Mateo 15 - Apam Foforɔ

Honhom mu ahoteɛ

¹ Na Farisifoɔ ne atwerɛfoɔ he firii Yerusalem baa Yesu nkyɛne bebisaa sɛ,

² “Mmɛ nti ne w’asuafoɔ he bu mpanyimfoɔ atetesɛm so yi? Bɛnnhohoro bɛ nsa ansa na bɛadidi.”

³ Obuaa bɛ sɛ, “Mmɛ nti ne ho atetesɛm nti ho bu Nyankopɔn mmara so yi?

⁴ Nyankopɔn dɛ, ‘Di w’agya ne wo na nni,’ na ‘Biaa a ɔka asɛmmɔne fa ne n’agya anaa ne na ho he otwa sɛ owu.’

⁵ Nso hoka sɛ deɛ ɔka kyerɛ ne papa anaa ne maame sɛ, ‘Deɛ nka wobenya afiri me hɔ yɛ akyɛdeɛ a yɛde ma Nyankopɔn a onhia sɛ saa nipa he di ne papa ne maame nni.’

⁶ Nti hode ho atetesɛm sɛe Nyankopɔn asɛm.

⁷ Ho nyaatwomfoɔ! Odi sɛ Yesaia hyɛɛ ho ho nkɔm sɛ:

⁸ ‘Mane yi de bɛ ano fafa ne di me nni, nso bɛ akoma deɛ atwe afiri me ho kɔ akyirikyiri;

⁹ bɛsom me kwa, bɛkyerɛkyerɛ nipa ahyɛdeɛ sɛ ɔyɛ nkyerɛkyerɛ pa.’ ”

Nnoɔma a ogu nipa ho fi ankasa

¹⁰ Na ɔfrɛɛ nkurofokuo he baa ne nkyɛne na ɔka kyerɛɛ bɛ sɛ, “Hontie na ho nteaseɛ:

¹¹ nyɛ deɛ ɔkɔ nipa anum ne gu nipa ho fi, na mmom deɛ ofiri anum ba ne gu nipa ho fi.”

¹² Na asuafoɔ he baa ne nkyɛne bɛka kyerɛɛ no sɛ, “Wonim sɛ Farisifoɔ he tee deɛ wokaeɛ yi ato bɛ sintidua?”

¹³ Obuaa sɛ, “Dua biaa a ɔnyɛ m ‘Agya a ɔya soro he ne duaeɛ he bebetu.

¹⁴ Honnyae bɛ; bɛyɛ anifirafoɔ a bɛkyerɛ anifirafoɔ kwane. Sɛ nifirani kyerɛ nifirani kwane a, bɛ mmienu he nyinaa bɛtɔ amena mu.”

¹⁵ Petro tee yei he, ɔka kyerɛɛ no sɛ, “Kyerɛ yɛ saa bɛ yi ase.”

¹⁶ Na ɔkaa sɛ, “Ho nso honni nteaseɛ?

¹⁷ Honnim sɛ bibiaa a ɔkɔ anum he kɔ yafunum na opie kɔ yaaneem?

¹⁸ Na deɛ ofiri anum he firi akoma mu, na yei ne deɛ ogu nipa ho fi.

¹⁹ Na akoma mu ne adwemmɔne, awudie, ayerefasɛm, adwamane, korɔnobɔ, adansekunumu ne dinsɛeɛ firi ba.

²⁰ Saa nnoɔma yi ne gu nipa ho fi, na mmom ɔnyɛ nsa a bi anhohoro ho na ode didi ne gu ne ho fi.”

Kanaanni baa bi gyidie

²¹ Na afei Yesu firii hɔ kɔɔ Tiro ne Sidon mantam mu.

²² Na amonom hɔaa, Kanaanni baa bi a ofiri mpɔtamu hɔ ba bɛteateam sɛ, “Hu me mmɔbɔ, Awurade, Dawid Ba; honhommɔne ɔɔha me babaa.”

²³ Nso wammua no koraa. Na n’asuafoɔ he baa ne nkyɛne bɛsrɛɛ no sɛ, “Pam no ma no nkɔ, na ɔɔteateam gu yɛ so dodo.”

²⁴ Na obuaa sɛ, “Bɛansoma me baabiaa sɛ Israel mu nnwane a bɛayera he hɔ.”

²⁵ Nso baa he bebuu nkotodwe n’anim kaa sɛ, “Awurade, boa me.”

²⁶ Na Yesu buaa sɛ, “Ɔnyɛ fɛ sɛ bɛfa mma aduane to ma nkramane mma.”

²⁷ Na baa he kaa sɛ, “Awurade, ɔte saa deɛ, nso nkramane mma he di mporoporowa a ofiri bɛ wura pono so gu fam he.”

²⁸ Na Yesu buaa no sɛ, “Baa, wo gyidie so! Ɔnyɔ hɔ mma wo sɛ deɛ wopɛ.” Amonom hɔaa ne ba he nyaa ayaresa.

Yesu saa nnipa bebree yadeɛ

²⁹ Afei Yesu firii hɔ bɛfaa Galilea po he ho, na ɔkɔɔ mmepɔ he so, ne ɔtenaa ase.

³⁰ Nnipadɔm pii de mpakye, mmubuafoɔ, anifirafoɔ, mmum, ne afoforɔ bebree kaa bɛ ho baa ne nkyɛne. Bɛde bɛ beguu ne nane ase, na ɔsaa bɛ yadeɛ,

³¹ na ɔyɛɛ nnipadɔm he nwanwa berɛ a behuu nea na ɔyɛ mmum he sɛ ɔɔkasa, bɛ a na bɛyɛ mpakye ne mmubuafoɔ sɛ bɛnnante, na nea na ɔyɛ anifirani he huu sɛ afie deɛ ohu adeɛ. Na bɛhyɛɛ Israel Nyankopɔn he animuonyam.

Yesu maa nnipa mpemnan aduane

³² Na Yesu frɛɛ n’asuafoɔ he baa ne nkyɛne na ɔkaa sɛ, “Nnipadɔm yi yɛ me mmɔbɔ paa, efiri sɛ bɛatena me nkyɛne nnansa nso benni hwee a bebedi; na mempɛ sɛ mɛma bɛde kɔm akɔ, anyɛ saa a bebetumi atwa ato kwanem.”

³³ Na asuafoɔ he ka kyerɛɛ no sɛ, “He fa ne yebenya paanoo a ɔbɛso nnipa bebree yi serɛ so ha?”

³⁴ Yesu bisaa bɛ sɛ, “Howɔ paanoo dodoɔ mmeɛhe?” Na bɛkaa sɛ, “Nson, ne nkyenam nketewa kakraa bi.”

³⁵ Na ɔhyɛɛ nkurofokuo he ma bɛtenaa ase,

³⁶ na afei ɔfaa paanoo nson ne nkyenam he; na ɔdaa ase wieeɛ he, obubuu mu mmaa asuafoɔ he, na asuafoɔ he nso de maa nnipadɔm he.

³⁷ Na bɛ nyinaa di meeɛ; na bɛsesaa aseɛ mporoporowa nkɛntɛmma nson.

³⁸ Sɛ yɛankane mmaa ne mmɔfra anka ho a, bɛ a bediiɛ he dodoɔ bɛyɛ mmeema mpemnan.

³⁹ Berɛ a ogyaa nnipadɔm he kwane he, ɔfaa kodoɔ kɔɔ Magadan mpɔtamu.