Mateo 11 - Apam Foforɔ

Suboni Yohane ahoyera

¹ Na berɛ a Yesu kasa kyerɛɛ n’asuafoɔ dummienu he wieeɛ he, ofirii hɔ kɔɔ bɛ nkuro he mu sɛ ɔɔkɔ kyerɛkyerɛ, na afei wapaem kaa n’asɛm he hɔ.

Asomafoɔ a bi firi Suboni Yohane hɔ baa Yesu nkyɛne

² Berɛ a Yohane da afiase a ɔtee deɛ Kristo ɔɔyɔ he, ɔsomaa n’asuafoɔ

³ ma bɛ bebisaa Yesu sɛ, “Wone deɛ ɔɔba he, anaa yɛnhwɛ foforɔ kwane?”

⁴ Yesu buaa bɛ sɛ, “Honkɔ na honkɔka deɛ hoate ne deɛ hoahu nkyerɛ Yohane:

⁵ anifirafoɔ hu adeɛ, mmubuafoɔ nante, akwatafoɔ ho firi, asotifoɔ te asɛm, awufoɔ nyane firi wuom, na bɛka asɛmpa he kyerɛ ahiafoɔ.

⁶ Nhyira ne deɛ mennto bɛ sintidua.”

Yesu kamfõõ Suboni Yohane

⁷ Na bɛɛkɔ he, Yesu firii aseɛ kaa Yohane ho asɛm kyerɛɛ nnipadɔm he sɛ: “Mmɛ ne hokɔɔ serɛ so kɔhwɛeɛ? Nnɛm a mframa ohim no anaa?

⁸ Sɛ onte saa a ɛɛne ne hokɔhwɛeɛ? Bi a ɔhyɛ ntaade pa? Hwɛ, bɛ a bɛhyɛ ntaade pa he bɛya ahemfie.

⁹ Anaa abɛ koraa nti ne hofirii adi kɔhwɛeɛ? Diyifoɔ? Ɛɛ, meeka akyerɛ ho, sɛ ɔte saa; nso, ɔkyɛne diyifoɔ koraa.

¹⁰ Yei ne deɛ bɛatwerɛ ne ho asɛm sɛ, ‘Hwɛ, meesoma me bɔfoɔ adi w’anim, a obesiesie w’anim kwane.’

¹¹ Nɔkorɛ meeka akyerɛ ho sɛ, nipa biaa nni hɔ a baa awo no a ɔyɛ kɛseɛ kyɛne Suboni Yohane; nso nea osua koraa soro ahennie mu he yɛ kɛseɛ kyɛne no.

¹² Ofiri Suboni Yohane berɛ so besi nnɛ bɛyɔ soro ahennie he ho adeɛ anibereɛ so, na bɛ a bɛ ani abere he nso fa no aniɔdene so.

¹³ Na adiyifoɔ ne mmra he nyinaa hyɛɛ nkɔm de besii Yohane berɛ so;

¹⁴ na sɛ hobɛgye adi a, ɔno ankasa ne Elia a otwa sɛ ɔba he.

¹⁵ Deɛ ɔwɔ aso he ntie!

¹⁶ “Nso hwane ho ne mede nemmafoɔ yi bɛtoto? Bɛte sɛ mmɔfra a bɛɛteam frɛ bɛ mfɛfoɔ sɛ,

¹⁷ ‘Yɛabɔ mmɛne amma ho, nso hoansa; yɛatwa adwo, nso hoannsu.’

¹⁸ Na Yohane baeɛ, na onnidi, na ɔnnom nso, na bɛkaa sɛ, ‘Ɔwɔ honhommɔne’;

¹⁹ Nipa Ba he baeɛ a odidi na ɔnom, na hoka sɛ, “Ɔyɛ didifoɔ ne nsanomfoɔ, togyefoɔ ne nnebɔnyɛfoɔ bɛ adamfo!’ Nso, bɛ a bɛde Nyankopɔn nyansa di dwuma he da no adi sɛ ne nyansa he yɛ papa.”

Nkuro a bɛansakra bɛ adwene he nnue

²⁰ Afei ɔhyɛɛ aseɛ kaa nkuro a na waayɔ ne tumideɛ he mu fa kɛseɛ hɔ he anim, efiri sɛ bɛansakra bɛ adwene,

²¹ “Korasin due! Betsaida due! Efiri sɛ, sɛ bɛyɔɔ tumideɛ a bɛayɔ no ho mu he, bɛyɔɔ no Tiro ne Sidon a, nka bɛasakra bɛ adwene afira ayitoma de nso apete bɛ tim de akyerɛ bɛ adwensakra dadaada.

²² Meeka akyerɛ ho, atemmuda he, bebehu Tiro ne Sidon mmɔbɔ akyɛne ho.

²³ Na wo Kapernaum nso, bɛbɛpegya wo akɔ soro anaa? Daabi da, bɛde wo bɛkɔ asamando. Efiri sɛ, bɛyɔɔ tumideɛ a bɛayɔ no wo mu he Sodom a, nka Sodom kuro he ya hɔ de besi nnɛ.

²⁴ Na meeka akyerɛ ho sɛ, atemmuda he, bebehu Sodom asaase mmɔbɔ akyɛne ho.”

Hommra me nkyɛne, na mɛma ho ahome

²⁵ Saa berɛ he, Yesu kaa sɛ, “Agya, soro ne asaase Wura, meda wo ase, efiri sɛ, wode nnoɔma yi ahinta anyansafoɔ ne mmadwemma, na woayi no adi akyerɛ mpapahwekwaa.

²⁶ Ampa, Agya, saa ne sɔ w’ani.

²⁷ M’Agya de nnoɔma nyinaa ahyɛ me nsa; na biaa nnim Ba he, gye Agya he; na biaa nnim Agya he nso, gye Ba he ne biaa a Ba he pɛ sɛ ɔbɛma n’ahu no.

²⁸ Ho a hoabrɛ, na ho so nnesoa nyinaa, hommra me nkyɛne, na mɛma ho ahomee.

²⁹ Homfa me konnua nto ho ho so, na honsua me, efiri sɛ medwo na mebrɛ me ho ase akoma mu, na hobenya homee ama ho kra.

³⁰ Efiri sɛ, me konnua ɔmmerɛ na m’adesoa so mu ɔhare.”