɛ ne ne mma ne n’agyapadeɛ nyinaa metua ka he.

²⁶ Ne saa nti akoa he buu nkotodwe hwee ase n’anim, srɛɛ no sɛ, ‘Nya aboterɛ ma me, na metua ne nyinaa.’

²⁷ Na akoa he wura he nyaa tema maa no, na ogyaa no de ne ka he kyɛɛ no.

²⁸ Nso saa akoa korɔ heaa firii hɔ kɔeɛ he, ɔkɔtoo ne yɔnko akoa baako a ɔno nso de no ka bɛyɛ paani bosome mmeɛnsa ne fa akatua; na ɔtintim no sɔɔ ne mene, na ɔkaa sɛ, ‘Tua ka a wode me he.’

²⁹ Afei ne yɔnko akoa he de ne ho too fam srɛɛ no sɛ, ‘Nya aboterɛ ma me, na metua wo ka.’

³⁰ Nso wampene; na ɔde no kɔtoo afiase sɛ ɔnna hɔ nkosi sɛ obetua ne ka he.

³¹ Berɛ a nkoaa a bɛka ne ho he huu deɛ asi he, bɛ werɛ hoo paa, na bɛkɔkaa deɛ asi nyinaa kyerɛɛ bɛ wura he.

³² Na ne wura he frɛɛ no ka kyerɛɛ no sɛ, ‘Wo akoa timuɔdenfoɔ! Mede wo ka a wo de me nyinaa kyɛɛ wo esiane sɛ wosrɛɛ me nti.

³³ Ɔnsɛ sɛ nka wohu wo yɔnko akoa mmɔbɔ, sɛdeɛ mehuu wo mmɔbɔ he anaa?’

³⁴ Na ne wura he de abufuo de no hyɛɛ ahohiahiafoɔ nsa, kosi sɛ obetua ne ka a ɔde no nyinaa.

³⁵ Saa ne m’Agya a ɔya soro he so bɛyɔ ho mu bi a wamfiri n’akoma mu amfa ankyɛ ne nua.”